Naapertuilluassuseq Guutip iliuuserisartagaanut tamanut ilisarnaataavoq
’Qaarsuuvoq; piliai assuarnaapput, massa aqqutigisai tamarmik innarluissutaapput; Guutiuvoq ilumoortoq iluaassuseqanngitsoq, iluartuuvoq peqqusersuillunilu.’ — 5 Môrsase 32:4.
1. Jehovap pissusiisa ilaat suut Mosesip toqunissi sioqqullugu Israelip kinguaavi erinarsorfigigamigit erseqqissarpai, sunalu pissutigalugu taama oqarsinnaasimava?
JEHOVAP, Eqqartuussisup, Inatsisiliortup Kunngillu qutsinnerpaap, „innarluissut naapertuilluarnerlu nuannarai“. (Tussiaat 33:5; Isaia 33:22) Moses, angeruseq tunngavigalugu inatsisit pillugit akunnermiliuttuusoq tassaasorlu pruffiiti ’Jehovap kiinarsillugu ilisarisaa’, Jehovap aqqutigisaanik naapertuilluartuusunik ilisimannilluartunngorpoq. (5 Môrsase 34:10; Juánase 1:12) Jehovap naapertuilluassusiata asseqanngissusia Mosesip toqunissami siunitsiannguagut erseqqissarpaa. Israelikkut tamarmik tusaatillugit, oqaatsit uku erinarsuutigai: ’Siummissaritsi, qilaat ukorsii, oqalukkumavunga; nunallu tusarligit qanerma oqalunneri. . . . Jehovap aqqa torlulaatigiumagakku. Guuterput naalannartissiuk. Qaarsuuvoq; piliai assuarnaapput, massa aqqutigisai tamarmik innarluissutaapput; Guutiuvoq ilumoortoq iluaassuseqanngitsoq, iluartuuvoq peqqusersuillunilu.’ — 5 Môrsase 32:1, 3, 4.
2. Naapertuilluassuseq Guutip qanoq iliuuserisartagaanut tamanut qanoq ililluni ilisarnaataajuarpa, sunalu pillugu tamanna pingaaruteqartuua?
2 Naapertuilluassuseq Jehovap iliuuserisartagaanut tamanut ilisarnaataavoq, ilisimatussusialu, asannissusia pissaaneralu naapertorluinnarlugit atorneqartarluni. Jûpe 37:23-mi Guutip kiffaata Elihup Job imaattumik eqqaasippaa: ’Ajugaqanngitsoq isumasisinnaanngilarput, nukimigut aningaartoq taanna; massali eqqartuussut naapertuilluangaarnerlu innarlissanngilai.’ Aammalu kunngi David ima allassimavoq: „[Jehovap] naapertuilluarneq iluarimmagu imminullu ilumoortut isumakkiiginnassanagit.“ (Tussiaat 37:28) Ila tuppallernassusia! Qanoq iliornermigut tamatigut Guutip ilumoorfigisini iperarneq ajussavai. Guutip naapertuilluassusia tamatumunnga qularnaveeqqutaavoq!
Suna pissutigalugu naapertuilluassuseq amigaataasoq
3. Ullumikkut inuit akornanni suna amigaataava, tamannalu inuit Guutimut attaveqarnerannut qanoq sunniuteqarpa?
3 Jehova Guutiummat naapertuilluartoq, naapertuilluassutsimik nuannarisaqartoq ’nunallu isuinik pinngortitsisoq’, soormi taava ullumikkut inuit akornanni naapertuilluassuseq taama annikitsigaa? (Isaia 40:28) Môrsasip agdlagaisa tatdlimait 32:5-imi Moses tamatumunnga akissutissiivoq: ’Taassumunnga aserorsaapput, qitornarinngilai, imminnut kanngusuutissaapput; eqqarleriit mumingasut killormoortullu tamassa.’ Inuit ima aserorsaatigisumik iliorsimammata Pinngortitsisiminnillu ima ungasillisimatigalutik Guuti oqartariaqarsimavoq eqqarsaatini aqqutigisanilu inuit eqqarsaataannit aqqutigisaannillu ima ungasitsigisut soorlu ’qilaat nunamit qutsinnerusut’. — Isaia 55:8, 9.
4. Inuit qanoq iliuuseqarumallutik aalajangersimappat, taamaaliorneratalu suna kinguneraa?
4 Puiunngisaannaruk inuk Pinngortitsisiminut attaveqanngilluinnarluni iliuuseqarsinnaasutut pinngortitaanngimmat. Jeremiasip pissutsit eqqorluinnartumik nalilerpai oqarluni: „Nalunngilluinnarpara, Jehova, inuup ingerlavissi oqartussaaffiginngikkaa. Ingerlasup alloriartarnini aqussinnaanngilai.“ (Jerimia 10:23, NV) Guutip aqqutigeqqusaanik iluartunik qimatsinermikkut naalagaassusianillu ajattuinermikkut inuit naalagaassutsimut allamut allaalluinnartumullu, tassa Satan Diaavulup taassumalu suleqataasa inngilipiluusut naalagaassusiannut takussaanngitsumut pissaaneqaqisumullu, naalagaaffigineqalersissimapput. Apustili Johannes erseqqissaalluni ima oqarsimavoq: ’Silarsuaq tamaat ajortup pissaaneqarfigaa.’ Pissaanillit inngilipiluusut taakkua inuit akornanni naapertuilluassutsip ataavartinniarneqarnissaa soqutiginngilluinnarpaat. — 1 Juánase 5:19, NV.
5. Ullumikkut silarsuarmi naapertuilluarneqannginnermut assersuutinik taasaqarit.
5 Pissutsit aaqqissuussaanerata matuma ulluini kingullerni qanoq naapertuilluarneqanngitsiginera 1984-imi USA-p inatsisilerinermut ministerianit, William French Smithimit, ersersinneqarpoq. USA-mi naalagaaffiit ilaanni aqqaneq-marlunni 1977-imiit 1983-imut parnaarussaanikkut pillagaanernik misissuisimaneq oqaaseqarfigalugu Smith ima oqarpoq: „Inuinnaat naatsorsuutigisarpaat pinerluttut ingasannerit — inuarsimasut, pinngitsaaliilluni arnerisimasut, ikiaroornartunik nioqquteqarsimasut — sivisuumik parnaarussaallutik pillagaasartut. Misissuinikkut . . . nalunarunnaarsinneqarpoq pinerluttut soqutigittaatsunngorsimasut parnaarussivimmit iperarneqartarnerat pinerluttuliuleqqittarneratalu qanoq ajornanngitsiginera.“ Taava tupinnanngilaq Paul Kamenar, Washington Legal Foundationimeersoq, oqarmat: „Eqqartuussisarnermi periaaseq sukannersuuneq ajorajuppallaarpoq.“
6. (a) Nunaminnit aallarunneqannginnermik siornagut Judakkut akornanni pissutsit qanoq ippat? (b) Habakkukip apeqqutit suut saqqummiuppai, aamma tamakku ullumikkuttaaq apeqqutigineqarsinnaalluarpat?
6 Aammattaaq inuiaqatigiinni Judami tamarmi, Babylonimiut sakkutuuinit ukiumi 607-imi u.n.a.s. piuneerunneqarnerat sioqqullugu, eqqartuussisarnermi periaaseq sukannersuusimanngilaq. Taamaattumik Guutip pruffiitia Habakkuk Guutip sunniineratigut isumassarsisitaalluni ima oqarsimavoq: ’Inatsisit sunniiunnaarput, eqqartuussullu oqaaserineqartarinngilaq ilumoortoq eqqorlugu; massa iluaatsut iluartoq ilusarpaat; tamanna pillugu eqqartuussut mumingasoq oqaaserineqartarpoq.’ (Hâpakuk 1:4) Naapertuilluassuseqanngiffiunera peqqutigalugu pruffiitip Jehova ima aperaa: ’Soormi taava ilumuunngitsut isigiinnarpigit nipangerlutillu, iluaatsup imminit iluarnerusoq iiniaraangagu?’ (Hâpakuk 1:13) Ullumikkut naapertuilluannginnerup sutigut tamatigut ingasatsikkaluttuinnarneranit attorneqartut apeqqut tamannarpiaq apeqqutigisinnaalluarpaat: Sooq Guutip naapertuilluartup naapertuilluanngitsumik nunami iliortoqartuaannarnera isiginnaaginnarpaa? Sooq eqqartuussutinik allanngortitsilluni saqqummiussisarneq ilaginnaannarpaa? Sooq nipangersimaannarpa? Apeqqutit tamakku pingaaruteqartorujussuupput, Guutillu oqaasiani erlinnartumi, Bibelimi, taamaallaat ilumoortumik naammaginartumillu akissutissaqartinneqarput.
Suna pillugu Guutip naapertuilluanngissuseq ilaginnarallaraa
7. (a) Suna pissutigalugu inuit paratiisi Guutimit pisartik annaavaat? (b) Apeqqutit akerleriissutaasut suut Edenimi apeqqutaalersinneqarpat, tamakkualu naammassineqarniarnissaannut Guutip naapertuilluassusiata suna pisariaqartippaa?
7 Guutip piliai naammalluinnartuupput, soorlu Moses oqarsimasoq. Inuit aappariit naammalluinnartut Guutip Edenip paratiisianut inississimasai eqqarsaatigigaanni tamanna ilumoorpoq. (1 Môrsase 1:26, 27; 2:7) Ajunngitsumik ingerlasinnaaqqullugit pilluarsinnaaqqullugillu inuit naammalluinnartumik atugaqartinneqarsimapput. Oqaluttuap Guutimeersup ima oqaluttuuppaatigut: ’Guutip isigigamigit piliani tamaasa, takuai ajunngingaartut.’ (1 Môrsase 1:31) Edenimili eqqissinangaartumik pilluarneq sivikitsuinnaavoq. Eva uialu Adam pinngortitamit anersaajusumit naalasseriitsumit sunnerneqarsimallutik Jehovamut taassumalu inunnik aqutseriaasianut assortuisunngortinneqarput. Guutip taakkununnga peqqussutaasa eqqortuunerat tamatumuuna apeqqutaalersinneqarpoq. (1 Môrsase 3:1-6) Guutip aqutsinerata naapertuilluassusianik unammillernerup tamatuma sorpiaat ileqqussaviunersut apeqqutaalersippai. Angummut aalajaatsumut Jobimut pisimasuiusut pillugit oqaluttuap takutitsiarpaa Guutip pinngortitaasa tamarmik assuarnaassusiat aammattaaq apeqqutaalersinneqarsimasoq. Naapertuilluassutsip pisariaqartippaa apeqqutit akerleriissutaasut qilammi nunamilu tamarsuarmi pingaarutiliusut tamakkua naammassineqarniarnissaannut naammattumik piffissaqartitsinissaq. — Jûpe 1:6-11; 2:1-5; aamma takuuk Lúkarse 22:31.
8. (a) Taava inuit pissutsinik alianartunik atugaqalersimanerat qanoq oqaatigineqarsinnaava? (b) Mosesip erinarsuutaani neriuut suna malugitsiarneqarsinnaava?
8 Inuit taamaalillutik Guutip aqqutigeqqusaanik iluartunik ajattuisimanerata inuit inuuneranni alianartumik kingunerisai Rûmamiunut agdlagkat 8:22-mi Paulusimit ima eqikkarneqarput. Tassani apustili ima allappoq: ’Pinngortitat tamarmik suli tamassa anersaameqatigiillutik erloqeqatigiipput.’ Inuit akornanni naapertuilluarneqannginneq anersaaminerup erloqinerullu ilarujussuanut pissutaasimavoq, ’inuup inoqatini pissaaneqarfigiuarsimagamiuk ajoqutigisaanik’. (akugdlîssup oĸausê 8:9, NV) Guuti ajugaqanngitsoq qutsavigisariaqarparput naapertuilluassutsip akerlia tamanna naassaanngitsumik ilaginnaqqanavianngimmagu! Tamatumunnga atatillugu Môrsasip agdlagaisa tatdlimait 32:40, 41-mi Mosesip erinarsuummini ingerlaqqilluni saqqummiussaa malugeriaruk: ’Uanga [Jehova] naassaanngitsumik uumavunga. Panaga innaallattaat ipissarukku, assammalu eqqartuussisissaq eqippassuk, taava qinngarsortikka kingumut akiniarumaarpakka, uumissortikkalu akilerumaarlugit.’
9. Inuit pikitsitsimmata Jehovap assaata qanoq ’eqqartuussisissamik eqitsisimanera’ nassuiaruk.
9 Qangarsuarli Edenimi Jehovap assaata ’eqqartuussisissaq eqereersimavaa’. Inuit piaaralutik Guutip inatsisaanik unioqqutitsisimammata Guutip nangaanani naapertuilluarluni toqumik eqqartuussut nalunaarutigaa. Taassuma Adam oqarfigaa: ’Issuuvutit, issunngussallutillu kingumut.’ (1 Môrsase 3:19) Adamip ajortuliornerata inuiannut tamanut kingunipilui ukiut hundredelippassuit tamatuma kingornagut apustili Paulusip naatsumik oqaatigai. Taanna ima allappoq: ’Soorlu inukkut ataasiusukkut ajorti silarsuarmut tikiuttoq ajortikkullu toqu tikiulluni, taamalu toqup inuit tamakkerlugit tikippai, tamarmik ajortuliormata.’ — Rûmamiut 5:12.
10. Adamip naalanngitsunngorneraniilli kinguaassat marluk kikkut malunnarsiartortuarsimappat, Jehovallu tamanna qanoq iliuuseqarfigaa?
10 Inuit pikitsitsinerata kingorna Guuti aamma ima oqarpoq: ’Akerariissikkumaarpassi illillu arnarlu, illit kinguaassat taassumalu kinguaassaa; taassuma niaqqut aserortissavaa, illilli kimmia aserorterumaarpat.’ (1 Môrsase 3:15, 17-19) Kinguaassat marluusut taakku ukiut 6000-it ingerlaneranni malunnarsiartortuarsimapput, ’akerariit’tuarsimallutillu. Nunamili pissutsit naak allanngorartuaraluartut Jehovap aqqutigisai allanngorneq ajorput. Pruffiitini Malakias aqqutigalugu ima oqarsimavoq: ’Uanga Jehova allanngujuippunga.’ (Malakia 3:6) Taamaammat Guutip inunnut naammalluinnanngitsunut naalasseriitsunullu iliuuserisartagaanut naapertuilluassuseq ilisarnaataajuarsimavoq. Jehovap pissusereqqusani qutsissut naapertuilluartullu pissutsini nersornangaartut — ilisimassutsi, asannissutsi pissaaninilu — naapertorlugit naammassisarsimasani ataasiaannarluniluunniit nigorneq ajorpai.
Guuti inunnik annaassiartorpoq
11, 12. Inuit atugarliornerat Tussiaat 49-mi qanoq eqqartorneqarluarpa?
11 Amikorsuup taliisut illuni Satanip sunniipilunnera inuiannut tamanut anngussimavoq. Toqumut pillagassanngortitaanermiinnaanngitsoq aammattaarli inuit naalakkersueriaasiisa naammalluinnanngitsut aaqqissuussaanerinit naapertuilluanngitsuusunit inuit annaanneqartariaqarnerata ila pisariaqarluinnassusia!
12 Pissutsit alianangaartut inuit toqutassatut eqqartuunneqarnerminniilli atugaat Korap ernerisa tussiaasiaanni matuma kingulianiittumi oqaatigineqarluarput: „Tusarsiuk manna inuiaat tamassi, tusarnaarniarsiuk tamanna silarsuarmiut, annertaasut inuinnaallu, pisuullu piitsullu! . . . kialuunniit qatanngunni akiliullugu aniguisissinnaanngilaa, utertitaassutissaanilluunniit Guutimut akiliuteqarsinnaanani. Akissaq inuunerata nalinga angivallaarmat isumakkeerluaannartariaqarpaa. Taamaanngippat inuuinnarsinnaagaluarpoq iliveq takunagu.“ (Tussiaat 49:2, 3, 8-10) Tamanna Guutip innarluissutiminik naapertuilluarnerminillu atuinerata kinguneraa!
13, 14. (a) Kina inunnik annaassisinnaasutuaava, Guutillu toqqarsimasaa sooq tulluartuua? (b) Guutip neriorsuutaanut tamanut Jesus qanoq ililluni ’angertutut’ taaneqarsinnaalerpa?
13 Taavami ikiortissaq sumit pineqarsinnaava? Kia toqup pissaaneranit inuit aniguisissinnaavai? Tussiaammi tamanna ima akineqarpoq: „Guutip tarniga Sheolip assaanit akiliullugu utertissavaa.“ (Tussiaat 49:15, NV, versi 16 kalaallisuunngortitaq atortussaatitaq naapertorlugu.) Taamaallaat Guutip asanningaassusiata, naapertuilluassusia naapertorlugu sunniuteqartup, inuit „Sheolip assaanit“ aniguisissinnaavai. Apeqqutit tamakku Jesusip farisiiarillu mianersoqqissaartup Nikodemusip unnuakkut oqaloqatigiinneratigut erseqqinnerusumik akissutissarsisinneqarsimapput. Jesusip taanna ima oqaluttuuppaa: ’Silamiut Guutip ima asatigai ernitui tunniullugu kinaluunniit taassumunnga uppertoq tammaqqunagu, naassaanngitsumilli inuussuteqaqqullugu.’ (Juánase 3:16) Nunamut tikiutinngikkallarami Guutip ernerata Ataatani qilammi najorsimavaa. Oqaatigineqarpoq nunami inuulernermi siornatigut ’inuit qitornaat nuannaarfigigai’. (ússatit 8:31) Inuiannik utertitsisussatut Jehova anersaamit pinngortitamit taassumannga — ernituaminit — pitsaanerusumik toqqagassaqanngilaq!
14 Paulusip Jesus ima oqaatigaa: ’Guutip unnersuutai tamarmik taassumuuna angerutaapput.’ (2 Korintumiut 1:20) Neriorsuutit pruffiiti Esajasimit allanneqarsimasut tamakkua ilaat Matîuse 12:18, 21-mi issuarneqarpoq, tassanilu Jesus pillugu ima atuarpugut: ’Aajuna kiffara qinigara, asasara tarnima nuannarisaa; anersaara taassumunnga tunniukkumaarpara, eqqartuussisissarlu [tassa: naapertuilluassuseq] inuiaqatigiinnut oqaassutigissavaa. . . . Inuiaqatigiillu aqqa neriuffigissavaat.’ — Aamma takuuk Isaia 42:1-4.
15, 16. Jesus Adamip kinguaavinut tamanut qanoq ililluni tassaalersinnaasimava „Ataataq Naassaanngitsoq“?
15 Nunami kiffartuussilluni Jesusip erseqqissumik takutittarpaa qanoq inuit inuiannit tamaneersut aqqa neriuffigisinnaajumaaraat taamaalillutillu Guutip naapertuilluassusiata iluaqutissartai iluaqutigissallugit. Jesus ima oqarsimavoq: ’Inuup ernera tikiutinngilaq kiffartorfigeqqulluni, kisianni kiffartussalluni inuuninilu akissatut tunniussallugu amerlasuut utertinneqaatissaannik.’ (Matîuse 20:28) Guutip inuiaqatigiinnut Israelikkunnut inatsisaasa naammalluinnartut una ilagaat: ’Inuuneq naleqassaaq inuunermik.’ (5 Môrsase 19:21) Jesusip inuunini naammalluinnartoq toqukkut tunniukkamiuk Guutillu pissaaneratigut makitinneqarami qilammut utersinnaaqqulluni, inuttut inuunermi naammalluinnartup nalinga Jehovamut tunniussinnaasimavaa Adamip inuusinnaatitaanerata taartissaatut. Tassuuna Jesus taaneqarsinnaalerpoq ’Adam kingulleq [imaluunniit aappaa]’, maannalu Adamip kinguaavinut uppersuseqartunut tamanut ’Naassaanngitsumik Ataataasinnaavoq’. — 1 Korintumiut 15:45; Isaia 9:6, NV.
16 Guutip aqqutigisaa annaassissutaasoq — tassa asanninnermini ernini, Jesus Kristus, inuunerminik utertitsissutissatut tunniussisikkamiuk — tassuuna ’inuiaqatigiinnut oqaassutigineqarpoq’. Guutillu naapertuilluassusianut annertuumut ilisarnaataavoq. Ila qujanassusia ’tarnitta Sheolip assaanit akiliullugu utertinneqarsinnaanissaanut’ Guuti periarfissiisimammat!
Utertitsissutip illersorneqarnera
17, 18. 1870-ikkunni C. T. Russellip kina suleqatigilerpaa, 1878-imili Barbourip qanoq tupaallatsippaa?
17 Kristumiutut ukiuni hundredelinni inuusimasutut ilillutik, ullumikkut Jehovap Nalunaajaasuisa Jesus Kristusip utertitsissutitut pilliutaaneranik ajoqersuut illersortuarpaat. Watch Tower Societyp præsidentianut siullermut, Charles Taze Russellimut, pisimasut ilaat eqqarsaatigissallugu soqutiginarpoq. Atuagassiamik upperisarsiornermut tunngasumik, The Herald of the Morning-imik taaguuteqartumik, aaqqissueqataallunilu aningaasatigut tapersersuisuusimavoq. Atuagassiaq taanna aallaqqaataaniilli adventistimit, N. H. Barbourimit USA-mi naalagaaffimmi New Yorkimi Rochesterimeersumit, saqqummersinneqartarsimavoq. Taamani Russell suli 30-nik ukioqalersimanngilaq, Barbourili utoqqaaneroqaaq.
18 Suleqatigiinnerat ingerlalluarsorinarpoq, tupaallannartumilli 1878-imi Barbour utertitsissummik ajoqersuummik miserratiginnilluni ilanngutassiivoq. Pisimasoq tamanna eqqartorlugu Russell ima oqarsimavoq: „Annernartumik tupaallaatigisatsinnik Mr. Barbour The Herald-imut ilanngutassiivoq utertitsissummik miserratiginnilluni — Kristusip toquata Adamimut kinguaavinullu utertitsissutaanera miserratigalugu, oqarami Naalakkatta toqua inuit ajortuliaat pillugit pillaatissaraluamut akiliutaasinnaanngitsoq, soorluttaaq meqqummik kapoorlugu toqunissaata tungaanut niviugammik anniartitsineq angajoqqaanit nunamiusunit meeqqami naalanngitsuliorsimaneranut naapertuilluartumik akiliutitut isigineqarnavianngitsoq.“
19. (a) Barbourip utertitsissummik isiginninnera Russellip qanoq qisuariarfigaa? (b) Napasuliaq Alapernaarsuiffik pillugu Russellip kissaataa eqquussimava?
19 Russell suleqamminit utoqqaanerusumit sunnerneqarsimasinnaagaluarpoq, sunnerneqarumanngilarli. Qaammatit arlallit ingerlaneranni isumaqatigiinngissutigisartik atuagassiami ilanngutassiuutigisarpaat, Barbour utertitsissummik miserratiginnittarluni Russellili illersuisarluni. Naggataatigut Russellip Barbour suleqatigiunnaarluinnarpaa atuagassiarlu manna, taamani Zion’s Watch Tower and Herald of Christ’s Presence-imik taaguuteqartoq, naqitertittalerlugu. Atuagassiaq saqqummersalersoq C. T. Russellip imaattumik oqaaseqaatigaa: „Aallaqqaataaniilli immikkut illuni utertitsissummik illersuisuuvoq; neriuppugullu Guutip iluarippagu saqqummersarnini tamaat taamaattuassasoq.“ Aaqqissuisup Russellip neriuutaa eqquussimava? Ilaana! Saqqummersumi tassani qupperneq 2-mi, „Napasuliaq Alapernaarsuiffik-up siunertaa“-nik qulequtalimmi, nassuiarneqarpoq atuagassiaq taanna „Kunngi maannakkut naalagaasoq, Jesus Kristus, aava kuisaq inuit inuunermik naassaanngitsumik pisinnaalernissaannut aqqutissiuisoq, upperfigeqqullugu kajumissaari“suusoq.
20. Apeqqutit suut suli akineqartariaqarpat?
20 Ajortip toqullu pillarneqaatissaannit inuiaat aniguisinniarnissaannut naapertuilluassutsi naapertorlugu utertitsissutissamik pilersitsiniarluni Guutip qanoq iliorsimaneri manna tikillugu sammereerpavut. Asanninneratigut utertitsissutissaq tamanna pissarsiarineqarsinnaalersimavoq. Apeqqutilli uku suli akineqarsimanngillat: Jesus Kristusip utertitsissummik pilliutaanerata iluaqutissartai qanoq pissarsiffigineqarsinnaappat? Illit qanoq iluaqutigisinnaassavigit, aamma qaqugu? Akissutissat atuagassiap uuma tulliani sammineqartussat naapertuilluarnerup Guutip suliaanut tamanut ilisarnaataaneranik tatiginninnerulersissavaatit. (wD 1/3 89)
Qanoq akissavit?
□ Guutip naapertuilluassuseq qanoq pingaartitsigaa?
□ Suna pissutigalugu inuiaat akornanni naapertuilluannginneq taama annertutigaa?
□ Inuit toqumit aniguisinneqarnissaat Guutip qanoq pisinnaalersippaa?
□ Qanoq annertutigisumik utertitsissut Napasuliaq Alapernaarsuiffik-mi illersorneqartuarpa?
[Qupp. 8-mi assiliartaq]
Moabip narsarsuaani erinarsuummi oqaasertai Mosesip saqqummiuppai
[Qupp. 11-mi assiliartaq]
Guutip silamiut ima asatigai ernituani tunniullugu