Nammineq atuaqqissaartarnerit nuannaraajuk?
GUUTIP kiffaa ilumoorniartoq kinaluunniit nammineq Biibilimik atuaqqissaartarnissamut piffissamik nuannaarluni immikkoortitsisariaqarpoq. (Tussiaat 1:1, 2) Amerlasuulli misigisarput taama piffissaajaatissat nukissaajaatissallu amerlatigisut nammineq atuaqqissaarnissamut piffissaqarniarneq nukissaqarniarnerlu ajornakusoortoq.
Guutilli kiffaasut suliniuteqartuassagutta ullut tamaasa Guutip oqaasiata sallusuissutaanik itinerusumik misissuisarnitsigut nuannaarnerput nukivullu nutaanngorsartuartariaqarpavut. Biibilip sallusuissutai ukiut arlallit matuma siorna annertuumik killinneqaatigisimasavut immaqa maannakkut taama killinneqaatigitigisanngilavut. Taamaattumik pitsaassaaq, allaammi inuuginnarnissamut pingaaqaluni, sallusuissut itinerusumik paasisaqarfigiuarumallugu pimoorullugu suliniuteqassalluta, taamaalilluta anersaakkut uummaarittuarniassagatta.
Itsaq uppertut qanoq ilillutik Guutip oqaasianik atuaqqissaartarnermikkut anersaakkut nukittujuartittarsimappat? Ullumikkut nalitsinni Jehovap kiffaasa qanoq ilillutik atuaqqissaartarnertik nuannersuutillugulu kinguneqarluartittarpaat? Ilungersornitik qanoq pilluaqquneqaatigisimavaat?
Nammineq atuaqqissaartarnermikkut nutaamik nukissaqaqqilertarsimapput
Judap kunngia Josias ’Jehovap inatsisaanik Mosesikkut nalunaarutigisimasaanik’ atuffanneqareerluni guutipilussiorneq akiorniarlugu suliniuteqarnermini ilungersuussinerulersimavoq. Qularnanngitsumik Guutip oqaasiata ilaa tamanna aatsaat tusalinngikkaluarpaa; allassimaqqaarfianiilli atuarneqartoq tusarlugu pallorfiginninneq minguitsoq pillugu sorsuuteqarnermini kajumissisinneqarsimavoq. — 2 Israelikkut 34:14-19.
’Ukiut Jerusalemip piuneerussimaffissaasa amerlassusissaat’ qularnanngissusiallu pruffiitip Danielip Jeremiasip allagaaniinnaanngitsoq aammattaarli ’allakkani illernartuni’ paasisimavai. Qularnanngitsumik taakkununnga ilaapput Mosesimik allakkat pingajui (26:34, 35), Jesaja (44:26-28), Hosea (14:4-7) aamma Amos (9:13-15). Biibilip atuagartaanik peqqissaartumik misissuinermigut uppernarsisani angutip upperluartup taassuma qamannga pisumik qinunikkut Guutimut ujartuinissaminut killinneqaatigai. Ilumoorluni qinnutaa akineqarpoq illoqarfik Jerusalem pillugu namminerlu pilluni annerusumik saqqummersitsivigineqarlunilu toqqissiallatsinneqarluni. — Daniel, kapitali 9.
Josias, ’Jehovap iluarisaanik iliortoq’, Danielilu, ’Guutimit nuannarineqangaartoq’, tunngaviusutigut uatsinnit ullumikkut inuusunit allaassuteqanngillat. (2 Kunngit 22:2; Daniel 9:23) Allakkanik Illernartunik taamani pissarsiarisinnaasaminnik ilumoorussilluarlutik atuaqqissaartarnermikkut inuttut ilungersorlutik suliniutitik anersaamut tunngasunik pingaartitsinerulissutigalugillu Guutimut qaninnerulissutigisimavaat. Aamma itsaq Jehovap kiffaasa ilarpassui taama pisimapput, soorlu Jefta, tussiaasiortoq Asaf, Nehemias aammalu Stefanus. Taakku tamarmik Biibilip ilaanik taamanikkut pissarsiarisinnaasaminnik peqqissaarlutik misissuisarsimapput. — Eqqartuussisut 11:14-27; Tussiaat 79, 80; Nehemja 1:8-10; 8:9-12; 13:29-31; apustilit suliait 6:15–7:53.
Kiffartornerit kajumissinartuutiguk
Ullumikkut ukiorpassuarni Jehovamut kiffartorsimasut amerlanersaat aalajangersimasumik namminneq Biibilimik atuaqqissaartarfeqarput. Anersaakkut eqqumajuaannarnissaminnut kristumiutullu pisussaaffimminnik tamakkiisumik naammassinnissinnaanissaminnut tamanna pingaarluinnartutut isigaat. Taamaakkaluartorli amerlasuut miserratiginngilaat atuaqqissaarnermut pisussaaffinnullu allanut sumiginnarneqartussaanngitsunut piffissap nukiillu oqimaaqatigiissumik atorniarnerat oqitsuinnaasanngitsoq.
Peqqissaartumik atuaqqissaartarnikkut anersaakkut eqqumajuaannarneq ullumikkut piffissap taamaalinerani nunarsuaq tamakkerlugu oqaluussissutiginnilluni kristumiutut kiffartornermi pisariaqartitanut tunngaviusumik pingaaruteqarpoq. Guutip oqaasianik paasisaqarnerunerminnik angorniuutiginnittut inuit uummataannik kaattunik killiiniarnermik unamminiarnartoq ajugaaffigisinnaanerusarpaat. Tamanna ilumoorpoq anersaakkut aalisagaqarluarnissaanik ilimanaatilimmi kiffartoraluaraanni imaluunniit oqaluussiffissani angalaarfigineqarluarsimasuni soqutiginninnginnerusunik inulimmi suligaluaraanni.
Guutip oqaasianit aalajangersimasumik inuussuteqarneq
Immaqa allat iliuusii isumassarsiffigisinaavatit qanoq ilillutit aalajangersimasumik atuaqqissaartarnerit nuannarinerusinnaagit imaluunniit qanoq ilaquttatillu atuaqqissaartarnersi pissarsiffiulluarnerusumik ingerlassinnaagissi. Guutip kiffaata pinngitsoorumanngisaanut ilaavoq Guutip oqaasianik namminermik aalajangersimasumik atuaqqissaartarneq. Amerlasuut anguniagarilersimavaat sapatit-akunneri tamaasa kapitalit minnerpaamik pingasut sisamalluunniit Biibilimi atuartarnissaat. Biibili tamaat ukiup ataatsip ingerlanerani atuarusuppiuk? Taava nuannarissavat piffissaq annerusoq atuarneranut atussallugu, immaqa ullormut nalunaaquttap-akunnerata affaa.
Ataasiaannarnak Biibili tamaat atuarnikuuiuk? Tamaat atuaqqinnissaa anguniagariniaruk. Allannguilaarumalluni arnap kristumiup Biibilip atuagartai allanneqarsimanerisa tulleriinneri malilugit atuarsimavai. Annikitsualuit pisimasut qanga pisimanerinut attuumassuteqartut siornatigut arajutsisimasani paasiortorpai. Arnap kristumiup allap ukiut tallimat ingerlaneranni Biibili tamaat tallimariarlugu atuarsimavaa, tamatigut sammivinnit assigiinngitsunit misissuiffigalugu. Siullermik tamaat aallaqqaataanit naggataanut atuaannavillugu atuarsimavaa. Aappassaanik atuarnerani kapitalit tamarmik immikkut imaat eqikkarlugit allattaavinnut titarnermik ataatsimik marlunnilluunniit takitigisumik allattortarpai. Ukiut pingajussaat aallarnerfigalugu Biibili innersuussutitalik atorlugu innersuussutit misissoqqissaariarlugit quppernerit ataanni ilanngussanilu paasissutissat misissoqqissaartarpai. Ukiut tallimassaanni Biibilimi nunap assingi atorpai nunap sumiissusii paasisaqarfiginerujumallugit. Arnaq oqarpoq: „Biibilimik atuarneq nerinertulli nuannaritigilerpara.“
Biibilimik atuaqqissaartartut ilungersuussilluartut paasisimavaat assut pitsaasoq atuaqqissaarnermiinnaq atortakkamik immikkut biibileqarneq, allanneqannginnersai allattuiffigisarlugit oqaaseqaatinik soqutiginartunik, assersuusianik eqqarsalernartunik imaluunniit atuagassiani allani quppernernik kingorna uterfigeqqissinnaasaminnik. Piffissaq tamaat kiffartortup ataatsip nuannarisarpaa qaammatit naaneranni qaammatip ingerlanerani ilikkarsimasani biibilimut atuaqqissaarnermini atortakkaminut allattortarlugit. „Piffissanik naleqaqisunik tamakkuninnga qilanaarisaqartarnera,“ oqarpoq, „qaammammut anguniakkannik allanik naammassinniaarnissannut iluaqutigisarpara.“
Isumassarsiatsialaat
Misigivit pilersaarutitit ullormut sapaatip-akunneranullu inuunermut pisariaqartuinnavissuarnik ulikkaartut piffissallu killeqartoq pitsaanerusumik atorumallugu siunnersorneqarnissat pisariaqartillugu? Aalajangeruk suna atuassallugu, sunngiffitilllu atorluartakkit. Angerlarsimaffinni imaluunniit arlaanni atuaqqissaarfigisartakkanni atuagaatitit atuaqqissaarnermilu atortutit allat sapinngisamik tigoriaannaasumiitikkit. Atuaqqissaarfigisartakkat ilorrisimaarnartuutiguk, imali ilorrisimaarnarpallaassanngilaq puungaleqqajaanarluni. Saqqummiussassannik pisassaqarpit? Sapinngisamik siusinaarlutit atortussatit atuakkit, susaqannginninnilu imaluunniit suliassavit assigiinngitsut samminerini isumassarsiorlutit eqqarsaatigiuk.
Piffissamik pitsaanerusumik atuiniarninni immaqa allat suleqatigisinnaavaatsit tamassinnut iluaqutaasumik. Assersuutigalugu arlaat allaaserisamik paasiuminartumik nipituumik atuartissinnaavat, ullormut suliassatit sammiitigalugit imaluunniit atuffassisit tiimik sassaallerfigiitigalugu. Immaqa aamma angerlarsimaffissinni tamassi isumaqatigiissinnaavusi piffissami aalajangersimasumi nammineq atuaqqissaarfiusumi nipaarsaarfeqarnissamik. „Illit suna kingullertigut atuarpiuk?“ Ikinngutivit atuarsimasaat iluaqutiginiarsinnaavatit taamatut aperalutit oqaloqatigiinnermik aallartitsinikkut.
Atuaqqissaartarnerit periaatsinik nutaanik ilassallugu soqutigaajuk? Biibili pillugu inunnut allanut oqaluussinissamut piffissamik anguniagaqartarnertut illit atuaqqissaarnermut piffissamik anguniagalersinnaavutit. Pionerit ilaat qaammammut atuaqqissarnermut atugassaminik aalajangersimasumik anguniagaqartarpoq, angugaangamiuk nuannaarutigisartakkaminik. Allat tv-mik isiginnaartarnertik killilersulersimavaat atuaqqissaarnermut piffissaqalerumallutik. Amerlasuut piffissami aalajangersimasumi aalajangersimasumik sammisaqartarput, soorlu anersaap inerititai, Biibilip atuagartaasa tunuliaqutaat imaluunniit ilinniartitseriaaseq. Ilaasa pisimasut qanga pisimaneri sammissallugit nuannarisarpaat, soorlu pisimasut ukiuinik nalunaarsugaliorlutik, assersuutigalugu Israelikkut kunngiisa pruffiitiisalu nalaanni imaluunniit apustilit Paulusikkullu nalaanni pisimasunik.
Inuusuttut ilissi, uppernikkut nukittunerulerusuppisi? Aalajangersinnaavusi tulliani atuanngiffeqarnissassinni aalajangersimasumik atuaqqissaagaqarniarlusi. Klassit annerit ilaanni atuartup ataatsip atuagaq Menneskets søgen efter Gud, Napasuliaq Alapernaarsuiffiup Peqatigiiffianit naqiterneqarsimasoq, atuaqqissaarniarlugu aalajangersimavoq. Kapitali naagaangamiuk ilikkakkani allattaaveeqqanut eqikkarlugit allattortarpai. Unamminiarnartuuvoq ilimagisaanillu sivisunerulluni. Atuagarli tamaat naagamiuk Biibilip oqariartuutaata uppernassusia tupigusuutigaa.
Ilinniarusussuseqarit
Nalitsinni Jehovap kiffai aalajaatsut amerlasoorpassuit ’Naalakkap suliaanik naammassisaqangaareersimapput’. (1 Korintumiut 15:58) Naak misissuigaluarlutit immaqa sapaatip-akunneranut pilersaarusiat annertuumik allanngortinneqarsinnaanngilaq. Kisianni sallusuissummik paasisaqarnerorusukkuit Jehovallu siunertaanik saqqummersitsiuarneq malinnaaffigerusukkukku pilersaarusiavit allanngortinnissaannut periarfissaqarsinnaassaatit.
Atuaqqissaartarnerminnik pitsanngorsaasimasut pilluaqqusaasimaneri tusarlugit qiimmaallannaqaaq. Angutip kristumiup paasigamiuk sallusuissummik itinerusumik paasinninnissamik sulissutiginninnissamut tunngatillugu isummani pitsaavallaarunnaartoq inuunini aaqqissuussimavaa nammineq atuaqqissaarnissaminut piffissaq annerusoq atortalerniarlugu. „Siornatigut nalusimasannik atuaqqissaartarnerma nuannaarutissippaanga,“ oqarpoq. „Biibilip Guutiminngaanneersuuneranik aatsaat taama qularutiginninngitsigilerama upperisara pillugu inuit allat oqaluttuukkaangakkit angorniornerujussuanngorpunga. Misigilerpunga anersaakkut ’qaarsilaarlunga’, ullullu tamarluinnaasa nalerisimaarnerulerlunga.“
Jehovap nalunaajaasuini nakkutilliisup angalasartup, ilageeqarfippassuarnut tikeraartartup, iluaqutissat allat ima oqaatigai: „Namminneq atuaqqissaartarnerminnik aallussilluarnerusut uummaarinnerusarput saqqummiussamikkullu nalorninnginnerusarlutik. Allanik peqateqartarnermikkut ajornartorsiuteqannginnerupput, allallu oqaasiinut pitsaanngitsunut ajuallajannginnerullutik. Oqaluussigaangamik eqaannerusarput inuillu naapitamik pisariaqartitaannik eqqumaffiginninnerusarlutik.“
Ilaasa namminneq atuaqqissaartarnerminnik isumaliutiginneqqissaarnerminni eqqaamasariaqagaat taassuma tikkuarpaa. „Biibili tunngavigalugu ataatsimiinnerni amerlasuut allassimasut maliinnarlugit akeqqajaasarput. Iluaqutiginerussagaluarpaat isumaliutigeqqissaartartuugunikku maannakkut sammisartik siornatigut ilikkarsimasaminnut imaluunniit namminneq inuunerminnut qanoq attuumassuteqarnersoq.“ Illit tassuunakkut siuariaateqarsinnaavit?
Pruffiiti Daniel ukiut 90-it sinnerlugit inooreersimagaluarluni misigisimanngilaq Jehovap aqqutigeqqusai naammattumik paasisimallugit. Inuunermi ukiuini kingullerni paasilluarsinnaanngisani pillugu ima aperisimavoq: „Naalagara, tamakku sumik kinguneqassappat?“ (Daniel 12:8) Nalunanngilaq Guutip sallusuissutaanik paasisaqarnerorusuttuarnera inuunermini pisimasoqarfioqisumi assuarnaalluinnarneranut pissutaasimasoq. — Daniel 7:8, 16, 19, 20.
Jehovap kiffai pinngitsoqaratik taassumunnga nalunaajaasuusutut aalajaattuaannarnissaminnut akisussaaffikinnerunngillat. Anersaakkut nukittuujutittuarnissavit ilikkarnissaa ilungersuutigiuaruk. Sapaatip-akunneranut, qaammammut ukiumulluunniit nammineq atuaqqissaarnissamut pilersaarusiannut anguniakkanik nutaanik ilanngussigit. Ilungersornitit annikitsunnguugaluilluunniit Guutip pilluaqqussavai. Aap, nammineq Biibilimik atuaqqissaartarnerit kingunerilu nuannaarutigisakkit. — Tussiaat 107:43. (wD 15/6 94)