Naalagaaffimmik oqaluussissutiginninnermit nutaarsiassat

Naalagaaffimmik nutaarsiassaq nuannersoq oqaluussissutigineqassaaq

UKIUNI hundredelikkuutaani Guutimut akeraasup annerpaap, Satan Diaavulup, naalakkersuisut eqqunngitsumillu upperisarsiorneq peqqusersuumik atorlugit kristumiussutsip ilumoortup siaruaannissaa akornuserniartuarsimavaa. Iluatsitsinavianngilarli. Jesus siulittuisimavoq ’naalagaaffimmik nutaarsiassaq nuannersoq oqaluussissutigineqassasoq [imaanngitsoq ’oqaluussissutigineqassagunartoq’, imaluunniit ’oqaluussissutigineqarsinnaasoq’] inuit najugaanni tamarsuarmi inuiaqatigiit tamarmik nalujunnaarutissaannik’. — Matîuse 24:14.

Satanip iluatsitsinnginnera Grækenlandimi uppernarsaatissaqarpoq. Nunami tamatumani Ilagiit Griikerit Ortodoksiusut Jehovap nalunaajaasuisa Naalagaaffimmik nutaarsiassamik nuannersumik oqaluussissutiginninnerat killilersorniarsarisimavaat. Soorluli misigisami matumani ersersilluarneqartoq naak akerlilersuisoqaraluartoq piffissanngoraangat Biibilip sallusuissutaa inunnut eqqortumik uummatilinnut annguttarpoq.

Ukiut 30-t missingisa matuma siorna Ilagiit Griikerit Ortodoksit palasiat nutaarsiassamut nuannersumut akuersaarpoq Jehovamullu nalunaajaasunngorusunnini oqaatigalugu. Qanigisaminilli akerlilersorneqartorujussuuvoq, nakkaannarlunilu nalunaajaasunik ilaqartarunnaarpoq. Ilaquttani nuannaartinniarlugit palasiunini attatiinnarpaa; nalunngittuaannarpaali Jehovap nalunaajaasuisa sallusuissummik ilinniartissimagaanni sallusuissummullu taarsiullugu eqqunngitsumik upperisarsiornerup iluani atorfik nuimasoq qinersimallugu.

Taamaakkaluartorli periarfissaqaraangami Jehovap nalunaajaasui ajunngitsumik eqqartortarpai. Allaallu arlaleriarluni inuit kajumissaarsimavai sallusuissut Biibilimiittoq ilinniarusukkunikku Jehovap nalunaajaasuinik atuaqqissaaqateqartariaqartut. Siunnersuutaa ukiut ingerlaneranni arlalinnit malinneqarsimavoq.

Qanittukkut palasi napparsimasorujussuanngorpoq, nalujunnaarpaalu toqusussanngorluni. Napparsimmavimmiitilluni meeqqani tamaasa aggeqquai, siniffimmilu sanianut katersortillugit.a Taava nassuiaatilerpai toqussaguni takoqqissinnaagaanni. Jehovap toqusunik paratiisimi nunamiittumi makititsinissaa pillugu Biibilip ajoqersuutaanik oqaluttuuppai, tamatumalu pinissaa takorusulluinnarunikku sallusuissut Biibilimiittoq ilinniartariaqaraat eqqunngitsumillu upperisarsiorneq qimattariaqaraat. Ilungersorluni qinnuigai Jehovap nalunaajaasui ilagisalissagaat ilumoortumillu kristumiunngornissartik taakkunannga ilinniarlugu.

Sivitsunngitsoq palasi toquvoq. Meeqqaminulli naggataamik unnersuussutaa kinguneqarluarpoq. Pania, qanigisami amerlanersaat assigalugit, Jehovap Nalunaajaasuinut taakkualu suliaannut akerliusorujussuusimagaluarpoq. Misigaarli ataatami toqulerluni ilumoorluni kajumissaarutaa sumiginnarsinnaanagu, taamaattumik erniinnaq Jehovap nalunaajaasui attaveqarfigai Biibilimillu atuaqqissaaqatigisalerlugit. Qanittukkut nalunaajaasunngorpoq, inuunini Jehova Guutimut tunniulluinnarlugu tunniulluinnarsimaninilu imermi kuisinnermigut takutillugu.

Grækenlandimi, soorlu nunani allani 230-ni taamaattoq, Jehovap Nalunaajaasuisa Guutip anersaavata illernartup pissaanera tunaaraat. Anersaamit illernartumit ikiorneqarlutik Jesusip siulittuutaanik matuminnga eqquutitseqataapput: ’Anersaap illernartup ilissinnut piumaartup pissaanera pigilerumaarparsi, nalunaajaasigiumaarpassilu Jerusalemimi Judeamilu tamarsuarmi Samariamilu nunallu isuanut allaat.’ — ap. sul. 1:8. (wE 1/2 95)

[Quppernerup ataani ilanngussaq]