Aniguinissaminnut ukiunilu tuusintini naalagaaffimmut isernissaminnut aaqqissuussaasut
’Imaassapput: savaatit ataatsit, paarsisoq ataaseq.’ — Juánase 10:16.
1. Ukiut tuusintit Guutip naassaanngitsuusup sutut isigai?
JEHOVA piffissamik paasinnittaatsimut aallaaviuvoq. Taassumunnga, Guutimut toqujuitsumut naassaanngitsumik ittuinnartumut, ukiut tuusintit ullortut ataatsitut qaangiutipallattutut imaluunniit unnuarsiornertut ataatsitut ipput. — Tussiaat 90:4; 2 Pîtruse 3:8.
2. Inuiaat tamarmik pilluaqqunarsisinnissaannut qanoq sivisutigisumik Guuti piffissaliisimava?
2 Guuti ullormik ataatsimik assersuutaasumik ukiunik tuusintinik sivisussusilimmik nunami kinguaariinnik tamanik pilluaqqunarsisitsivissaminik aalajangersaasimavoq. (1 Moses 12:3; 22:17, 18; apustilit suliáinik agdlagkat 17:31) Maannakkut toqungasut sulilu inuusut pilluaqqunarsisinneqartussanut taakkununnga ilaapput. Qanoq ililluni Guuti taamaaliorniarpa? Naalagaaffini assersuutaasumik nuliami ’kinguaatigut’, Jesus Kristusikkoortoq, ikiortigalugu. — 1 Moses 3:15.
3. (a) Qanoq ilillugu arnap Guutip piata kinguaavata kimmia aserorterneqarpa, qanorlu ilillugu mamitinneqarpa? (b) Ukiuni tuusintini naalagaaffiup naalernerani Jesus Kristusip pulateriaarsuk qanoq pissavaa?
3 Arnap Guutip piata (qilammi peqatigiissortaasa) kinguaavata kimmia assersuutaasoq ukiumi 33-mi Jesus nalunaajaasutut toqutaammat ullunilu pingasuni ilivermiimmat aserorneqarpoq. Ullulli pingajuanni Guutip ajugaqanngitsup, Inuunermik Tunisisorsuup, ernermi ilumoortup anersaat silarsuaannut inuunermut toqujuitsumut makitinneratigut ikeq tamanna mamitippaa. (1 Pîtruse 3:18) Jesus toqunngisaannassagami ukiuni tuusintini inuiaat kunngiuffigisinnaassavai, tamatumalu kingorna pulateriaarsuup assersuutaasup niaqua „aserortissavaa“ pulateriaarsuk suujunnaarsilluinnarlugu. Inuiannut nutaanngorsagaasimasunut aalajaatsunut pilluaqqussutissaq ila angeq!
4. Guuti innuttami akornanni qanoq suliniartitsisimava?
4 Guutimik nalusut ulluisa 1914-mi naaneranni „pissutsit aaqqissuussaanerata naggatissaat“ aallartimmalli nunarsuarmi tamarmi Jehovap innuttaasa akornanni aaqqissuussiniarnermik suliniartoqarsimaqaaq. (Matîuse 24:3; Lúkarse 21:24) Aaqqissuussiniarneq tamanna Aaqqissuussisorsuup, Jehova Guutip, piumasaa naapertorlugu taassumalu siulersuineratigut suliarineqarpoq. 1914-imi arnaq Jehovap pia, qilammi peqatigiissortai nuliaatut ittut, naalagaaffimmik Jesus Kristusikkoortumik neriorsuutigisaasumik ernivoq, tamannalu Bibelimi neriorsuutigineqartut eqquunnerannit uppernarsarneqarpoq.
5. sarĸúmersitat 12:5-imi ernineq suna siulittuutigineqarpa, qangalu siullermeerluni The Watch Tower-imi Vagt-Taarnet-imilu nassuiarneqarpa?
5 Taamaalillutik oqaatsit sarĸúmersitat 12:5-imiittut alutornangaartumik eqquupput: ’Ernivoq ernertaarluni, taassuma saviusumik ilitsersuuteqarluni inuiaqatigiit tamaasa paarissagai. Qitornaalu Guutimut issiavissaarsuanullu aallarunneqarpoq.’ Jehovap naalagaaffiata, arnap Guutip piata ernertaavatut allaatigineqartup, erniarineqarnera nassuiarneqaqqaarpoq The Watch Tower-imi 1. martsi 1925-imi (Vagt-Tårnet-imi, maji 1925-imi). 1914-imi naalagaaffiup Messiasikkoortup qilammi erniarineqarnera aamma ernineq nunami 1919-imi pisoq, tassa „inuiaat“ Zionip qitornaasa erniarineqarnerat, assigiinngitsuupput marluk. — Jesaja 66:7, 8.
6. (a) Naalagaaffiup erniuneranut atatillugu suliassaq suliarineqartussaq suna Jesusip siulittuutigisimavaa? (b) Taamaaliussagunik Jehovap innuttaasa suna pisariaqartissimavaat, qanorlu inerneqarsimava.
6 Jehovap naalagaaffiata, qilammi nunamilu kisimi naalagaasussaviunerminik tamanut aalajangiussisitsissutissaata, pilersimanera taamani nutaarsiassaavoq nunarsuarmi tamarmi oqaluussissutigineqartariaqartoq! Taamani piffissanngorsimavoq Jesusip takussaanngitsumik „najuunnissaminut“ nalunaaqqutaasut pillugit oqaasiisa eqquunnissaannut: „Naalagaaffimmik tusagassaq nuannersoq tamanna nunarsuarmi inuit najugarisaanni tamarsuarmi inuiaat tamarmik nalujunnaarutissaannik oqaluussissutigineqassaaq; taavalu naggatissaq nalliutissaaq.“ (Mattæus 24:3, 14, NV) Ataasiussuseqartumik, isumaqatigiissumik silarsuaq tamakkerlugu oqaluussinermik suliaqassagunik Jehovap peqatigiissortaasa takussaasortai siunertamut tamatumunnga naleqquttumik iluarsaanneqartariaqarpoq — aap, aaqqissuunneqartariaqarpoq. Tamanna Watch Tower Bible and Tract Society sinnerlugu taamani tassani præsidentiusup J. F. Rutherfordip paasivaa. Taamaattumik sorsunnersuup siulliup kingorna 1919-imi suliniarluarluni Aaqqissuussisullu qullersaata, Jehova Guutip, siulersuinissaanik qinulluni Peqatigiiffiup kiffaqatai ilumoortut inuiattut makiteqqissitaasimasutut ittut aaqqissuunneqalerput. Naak fascistinit, Hitlerip nazisteqataanit Katuullit Mumisitsiniaqatigiit-nillu nuanniitsumik akerlilersorneqaraluarlutik Jehovap Nalunaajaasui silarsuarmi akeqqersimasunut illuatungiliullutik isumaqatigiillutik sulinialerput.
7. (a) Annikilliornartumi angisuumi aniguinissartik neriuutigissagunikku Jehovap innuttai susariaqarpat? (b) Nunarsuaq tamakkerlugu ulersuaqarnerani Noa ilaqutaalu qanoq ilillutik aniguippat, kikkunnullu assersuutaappat?
7 Jehovap Nalunaajaasui kisimik, tassa peqatigiiffik ataasiussuseqartoq tanitaasunik sinneruttunik ’amerlangaartunillu’ Aaqqissuussisut qullersaannit sernissugaanik ilaasortaqartoq, silarsuup eqqartuunneqarsimasup matuma Satan Diaavulumit naalagaaffigineqartup naggatissaani qanittukkut pisussami aniguinissaminnik Bibelimik tunngaveqartumik neriugisaqarput. (sarĸúmersitat 7:9-17; 2 Korintumiut 4:4) Tassaassapput Jesus Kristusip eqqartugai ’uinillit’ inuiaat oqaluttuarisaaneranni annikilliornartut annersaanni annatsitaajumaartut. Jesus oqarpoq saqqummersitaaguni silarsuaq Noap ulluinisut ikkumaartoq. Uinillit arfineq-pingasuinnaat nunarsuaq tamakkerlugu ulersuaqarnerani umiarsuarmi, ukiorpassuarni aaqqissuussamik suliniarnikkut sananeqartariaqarsimasumi, aniguipput. Ilaqutariittut ataasiussuseqartutut aniguipput. (Matîuse 24:22, 37-39; Lúkarse 17:26-30) Noap nulia Kristusip nuliassaanut assersuutaavoq, ernerilu ukuai ilanngullugit Jesusip ’savaataanut allanut’ ullumikkut amerlangaartunngorsimasunut naggataatigut qassinngorumaarnissaat nalusatsinnut assersuutaapput. (Juánase 10:16) ’Amerlangaartut’ taakku aniguillutik ukiuni tuusintini naalagaaffimmut Noamit annermit, Jesus Kristusimit, kunngiuffigineqartumut isissagunik tanitaasut sinneruttut, aamma ’qinikkanik’ taaneqartartut, ilagalugit aaqqissuussanertik attattuartariaqarpaat. Qinikkat taakku pillugit ’annikilliornartoq angisooq’ naalisinneqassaaq. — Matîuse 24:21, 22.
Ukiuni tuusintini naalagaaffimmi inuunermut aniguigit
8. Najuunnissaminut nalunaaqqutaasussanik siulittuunni assersuummik sumik Jesusip naggaserpaa, assersuusiallu tamatuma paasinissaanut pingaaruteqartumik junip ulluisa aallaqqaataanni 1935-mi susoqarpa?
8 Iivangkiiliu Mattæusip allagaa naapertorlugu Jesusip najuunnissaminut nalunaaqqutaasussanik siulittuinini assersuusiorluni naggaserpaa, tassa savanik savaasanillu assersuusiamik. Assersuusiaq tamanna ullumikkut, pissutsit aaqqissuussaanerata naggatissaani Guutimik nalusut ulluisa 1914-imi naaneranni aallartittumi, eqquuppoq. (Matîuse 25:31-46) 1935-imi junip ulluisa aallaqqaataanni arfininngornermi maluginiarnartumik pisoqarpoq. Ullormi tamatumani Washington, D. C.-mi Jehovap Nalunaajaasuisa ataatsimeersuarneranni oqalugiartoqarpoq, ersersillugu Jesusip assersuusiaani ’savat’ tassaasut ’amerlangaartut.’ Jesus Kristus aqqutigalugu Jehova Guutimut tunniulluinnarsimanerminnut nalunaaqutaasumik 840-t kuisipput. Taakkua amerlanersaasa taamaaliornerat J. F. Rutherfordip sarĸúmersitat 7:9-17 pillugu oqalugiaataanut qisuariarasuarneruvoq. Kissaatigaat savanik paarsisuviup savaataanut allanut amerlangaartunut ilaalernissartik, taamaalillutillu annikilliornartumi angisuumi kunngip paarsisuusup Jesus Kristusip ukiuni tuusintini naalagaaffiani inuunermut aniguinissamut periarfissaqalernissartik. Taava nunami paratiisiusumi inuuneq naassaanngitsoq angusinnaalissavaat. — Matîuse 25:46; Lúkarse 23:43.
9. Sooq savat ’naalagaaffimmik imminnut piareersimasumik’ kingornussinissaminnik neqeroorfigineqarpat, Kunngillu qatanngutaanut ajunngitsuliornissaminnut qanoq ilillutik pitsaasunik periarfissaqarpat?
9 Sooq savat assersuutaasut taakku ’naalagaaffimmik silarsuup tunngavileqqaarneranit imminnut piareersimasumik kingornussinissaminnik’ neqeroorfigineqarpat? Kunngip oqaluttuuppai tamatumunnga pissutaasoq tassaasoq ’qatanngutiminut’, taamaalillutillu imminut, ajunngitsuliorsimanerat. ’Qatanngutinik’ oqarami Kunngip pivai anersaakkut qatanngutimi ilaat aaqqissuussaanerup matuma naggatissaata nalaani suli nunamiittut. Paarsisup kunngiusup, Jesus Kristusip, qatanngutai ilagalugit tassaalersimagamik savaatit ataatsit, savat assersuutaasut taakku sinneruttunik taakkuninnga sapinngisamik qanimut attaviginninniarput, taamaattumillu taakkununnga ajunngitsuliorsinnaanissaminnut pitsaanerpaanik periarfissaqarput. Naggatissallu nalliutinnginnerani naalagaaffimmik pilersinneqarsimasumik tamatuminnga silarsuaq tamakkerlugu oqaluussissutiginninnermi Jesusip qatanngutai taakku atortussatiguttaaq ikiorniarpaat. Savat assersuutaasut sinneruttut ilagalugit aaqqissuussaanerminnik attassiuaannarnertik taamaalillutillu paarsisumit ataatsimit paarineqarlutik ataatsimut savaataanertik immikkut pisinnaatitaaffittut isigaat.
10. Savat ’naalagaaffimmik silarsuup tunngavileqqaarneranit imminnut piareersimasumik’ kingornussinissaat qanoq paasisariaqarpa?
10 Naalagaaffimmik imminnut piareersimatitaasumik kingornussinissamik neqeroorfigineqarmata imaanngilaq ukiuni tuusintini Jesus Kristusimut taassumalu qatanngutaanut qilammi naalakkersueqataassasut. Ukiuni tuusintini naalagaaffik aallartippat Naalagaaffiup naalagaaffigisaa, nuna, savat kingornutissavaat. Adamip Evallu kinguaarimmatik nuna naalagaaffiup tamatuma Kristusikkoortup pigiligassaa inuit utertinneqarnissaminnut naleqquttut silarsuaat tunngavilerneqaqqaarmalli taakkununnga pissamaartitaasimavoq. Aammattaaq Guutip naalagaaffiata nunami pigisai savat kingornutissavaat, tassaalissagamik Kunngip nunami qitornai Kunngilu tassaalissammat taakkua ’naassaanngitsumik Ataataat’. — Jesaja 9:6, 7.
11. Qanoq ilillutik savat nalunaarpaat Naalagaaffimmik tapersersuisuullutik, tamannalu pilluaqqusaanernik sunik nassataqarpa?
11 Savaasat assersuutaasut assiginagit savat assersuutaasut paatsuugassaanngitsumik nalunaarpaat Naalagaaffimmik tapersersuisuullutik. Qanoq ilillutik? Oqaasiinnarmikkuunngitsoq, aammattaarli suliamikkut. Kunngi takussaanngitsuummat qilammiillunilu taassumunnga namminermut ajunngitsuliornermikkut naalagaaffia tapersersorsinnaanngilaat. Taamaattumik taassuma anersaakkut qatanngutai suli nunamiittut ajunngitsuliorfigaat. Naak savat taamaaliornertik pissutigalugu savaasanit assersuutaasunit uumissorneqarlutillu, akerlilersorneqarlutillu malersorneqaraluartut Kunngip oqarfigai tassaasut ’Ataatami pilluaqqusai’.
12. Savanut allanut ilaasut aniguisut kikkunnik tikilluaqqusisinnaassappat, tamatumunngalu atatillugu ’sinneruttut’ ilaat qanoq ilimasuppat?
12 Savat assersuutaasut amerlangaartut taakku Kunngip anersaakkut qatanngutaanut ajunngitsuliortut immikkut pisinnaatitaaffimmik nuannersumik, tassa ukiuni tuusintini naalagaaffimmi inuunermut aniguinermik, pilluaqqusaassapput. Taamanikkussamut toqungasut iliverni eqqaassutissaasuniittut makititaalerpata makittunik inuunermut tikilluaqquseqataassapput. (Juánase 5:28, 29; 11:23-25) Makititaasunut ilaassapput upperluartut pruffiitillu aalajaatsut qanga inuusimasut ’ajunnginnerusumik [immaqa siusinnerusumik] makititaaffissaqalerumallutik’ Jehovap kisimi naalagaasussaviuneranut atatillugu naalliullutillu ilungersorsimaqisut. (Eprîarit 11:35) Angutinut arnanullu uppertunut, ilai Eprîarinut agdlagkat, kapitali 11-mi eqqartorneqartunut, Johannes Kuisisoq ilaavoq. (Matîuse 11:11) Tanitanut sinneruttunut ilaasut ilaat — annikilliornartumi angisuumi aniguereerunik — nunamiilaarallarnissaminnik neriugisaqarput, piffissamilu nunamiikkallarfimminni upperluartut ukiumi 33-mi piinsip ullua sioqqullugu toqusimasut makititaappata tikilluaqqusinnaassavaat. Immikkut pisinnaatitaaffik tamanna tanitat angusinnaassavaat?
13. Sooq ’sinneruttut’ nunami makittunik tikilluaqqusinissaat isumaginninnissaallu pinngitsoorani pisariaqanngila?
13 Pinngitsoorani taamaattariaqanngilaq. Amerlangaartut annikilliornartumi angisuumi annattussat makittunik isumaginninnissaminnut ’nunamillu nutaamik’ ’qilaat nutaat’ ataanittumik ilisarititsinissaminnut naammassapput. (2 Pîtruse 3:13) Amerlangaartut taakku maannangaaq suliamut tamatumunnga aaqqissuunneqarput. Ullumikkut Jesusip anersaakkut qatanngutai nunamiittut sinneruttut 9000-init ikinnerugamik, annikilliornartumi angisuumi aniguisortassai makititsinissaq sioqqullugu piareersarluni suliap isumaginissaanut ikippallaassapput. (Hesekiel 39:8-16) Tamatumunnga atatillugu amerlangaartut, ullumikkut millionilikkuutaajusut, annertuumik suliaqarsinnaassapput, qularnanngitsumillu taakkuussapput immikkut pisinnaatitaaffimmik tamatuminnga pisussat.
14. (a) Amerlangaartut akornanni amerlasuut sumik ilinniartinneqarpat, aamma, sooq taakkunannga amerlasuut akisussaassuseqarfiusunik isumaginnittariaqarpat? (b) Ungasinngitsukkut sunik pisoqassava, savallu allat sumik suliassaqassappat?
14 Amerlangaartut taakku ilarpassui ilagiit silarsuarlu tamakkerlugu suliniarneq Guutip peqatigiissortaasa aallartissimasaat aqqutigalugit suliassanik akisussaassuseqarfiusunik isumaginninnissaminnut maannangaaq ilinniartinneqarput. Qiimmaallannaqaaq takullugit angutit anersaakkut inersimalluartut amerlangaartuneersut amerlasuut peqatigiinni aaqqissuussaasuni Jehovap ullumikkut nunami atugaani akisussaaffinnik annerusunik isumaginnittut. Tanitat suli inuusut maanna utoqqalipput taamaattumillu taama annertutigisunik suliaqarsinnaajunnaarlutik. Utoqqaanertat ilagiinnilu kiffartuuteqartut anersaakkut piukkunnarluartut savanut allanut ilaasut asannittumik ikiuinerat aaqqissuussaasoq Kunngip qatanngutaasa nuannaarutigeqaat. Babylon angisooq qanittukkut nunamit peerneqassaaq. Taava soorlu sarĸúmersitat 19:1-8-mi paasinartoq, Savaaqqap nuliassaqatigiivisalu, ataatsimut 144.000-iusut, katinnissaat qilammi naammassineqassaaq. Taavalu Kunngimut sinniisuusussat Jehovallu nersornaatissaanut nunarsuarmik paratiisinngortitsiniarluni suliamik annertuumik suliaqartussat tassaassapput savat allat, tassaasut ’nuna nutaaq’ ’qilaat nutaat’-nit naalagaaffigineqartoq. — Jesaja 65:17; naleqqiuguk Jesaja 61:4-6.
15. Ukiuni tuusintini naalagaaffiup naalakkersuinerani amerlangaartut suna qilanaaraat?
15 Kristusip ukiuni tuusintini naalakkersuinerani toqungasut utertitaasimasut makititaareerpata amerlangaartut aniguisimasut angingaartunik ataqqinaataangaartunillu immikkut pisinnaatitaaffeqartinneqassapput. Taamanikkussamut tassaalissapput Kunngip erneri paniilu. Ernerit taakku ilaat naalagarsuartut naleqartitaalernissaminnut periarfissaqartinneqassapput, soorlu kunngi Davidip erneri naalagarsuaasimasut assigiinngitsunik suliassaqartitaallutik.a Tussiaat 45-mik, Jehovap ’kunngiutitaa’ tanitaq pillugu erinniugaasimasumik, tamatuma eqqaasippaatigut.
16. Tussiaat 45-mi kinarpiaq pineqarpa, sunalu tamatumunnga uppernarsaatissaava?
16 Kunngi kinarpiaruna Tussiaat 45-mi eqqarsaatigineqartoq? Jesus Kristus. Taannaana eqqarsaatigalugu Eprîarinut agdlagkat 1:9-mi Tussiaat 45:8 issuarneqartoq, ima allassimasoq: „Eqqortumik iliorneq nuannaraat eqqunngitsuliornerlu [guutiitsuunerlu, NV] uumigalugu, tamanna pillugu [Jehovap], Guutivit, tanissimavaatit uuliamik nuannaarnerup pianik, naligisannit salliutillutit.“ Tassa tassaavoq Jesus Kristus naalannarsisitaasimasoq Tussiaat 45:17-mi ima oqaatigineqartoq: „Ernitit kunnginngorumaarput illit siuaasatillu kingoraarlusi; naalagarsuanngortissavatit nunarsuarmi tamarmi.“
17. Suna kikkullu Jesus Kristusip soqutigineruai?
17 Jesusip eqqortumik iliorluni nunami inuusimanini pinnagu kunngitut naalakkersuisutut siunissani soqutigineruaa. Soorunami siornagut inuusimanini puiunngilaa, ingammillu siuaasani nunamiusut Abrahamip kinguaava ikiortigalugu kinguaariit tamarmik pilluaqqusaanissaannik Jehovamit neriorsorneqartunut ilaasut puiunngilai. Maannakkorpiarli soqutiginerpaavai Jehova Guutip siunertaa naapertorlugu qanittukkut pisussat. Nunami siuaasamininngarnit ernimi nunamiusut ilaat naalagarsuartut imminut kiffartornissaminnut piukkunnarsarsimasut soqutiginerussavai.
18. Bibelini nutsikkani assigiinngitsuni qanoq ililluni erseqqissarneqarpa Tussiaat 45:17 naapertorlugu Jesusip ernini naalagarsuaasut siuaasaminit nunamiusunit soqutiginerugai?
18 Siuaasamininngarnit erniminik naalagarsuaasunik soqutiginninnerunissaa bibelini nutsikkani assigiinngitsuni erseqqissarneqartarpoq. Ilaasa Tussiaat 45:17 ima nutsersimavaat: „Ernivit siuaasatit kingoraarpaat, nunami sumi tamaani naalagarsuaatikkit!“ (Da. aut.) „Ernivit siuaasatit kingoraassavaat, nunarsuaq tamakkerlugu naalagarsuanngortissavatit.“ (Davids Salmer) „Ernitit siuaasavit inaanniissapput, nunami tamarmi naalagarsuanngortissavatit.“ — Biblen, Jac. Chr. Lindberg.
19. Angutit amerlangaartuneersut ullumikkut ilagiinni akisussaaffinnik sunik isumaginnippat, ukiunilu tuusintini naalakkersuinermini Jesus Kristusip taakku immaqa sunngortissavai?
19 Naalagarsuanngortussat nuannaarutigeqisatsinnik akornatsinniipput. Savat allat paarsisup eqqortup, Jesus Kristusip, nipaanut naalattut akornanniipput. Taamaassimavoq ingammik 1935-p kingorna, Washington D. C.-mi Jehovap Nalunaajaasuisa ataatsimeersuarneranni sarĸúmersitat 7:9-17 nassuiarneqarmalli. Ullumikkut amerlangaartut ilaat tuusintilikkuutaat Jehovap Nalunaajaasuisa ilagiissaanni 57.670-init amerlanerusuni nunarsuaq kaajallallugu nunani 212-iniittuni utoqqaanertatut nakkutilliisutulluunniit kiffartorput. Jesusip anersaakkut qatanngutai suli nunamiittut ilagalugit aaqqissuussaanerminnik attassiinnarnermikkut, angutit taakku qilanaarisinnaavaat kunngip Jesus Kristusip ukiuni tuusintini nunamik nutaamik neriorsuutigineqartumik naalakkersuinerani taassuma ernerisut nunamiusutut tamakkiisumik isigineqalernissartik. (2 Pîtruse 3:13) Taamaattuullutik immaqa nunami nutaami naalagarsuartut kiffartortussatut toqqarneqarsinnaassapput.
20. (a) Kunngip nunami naalagarsuanngortitani qanoq isigissavai? (b) Amerlangaartut kikkunnik tikilluaqqusissappat, makittullu sumik periarfissaqassappat?
20 Kunngi Jesus Kristusip naalagarsuartut toqqagaarlaat taamaattut nuannaarluni iluaralugit akuerissavai, soorlu ullumikkut savat allat akornanni angutit aalajaatsut Jehovap Nalunaajaasuisa ilagiissaanni nakkutilliisussatut akuerisarini. Savanut allanut amerlangaartunut ilaasut tamarmik, angutit arnallu, immikkut pisinnaatitaaffik pissanganartoq pissavaat, tassa toqungagaluartut Jesusip nipaanik tusarlutik toqusunit makittut tikilluaqqunissaat. Nunarsuarmi minguiagaasimasumi, tamarmi paratiisinngortinneqarumaartumi, naammalluinnartuulluni naassaanngitsumik inuuneq angusinnaalissavaat. (Juánase 5:28, 29) Makititaasunut tamakkununnga ilaassapput Jesus Kristusip siuaasai utertitaasimasut, upperluartut toqu tikillugu Jehova Guutimut tunniusimanerminnik ersersitsisimasut, ’ajunnginnerusumik makititaaqataanissartik’ neriuutigigamikku. (Eprîarit 11:35) Kisianni utertitsissummik akiliisup Jesus Kristusip ukiuni tuusintini naalakkersuinissaani inuunermut naammalluinnartumut makinneq aallaqqaataannaavoq. Ukiuni tuusintini naalakkersuinerup naggataata tungaani inuiaat utertitaasimasut naggataarutaasumik misilinneqarnerminni Jehova Guutimit siulersorneqarlutik aaqqissuussaanerminnik attassilluinnartuaannarunik paasinarsisissavaat Paratiisimi naassaanngitsumik inuunermut naleqquttuullutik, taamaalillutillu tassaalissallutik Jehovap peqatigiissortaasa nunamiittortaat. — Matîuse 25:31-46; sarĸúmersitat 20:1-21:1. (wD 1/9 89)
[Quppernerup ataani ilanngussaq]
a Naleqqiuguk Ny Verden-nutsigaq-p tuluttuuani Samuelimik allakkat aappaat 8:18 pillugu ataani ilanngussaq.
Qanoq akissavit?
□ Inuiannik pilluaqqunarsisitsinissaminut Jehova qanoq sivisutigisumik piffissaliisimava?
□ Annikilliornartumi angisuumi aniguisinnaassagutta sulinerput qanoq ittuusariaqarpa?
□ Savat ’naalagaaffimmik silarsuup tunngavileqqaarneranit imminnut piareersimasumik kingornussinissaat’ qanoq paasisariaqarpa?
□ Ukiuni tuusintini naalakkersuinermi amerlangaartut ilaat immaqa sunik suliassaqartinneqassappat?