Allanngornissap pisariaqassusia paasivaat
PINERLUNNIARTARTUT nakuuserniartartullu inooriaatsiminnik allanngortitsinissaat ajornanngila? Taamaappallu, qanoq ilillutik? Saulusip Tarsusimiup kristumiunit malersuisuusimagaluarluni kristumiunngorsimasup inuunerminik allannguisimaneranit inuunermi annertuumik allannguisinnaaneq uppernarsarneqarpoq. Taanna kingorna apustili Paulusitut ilisimaneqalerpoq. (Galâsiamiut 1:13, 14; 1 Timûtiuse 1:13) Kenyami inoqarpoq taamatut inuunerminnik allannguisimasunik.
□ Angut inuusuttoq, pinerlunniartartunut Nairobip eqqaaniittunut ilaasortaasoq, Kenyap kippasinnerusortaanut aallartinneqarsimavoq aningaaserivinnik ujajaanissamut periarfissanik misissuiartortitaalluni. Angummi utoqqasaami inisimaffissarsivoq, taassumalu illuani Vågn op!-ip normui qanganisat qaleriiaat nassaarai. Angutip inuusuttup taassuma atuagassiat tamakku atuarlugit pikkusungaarami aningaaserivimmi ujajaanissamut tunngasut tamaasa puiorluinnarpai. Tamaasa atuareeramigit angut utoqqasaaq aperaa suli allanik peqarsoralugu, angutillu utoqqasaap akivaa ullut 14-ikkaarlugit allakkerisarfikkoorlugit pisarnerarlugit. Tamanna aallarnerfigalugu angutip inuusuttup inisimaffini ullut tamaasa kimigiiserfigisalerpaa allakkerisarfimmut takuniaaqqullugu atuagassianik tikittoqarsimaqinammat. Aammattaaq angut inuusuttoq aalajangerpoq inooriasipiluni taamaatinniarlugu tamatumunngalu taarsiullugu atuagassiani ilikkakkani maleruarlugit inuulerniarluni. Jehovamut nalunaajaasunngorusuppoq. Allaallu sanilini oqaluttuuppai maanna Jehovap Nalunaajaasuinut ilaalerluni. Kingorna specialpioneri tamaani angalaartilluni tupaallappoq angut taanna nalunaajaasuunerartoq naapikkamiuk. Angut inuusuttoq atuaqqissaaqatigineqartalerpoq, siumukarlualerluni, ullumikkullu pioneriulluni. Bibelimik eqqorluartumik ilisimassuteqalernerata inooriaatsimi allanngortinnissaata pisariaqassusianik takunnissinnaatilersissimavaa.
□ Aammattaaq Argentinamiu misigisaqarsimavoq nakuusertuunerminik taamaatitsissutigisaminik. Nuliani Jehovamut nalunaajaasuusoq ukiuni 20-ni atugarliortitarisimavaa, tusaamaneqarporlu illumik saavani assaasimasoq isuanullu sanningasulimmik kappussisimalluni kukkukuujutiminik tillittoq toqukkumallugu tassungalu iliumallugu. Saniliisa tamarmik angut taanna ajortoq qanillinaveersaartarpaat.
Ullulli ilaanni ilagiinnik nakkutilliisup pulaarpaa Bibelimillu atuaqqissaaqatiginissaanik neqeroorfigalugu. Tupaallaatigisaanik angut akivoq Bibelimik atuaqqissaarusulluarsinnaalluni, atuagassiaararlu nuname inûneĸ nâgssáungitsumik nuánârutigiuk! atorlugu qatanngutitta atuaqatigilerpaa. Angut Bibelimik ilisimasaqassutsikkut anersaakkullu paasisaqassutsikkut siuariartorpoq — maannalu ataatsimiinnernut tamanut najuuttarpoq. Ataatsimiittarnerit qatanngutinillu ataatsimooqateqartarnini nuannaarutigingaaramigit ima oqarpoq: „Taamatut inoorusuppunga.“
Angutip allanngornera malunnangaarmat saniliisa nulia aperisarpaat kimit nakorsartissimanersoq. Oqaluttuarimmagu Jehovap Nalunaajaasuinik Bibelimik atuaqqissaaqateqartalernini pissutigalugu allanngorsimasoq saniliata tupaallaatigingaaramiuk bibelimik piumavoq. Saniliat alla atuagassiaatitsinnik pisartagaqalerpoq.
Bibelimik eqqorluartumik ilisimassuteqalernertik ikiortigalugu angutit taakkua paasivaat inooriaatsiminnik allannguinissartik qanoq pisariaqartigisoq. Inuittaaq allat tamatumannga ikiorneqarsinnaapput maannakkut inuunerminnik siunertaqarnerusumik inuuneqalernissaminnut, siunissamilu naassaanngitsumik inuunissamik neriugisaqalernissaminnut — Guutip silarsuassaani nuanningaartumi. — Juánase 17:3. (wD 1/10 89)