Ataatsimeersuarneq „Oqaatsit minguitsut“ najuuffiginngitsooqinagu

ULLUT sisamat Bibelimik ilinniartitsiffiusut pissarsiaqarluarnartut aggerput. Ulloq ataatsimeersuarfiusussaq siulleq nalunaaqutaq 13.30 aallartippat takkutereerniarna. Oqalugiaat eqqarsaammernartoq „Ikinngutitit Jehovap ikinngutigai?“-mik qulequtaqartoq oqalugiaallu ataatsimeersuarnerup qulequtaanut tunngasoq „Inuiannut tamanut oqaatsit minguitsut“-mik qulequtaqartoq qilanaarutigisinnaavatit. Ualikkut oqalugiaammi kingullermi, „Inuunerit aammik annaatissaviuk — qanoq ilillutit?“-mik qulequtaqartumi, apeqqut manna akineqassaaq: Inuuneq annaakkumallugu aalersortinnissaq pisariaqarluinnarpa?

Ullut ataatsimeersuarfiusut aappat nalunaaqutaq 9.30 aallarnerneqassaaq. Najuunniarna, oqalugiaat imminut misissulersitsisoq „Kristusip ’inatsisaatsussuseq uumissorpaa’ — aamma illit uumissorpiuk?“-mik qulequtaqartoq aammalu oqalugiaat kajumilersitsisoq „Kissaatit piviusuunngitsut silarmiorpaluttut ajattukkit, Naalaaffiup piviusuutai anguniakkit“-mik qulequtaqartoq pissarsiaqarfiginiassavatit. Qanoq ililluni akissaatinik naammattusaarisinnaaneq pillugu ualikkut atoriaannaasunik siunnersuuteqassaaq. Aammattaaq angajoqqaat qanoq pitsaanerusumik akisussaaffimminnik eqqortitsisinnaanertik pillugu ajoqersorneqassapput, isiginnaagassiarlu ullutsinneersoq sukisaarsaatinut tunngasunik pitsaasunik inuusuttunut unnersuussuteqassaaq.

Ataatsimeersuarnerup ulluisa pingajuanni ullaap-tungaani tunniulluinnarnermut kuisinnermullu tunngasumik oqalugiaateqassaaq; aammattaaq erseqqissarneqssaaq Bibelimik atuaqqissaarnissamut piffissaqarluarumalluta pilliuteqartariaqarnerput. Oqalugiaat „Jehovap qamutaa qilammiittoq ingerlavoq“-mik qulequtaqartoq ualikkut oqalugiaatit pissanganartortaraat. Aammattaaq sakkortuumik eqqaasinneqassaagut inunnut eqqunngitsumik upperisarsiornermit tappiillisinneqarsimasunut qanoq annertutigisumik uagut kristumiutut akisussaaffeqarnitsinnik, akisussaaffiullu tamatuma qanoq naammassiniarnissaanut tunngasunik atoriaannaasunik siunnersuuteqassaaq.

Aammattaaq ataatsimeersuarnerup ulluisa naggataanni ullaa-tungaani najuuteqqunaqaatit kristumiuuneraqatigiinnik palaseqatigiivinillu avoqqaarinninneq sakkortooq tusarniassagakku. Taava isiginnaagassiaqassaaq Jehup Jonadabillu inuunerannut tunngasumik. Aammattaaq ualikkut tamanut ammasumik oqalugiaat, „Oqaatsit minguitsut ataasiussutigisigik“, ilinnut tusaqqunaqaaq.

Danmarkimi ataatsimeersuarnerit pissapput Århusip arsaattarfissuani (5.-8. aamma 12.-15. juli). Brøndby-Halimi (21.-24. aamma 26.-29. juli). Tórshavnimi (Savalimmiut) (2.-5. augusti). Aamma ataatsimeersuarneqassaq Nuummi (Kalaallit Nunaat) (5.-8. augusti). Tikilluaqqungaarpatsigit.