Qujamasunnissamut pissutissat allat
ITSAQ Israelikkut Pinngortitsisumut qujamasunnissaminnut inuiannit allanit tamanit pissutissaqarnerusimapput. Sooq?
Alianaatsunut kusanarluinnartunullu Guutip pinngortissimasaanut tamanut qujamasuutiginninnissaminnut Israelikkut inuttut allatulli pissutissaqarput. Taakkuli Jehovamut qujamasuffiginninnissaminnut aamma allanik pissutissaqarput, tassami taassuma innuttamisut toqqarsimavai immikkut ittumik isumassugaralugit. (Aamorse 3:1, 2) Israelikkut qujamasunnissaannut pissutissaalluartut eqqarsaatigeqqissaariakkit.
Toqumit annaanneqartut
Ukiumi 1513-imi u.n.a.s. nisanip ulluisa 14-erereeraa unnuakkut angajoqqaat Israelikkuusut qujamasunnissaminnut annertuumik pissutissaqarput! Unnuami tamatumani pingaaruteqartumi Guutip inngiliata ’Ægyptenimi angajulliliaasut tamaasa toqorarpai, inunnilu nersutaatinilu allaat’ (NV), Israelikkuusulli illui qaangiinnarlugit. Tamatumani Israelikkut Guutip peqqussutaanut naalallutik poorskimi pilliutimik aavannik matserfitik tanissimavaat. Unnuap nipaannera ’Ægyptenimi kappialanersuarmit’ kipitinneqarpoq ’illoqanngimmammi toqusortaqanngitsumik’. Israelikkuusulli illuini tamani angajulliliat ajoquserneqanngillat. — 2 Môrsase 12:12, 21-24, 30.
Tamatuma kinguninnguagut Israelikkut uummataat qujamasunnermik ulikkaarsimassapput tupinnartuliornikkut Jehova akuliummat innuttanilu annaallugit. Ægyptenip kunngiata, Faraop, sakkutuuinit malersorsuataarneqartillutik Immap Aappalaartup sinaanullu pillutik ingerlariaqqiffissaaruttutut ipput. Qanorli pisoqarpa? Israelikkut siullermik takuaat pujoq napasoq siulersortigisartik kingunerminnut pisoq, taamaalillunilu malersortiminnik arriillisitsingaatsiaqaluni. Taava takuaat Mosesip assani immap tungaanut isaakkaa, tupigusullutillu isiginnaarsinnaasimavaat Guutip qanoq ililluni unnuaq tamaat assarnersikkaa imaq avissaartillugu naqqalu panertillugu. Guutip qimaaffissaliaatigut imminnut ammarsimasaatigut ingerlapallannissaminnut Israelikkut kajumissaaqattaarnissaat pisariaqarpallaarsimassagunanngilaq.
Maannali navianartumik allamik pisoqalerpoq! Immakkut avissaarsimasukkut Ægyptenimiut ingerlalerput Israelikkut angunissaat qularutiginngivillugu. Takusiulli! Ægyptenimiut suli ingerlavimmik qeqqinnaaniitillugit, immap avissaarsimasup akornaniitillugit, qamutaasa sorsuutaasut assakaasui katagalerput, erniinnarlu paatsiveerunnersuaqalerpoq. Maanna Israelikkut immap illua-tungaani isumannaatsumiilermata Jehovap Moses peqquaa assani isaateqqeqqullugu, ’imarlu ullaassap tungaagut sarfarfigisartakkaminut uterpoq’. Tamanna qanoq kinguneqarpa? Faraop makitasuup sorsuttartui sorsullaqqissut ataatsimilluunniit annattoqanngillat, naalagarluunniit ajorumaatsoq taanna annanngilaq. (2 Môrsase 14:19-28; Tussiaat 136:15) Israelikkut aniguisitaagamik Jehovamut qanoq qujamasussimatigissasut takorloorsinnaaviuk?
Guutip sorsoriaasii tupinnartut
Ægyptenimit aniguisitaanertik aammalu Imaq Aappalaartukkut ikaarnertik puiunaatsoq Israelikkut qujamasuutigigaluarlugu taamaattoq nunamut neriorsuutigisaasumut apuutinnginnerminni tamaviaarnartorpassuarnik nalaataqartartussaasimapput. Puilasuitsumili ukiuni 40-ni ingerlaarnerminni misigisarpassuatik Jehovamut qujamasunnerulissutigisimasariaqaraluarpaat.
Israelikkut kiisami Jordanip Kuussua ikaarlugulu, nunamullu Guutip neriorsuutigisimasaanut pillutillu, Jehovap sorsoriaasianik tupinnartumik takusaqaqqipput. Qanoq ilillutik? Aap, tamanna pivoq Jerikop, Kana’animi illoqarfiup Israelikkut tikitaata siulliup, tigusarineqarneragut piuneerunneqarneragullu tupinnartukkut. (Jôrsua, kapitali 6.) Immikkorluinnaq ittumik siulersorteqarnissaannik Guutip peqqusimavai. Angerutsip illerfia akiarlugu Jeriko kaaveqquaa. Ulluni arfinilinni malittuinnarni illoqarfik kaajallattarpaat, ullut tamaasa ataasiarlutik. Ullut arfineq-aappassaanni arfineq-marloriarlutik illoqarfik kaajallappaat, palasillu qarlortaassuarnik siggartullu ’inuit nillerput nipersuarmik, taava ungalorsuaq samunga nakkarpoq’! (Jôrsua 6 Versi 20) Rahabip illua qarmarlu attavigisaa kisimik uppinngillat, napaannarput. Jerikop qarmarsui tiguarneqarsinnaanngitsutut ikkaluit uppipput, Josua sakkutuuilu piserianngitsulluunniit! Israelikkut Jerikop eqqaani misigisaat Guutimut qujamasuffiginninnissaannut aammattaaq pissutissaalluarpoq.
Pisimasumi allami Jehovap sorsoriaatsimi tupinnartut ilaat takuteqqippaa. Gibeonimiut Israelikkunnik eqqissivissioqatiginnimmata Amorikkut kunngiisa tallimat Gibeonimiut sorsuffigissallugit nalunaarfigaat. Josuap Gibeonimiut ikioriartorpai, akiuunnermullu Jehova arlaleriarluni tupinnartuliornikkut akuliuttarpoq. Guutip Amorikkut paatsiveerutsippai, taava ’Israelikkut saannit qimaammata Bet-Horonip kussangarnagut, taava Jehovap ujarassuarnik qilammit nakkartitsivigai Azeka tikillugu toqullugillu’. Nataqqornanik ujaraasunik toqutaasut Israelikkut pannamik toqutaannit amerlanerupput. — Jôrsua 10:1-11.
Tamanna pereermat Josua ’Israelikkut isigernanni’ Jehovamut oqaluppoq oqarluni: ’Seqineq unigit Gibeonip nalaani, qaammallu Ajjalonip qooruata nalaani.’ Taava qanoq pisoqarpa? Ima oqaluttuarineqarpoq: ’Seqineq taava unippoq, qaammallu ingerlajunnaarpoq, inunnut qinngarsortaat akiniarserlugit.’ — Jôrsua 10:12, 13.
Pisimasut tamakku ila tupinnat! Jehovap innuttai taassumunnga qujamasuffiginninnissaminnut ila pissutissaqarluarsimaqaat!
Qarsupittumik qujamasunneq
Jehova akuliukkaangat tamatigut Israelikkut qujamasuttaqaat. Qularnanngitsumik Israelikkuusut pinngitsoqaratik misigisimasarsimassapput misigisatik puiunngisaannassallugit. Taamaakkaluartorli qujamasunnerat sivikitsuinnaasarpoq. Qujasuippaluttumik pissuseqaleqqittuartarput. Tamatuma kingunerisarpaa Guutimit ’inuiannut qunusiassanngortinneqartuartarnerat, akerartortai taakkununnga naalaganngortillugit’. — Tussiaat 106:41.
Kisianni Israelikkut navianartorsiuleraangamik iliuutsitik eqqunngitsuusut qujasuippaluttullu peqqissimissutigisarpaat ikioqqullutillu Jehova kimigiiserfigisarlugu; akaarinnillunilu Jehovap isumakkeerfigiumasarpai. „Taamaattoq annikilliorneranni takusartarpai nillianerat tusaannaraangamiuk. Taakkununnga angerutsini eqqaavaa unneqqaringaartuugamilu peqqissimilersarluni.“ (Tussiaat 106:44, 45) Guutiata isumakkeerfiginnikkumatuup naqisimannittaannit aniguisittuartarpai iluareqqilersarlugillu.
Guutilli kamaginnissusia aammalu allamik isumataaqqullugit pruffiitiminik aallartitsiuartarsimanera soqutiginagit Israelikkut allanngortitassaanngittuarsinnarput. Naggataagut Jehovap kamagittarfigiunnaarpai, 607-imilu u.n.a.s. naalagaaffik Juda Babylonimiunit tiguarneqarmat ilaginnarpaa. Kunngi Nebukadnezarip sakkutuuinit toqutaanngitsut tigusaallutik Babylonimukaanneqarput.
Israelikkut ilumuunngitsuliornerata, naallu qujamasunnissaminnut pissutissarpassuaqaraluarlutik, Guutimut qujasuissusiata kingunerata ila alianassusia! (wD 1/7 88)