Unneqqarissuuneq — qanoq paasisariaqarpa?
UNNEQQARISSUUNEQ — tassaavoq ilumoortuuneq aammalu peqquserlunngisaannarneq. Inuk unneqqarissoq inunnut allanut ilumoorfiginnittuuvoq — peqqusersuitsuuvoq aammalu ileqqorissuulluni, sallutuujunngilaq imaluunniit tammarsaarineq ajorpoq. Inuk unneqqarissoq assuarnaatsuuvoq. Tamatigut tatiginartuuvoq aammalu inoqatiminik nakutitsinianngisaannarpoq. Taamaattumik tamatta unneqqarissumik iliorfigineqarnissarput kissaatigigaluaqaarput, ilaa? Taamaappat unneqqarissutsip atorneerunnissaa eqqarsaatigineqarsinnaava?
Qulaani eqqartorneqartut tunngavigalugit kristumiut ingerlaannaq takusinnaassavaat suna pissutigalugu Guutimik ilumoortumik pallorfiginnittut unneqqarissuusariaqartut. (Juánase 4:24) Tassami taakkua pallorfigisarivaat Jehova, „Guuti unneqqarissoq“. (Tussiaat 31:6; Títuse 1:2) Taamaattumik naleqqutiinnarpoq taamaallaat ’angutit ilumoortut’ taassumunnga sinniisutut atorneqarsinnaammata. — 2 Môrsase 18:21.
Inuunerup immikkoortortai amerlasuut unneqqarissuunerup attortarmagit, paasinarluarpoq apustili Paulus ima allassimammat: ’Tamatigut assuarnaatsutut iliorniarpugut.’ Tassa oqaatsitsigut, suliffitsinni, ilaqutariit iluanni, niuernerup iluani sulinitsinni aammalu oqartussaasunut attaveqarnitsinni assuarnaatsuusariaqarpugut, imaluunniit unneqqarissuusariaqarpugut. — Eprîarit 13:18.
Oqaatsitsigut
Ilumoornermik sanioqqutitseriaatsit arlaliupput — taakkunanngalu amerlasuut ippinnaateqanngitsutut akuerisassatullu isigineqartarput. Nalunaaquttap akunneri suliffigisimasat sinnerlugit allanneqartarput, pulaartorerusunngisat takkukkaluaraangata angajoqqaat meeqqaminnut salloqittartittarpaat angerlarsimannginnerarlutik, sillimmasiisarfik ilaasortaaffigisaq eqqunngitsunik paasissutissinneqartarpoq, aammalu suliartornissaq kajumiginngikkaanni sianertoqaannartarpoq oqarlunilu napparsimalluni. Tamakku assersuutissaminiinnaapput.
Inuit ilaat oqaatsimikkut sallorusunngisaannartut sumik peqquteqarnerlutik isumaqartarput allakkatigut salluneq allaasoq — nammineq immersugassamik immersuissagaangamik imaluunniit ilanngaasigassaqannginnermik nalunaarummik atsiuissagaangamik. Kisianni taamatut unneqqaserlunnikkut akileraartartut tamarmik aningaasartuutissinneqartarput. Tamanna tullimut asanninnermik taaneqarsinnaava? Aammattaaq kristumiut pisussaannginnerpat ’kaasarip pissaanik kaasarimut tunisinissaminnut’? — Lúkarse 20:25; 10:27; aammattaaq takukkit Rûmamiunut agdlagkat 13:1, 2, 7, 8.
Soorunami ’Guuti unneqqarissup’ malinnissaa kissaatigaarput, ’sallunerit ataataat’ pinnagu. (Tussiaat 31:6; Juánase 8:44) Inuit nangaajuitsut inoqatiminnik nakutitsiniarnerminni salloqittaaniarnerminnilu immaqa oqaatsit assigiinngitsunik isumaqartinneqarsinnaasut atortarpaat, kisianni inunnut allanut salloqittaaneq tullimut asanninnerunngilluinnarpoq. Aammattaaq sallutuut siunissaqanngillat. — Evfisumiut 4:25; sarĸúmersitat 21:27; 22:15.
Suliffimmi
Akissarsiorluni sulissagaanni unneqqarissuunissaq Bibelimi piumasarisaavoq naleqquttoq. (Kulorsamiut 3:22-24) Kisianni inuppassuit suliffimminni piffissamik asuliinnartitsisarput sivisunaarlugu qasuersaartarnermikkut, inortuillutik takkuttarnermikkut siusinaarlutillu soraartarnermikkut, suliffimminnut apuukkaangamik piffissarujussuaq atorlugu pinnersartarnermikkut, suliffeqarfiup oqarasuartaataa atorlugu imminnut attuumassuteqartunik sivisuumik oqaloqatiginnittarnermikkut, suliffiup nalaani imminnut attuumassuteqartunik suliaqartarnermikkut imaluunniit allaat qasuersaarlutik sinilaartarnermikkut. Unneqqaserlunnerat aningaasartuutinik allat tamarmik akilersueqataaffigisassaannik nassataqartarpoq.
Suliffimmi tillinnerit timitaqarnersaat tassaavoq suliffimmi atortunik angerlaassisarneq. Inuit ilaasa oqaatiginiartarpaat tamanna tassaasoq ’aningaasarsialunnermut taarsiissut naleqquttoq’, aammalu tamanna sulisitsisuminnut piumatuumut akiniaassutigisaritsik. Kisianni piginnittoq imaluunniit sulisitsisoq ilisimateqqaarnagu akuersiseqqaarnagulu piinik tigusineq pinngitsoorani tillinneruvoq.
Pissutsini tamakkunani tamani kristumiut ilumoortut unnersuussut isumassarsiarititaasoq manna maleruartariaqarpaat: ’Tillittartoq tillissaarli, suliniarlunili assamminik ajunngitsuliorli, [annikilliortunut] tunniussassaqaqqulluni.’ — Evfisumiut 4:28; apustilit suliáinik agdlagkat 20:35.
Qanormi iliussavit sulisitsisuit nammineerluni qinnuigippatit unneqqaserluttumik imaluunniit inatsisinut unioqqutitsisumik ilioqqullutit, sioorasaarlutillu taamaaliorumanngikkuit soraarsissallutit? Immaqa sullissassi biiliani atortut ilaat taarsersimasuusaarlugu sullissassinnut akiligassanngorteqquaa, immaqaluunniit nioqqutissat pitsaanngitsut poortoqquai akisunaarlugillu akilersoqqullugit, imaluunniit nioqqutissat „akikillisat“-mik nalunaaqutsersoqquai naak akiviinik imaluunniit akivii sinnerlugit akeqartikkaluarlugit. Qularnanngitsumik inuppassuit isumaqassapput taama iliorneq sulisup akisussaaffiginngikkaa, kisianni sulisitsisup. Taamatut nalaataqaraangamik Jehovap Nalunaajaasui qanoq iliortarpat? Daryl J. ima oqaluttuarpoq:
„Pisiniarfissuarmi nakkutilliisutut suligallarama qullersama qinnuigaannga akit qaffanngikkaluarlugit isertitat annertusiseqqullugit. Assersuutigalugu taavaat nioqqutissat oqimaassusiviannit annerusoq puuanni allattarsinnaagiga nioqqutissanillu pisiffivut akiligassanik eqqunngitsunik nassittarsinnaagikka. Tamanna nalinginnaasorujussuuvoq, kisianni peqquserluttuliorneruvoq.“
Daryl peqquserluttulioqataajumasimanngilaq pisisartunillu nakutitseqataajumanani. (ússatit 20:23) Sapaatit-akunnialui qaangiuttut soraarsitaavoq. Unneqqarissuunini suliffimminik annaasaqaatigigamiuk sianisaanngitsutut iliorpa? Tamanna peqqissimissutigaa? Naamik, tassami uppeqataasa ilaata qanoq pisoqarsimasoq tusaramiuk Daryl suliffissarsissuppaa. Daryl ima oqarpoq: „Sapaatit-akunneri pingasut-sisamat qaangiummata imminut ilaquttannullu pilersueqqissinnaalerpunga. Assuarnaassutsinnik aalajangiussisimanera pillugu Jehovamit pilluaqqusaanera immikkut pisinnaatitaanertut isigivara.“
Aammattaarli unneqqarissuuneq pissutaalluni suliffittaartoqarsinnaavoq. Silarsuaq tamakkerlugu sillimmasiisarfissuup tusaamasap aallartitaata Torontomi Canadamiittumi niuertarfissuarmik piginnittoq siunnersorsimavaa Jehovap Nalunaajaasuinik sulisussarseqqullugu taamaalilluni sulisut tillittarnerat ajornartorsiutigiunnaassammagu. Sillimmasiisarfissuup aallartitaa ima nassuiaasimavoq: ’Illoqarfimmi allami sillimmasiisarfiit ilaanni ilinniartuullunga suligallarama paasisimavara pisiniarfissuarni sillimmasiisarfiup sullitaani arlalinni Jehovap Nalunaajaasuinnaat unnuakkut nioqqutissanik ilisivinnut ilioraasussatut sulisussarsiarineqartartut. Allanik sulisoqarallaramik nuanniitsunik nalaataqartarsimapput, Jehovap Nalunaajaasuinulli matuersaatit tunniukkamikkik aammalu taakkua suliffiup kingorna ilisivinnik immiisittaleramikkilli sunnguamilluunniit annaasaqarsimanngillat.’
Unneqqarissusermik ersersitseriaatsit allat
Inuit ilaat aningaasanik atoraangamik maniguullutillu ataqqinnippalugajuttarput, qujaniarnertik ersersittarpaat neriorsueqqissaartarlutillu aningaasat utertikutsoorumaarlugit. Piffissarli akiitsunik akiliiffissaq nalleraangat ilaat tupinnaannartumik allanngortarput. Kamanneq akeqqersimanerlu pissuserilersimasarpaat, naammagittaalliulersarlutillu atukkiisoq sukangavallaarnerarlugu naakkittaappallaarnerarlugulu. Atukkiisoq tukkortoq taakkua isaanni tassaalersimasarpoq inupalaaq! Bibelimili oqaatigineqarpoq inuk atortoq atukkaminik akiliinngitsoortoq tassaasoq guutiitsoq. (Tussiaat 37:21; Rûmamiut 13:8) Tamatumani pingaartumik pineqarput attartortut akiligassamik ilaannaannilluunniit akiliinissaminnut piumassuseqanngitsut immaqaluunniit allaat atukkiisumik attaveqarfiginnikkusunngitsut.
Ilaqutariit iluanni amerlasuutigut unneqqarissuseq pisariaqartinneqarpoq: Ilaqutariinni ittuusup aningaasat isertitat anisullu pillugit nuliani ammaffigisariaqarpaa, nuliaasullu unneqqarilluni uini oqaluttuuttariaqarpaa aningaasat sumut atorsimanerlugit. Marluullutik tamarmik assuarnaatsuusariaqarput, tassa allasiussanatik, aammalu meeqqat angajoqqaamik peqqussutaannut ilumoortuusariaqarlutillu naalattuusariaqarput, aammattaaq ilagisartakkat aliikkutassaqarnerlu pineqaraangata. — Evfisumiut 5:33; 6:1-3.
Tamakkua tamarmik ersersippaat kristumiut ilumoortut ’iluaatsut tunussimasariaqaraat’ — suliat ajortut aammalu inerititat ajortut unneqqaserlunnermik, sallumik, nakutitsinermik, peqquserlunnermik aammalu ileqqussatigut ajortunngorsimanermik kinguneqartartut. — 2 Timûtiuse 2:19; Rûmamiut 2:21-24.
Pilluaqqusaanerit iluaqutillu
Nammineq inunnut allanut ilumoortuunikkut peqqusersuitsuunikkullu unneqqarissuseq allisarneqarsinnaavoq. Taava pitsaasumik tatigeqatigiiffiusumillu attaveqatigiinneqalissaaq. Aammattaaq unneqqarissuunerup kingunerisarpaa eqqissisimalluni inuuneq, allat pasinninnerat, nalorninerat siooraffiginninnerallu pissutigalugit piffissaq nukiillu atortariaarullugit. — Naleqqiuguk Isaia 35:8-10.
Unneqqarissuugutta ilerasuuteqannginneq, akuerineqarsinnaasumik ’Guutimut uumasumut kiffaalissagaanni’ pisariaqartoq, angusinnaalissavarput. (Eprîarit 9:14; 1 Timûtiuse 1:19) Tamatuma kingunerisarpaa isumakkut toqqissisimaneq sinilluartarnerlu. Ittoornak inuit allat isaasigut isigisinnaalissavatit. Unneqqarissuugaanni aammattaaq eqqunngitsumik iliortoornissamut siooraneq pinngitsoorneqarsinnaavoq. Taamaalilluni ataqqinassuseq aammalu imminut ataqqineq attanneqarsinnaapput. Taava unneqqarissuseq qaquguluunniit atorneerussinnaanavianngilaq, imaluunniit iluaqutaajunnaarsinnaanavianngilaq.
Tassa unneqqarissuuneq maannangaaq pilluaqqussutissartaqaqaaq iluaqutissartaqaqalunilu. Unneqqarissuunitsinnulli pissutaasoq pingaarnerpaaq tassaasariaqarpoq Ataatatsinnut, Jehovamut, asanninnerput, tassaaginnarani unneqqarissuunerup iluaqutaanera imaluunniit Bibelimi inassutigineqarnera. Jehovamut attaveqarnitta erlinnangaartup aammalu taassumannga iluarisaanitta attatiinnarnissaat kissaatigaarput. Aammattaaq unneqqarissuunissarput kissaatigaarput taamaalilluta tullimut asanninnerput ersertarmat. Naatsumik oqaatigalugu: Kristumiuussagaanni ilumoortoq unneqqarissuusariaqarpoq. — Matîuse 22:36-39.
Tussiaasiortoq ima allassimavoq: „[Jehova], kina ininni najugassarsisinnaava, qaqqanni illernartumi inissarsisinnaalluni? Tassa taanna peqqusersuitsumik inuuseqartoq, innarluitsumik iliortoq ilumoortumillu oqaluttoq uummamminit, . . . tullimi ajoqutissaanik iliunngitsoq.“ (Tussiaat 15:1-3) Guutip eqqortumik iliorluni aaqqissuussaaneq naapertuilluanngitsoq maanna atuuttoq suujunnaarsereerpagu aammalu ’ineqarfia inunniilerpat’ maannangaaq taassuma kiffaasut sutigut tamatigut unneqqarissuugutta taava taassuma ’najugassarsisitaanut’ ilaalluta pilluaqqussutissat naassaanngitsut nuannaarutigalugit atorsinnaalissavavut. — sarĸúmersitat 21:1-5. (wD 15/2 88)
[Qupp. 5-mi ungalusaq]
Sutigut tamatigut unneqqarissuuvit?
Eqqortumik iliortuaannarnissatsinnik aalajangerluinnarsimanerput silarsuup inuuffigisatta kaanngartinniarsarivaa. Silarsuarmi kikkut tamarmik nammineq iluaqutissaannartik anguniarpaat — inunnut allanut ajoqutaanissaa apeqqutaatinnagu.
Illit ilumuuillutit isumaqarpit unneqqarissuseq sivisunerpaamik atasinnaasoq? Tamatuminnga qulannginnerit ima sakkortutigiva allaat unneqqarissutsit misilinneqaraangat aalajaattuaannartarlutit? Qanoq iliussagaluarpit makkuninnga nalaataqaraluaruit:
□ Qaammaterpassuarni suliffissaaruteqqareerlutit aningaasanik nassaarputit ima amerlatigisunik allaat akiligassatit akilersinnaalerlugit allaallu sinneqarlutik.
□ Ilinniagaqarninni misilitsinneq pingaaruteqartoq siunissavillu qanoq ingerlanissaanut aalajangiisuusussaq angusiffigisinnaavat aatsaat peqquserlukkuit.
□ Ilisimatuutut akuerineqassaguit misissuininni inernitit ’naleqquttunngorsartariaqarpatit’ tamanut saqqummiunneqassappata.
□ Nunami allami sulinngiffeqarlutit angalatillutit nioqqutissamik akikitsumik pisivutit, illit nunanni pisiarisuugukku akisunerussagaluartumik — killeqarfimmili nammineerlutit tamanna nalunaarutigigukku akileraarutissaanik annertuumik akiliisinneqassaatit.
[Qupp. 6-mi ungalusaq]
Unneqqarissuseq atorneerussimanngilaq
Ilumoorpa ullumikkut kikkut tamarmik imminuinnaq eqqarsaatigisut? Naamik — naak unneqqarissumik iliortoqarsimagaangat tusagassiuutitigut tupinnartorsuartut ilillugu allaaserineqartaraluartoq.
Fort Waynemi, Amerikami naalagaaffiit ilaanni Indianamiittumi, tillinniat ussassaarniarlugit politiit fjernsyni akisooq biilimut parnaarneqanngitsumut ilisimavaat. Qanoq pisoqarnissaa paaserusullugu sapaatit-akunnerini arlalinni biili alaatsinnaappaat. „Qularnaallillugu paasivarput inuit biili sanioqquttaraat, ilummut alakkartartut fjernsynilu takulerlugu uniffigisaraat, matu ammartaraat parnaartarfialu naqeriarlugu matu matusaraat, ingerlaqqillutillu.“ Taamaalillutik unneqqarissuunertik ersersittarpaat.
Bibelimik ilinniartinneqarsimanertik pissutigalugu aningaasanik nassaaminnik piginnittuinut utertitsisimasut pillugit Canadami aviisit ilaat allaaserisaqarsimapput ima qulequtserlugit:
„Samariamiut ajunngitsut sulinngiffeqarluni angalanissaq annaappaat.“ — The Windsor Star
„Patip unneqqarissup aningaasat 421 dollarit piginnittuannut tunniuppai.“ — The Spectator
„Niuertup 983 dollariutini inunnullu tatiginninnini pigileqqippai.“ — The Toronto Star
Aningaasanik katatanik utertitsisimasut tassani pineqartut tassaapput Jehovap Nalunaajaasui. Qulequttami siullermi pineqarput angutit inuusuttut illumiit illumut oqaluussitillutik aningaasivimmik nassaarsimasut piginnittuannullu arnamut tunniussisimasut. Arnaq taanna ima oqarsimavoq: „Nukappiaqqat taakku qaqutigoortuusimassapput. . . . Taamatut iliortoqaraangat inunnut tatiginninneq pigileqqinneqartarpoq.“ Arnap taassuma illoqarfimmit allaminngaanneersuunera pissutigalugu aningaasat tigummiinnarnissaat nukappiaqqanut ajornanngitsuaraassagaluarpoq, kisianni taakku ima oqarput: „Taamaaliorumanngilluinnarpugut. Inuup allap ikiornissaanut tamatumuuna periarfissarsiinnarpugut.“
Qulequttap tulliani aammattaaq angalasoq pineqarpoq. „[Nassaartup] qanoq iliornissani nalornisiginngilluinnarpaa,“ aviisi allappoq. Nassaartoq nassuiaavoq Jehovap Nalunaajaasuisa ilarigaanni, oqarlunilu: „Unneqqarissuseq pingaartilluinnarparput.“
Qulequttat pingajuanni eqqartorneqartoq oqaluttuarpoq „inunnut tatiginninnini annaangajalluinnarsimallugu“. Arnaq pisiat puuanni kajortumi aningaasanik nassaartoq tassaavoq Jehovap Nalunaajaasuisa ilaat. Arnap taassuma uia tusagassiortumut oqarpoq Bibelimik siulersorneqarneq pissutaasoq: ’Aningaasanik nassaaminik inuanut tunniussinissaminut nuliama tamanna iluaqutigaa.’
Taasinnaasavut allat tassaapput Jehovap Nalunaajaasui illumiit illumut oqaluussitillutik aningaasarsiat puuannik aningaasanik imalimmik nassaarsimasut. Politeeqarfimmut tunniummassuk politiip paarsisuusup oqarfigai aningaasanik tillittoqarneranik nalunaarutiginnittoqarsimanngitsoq. Oqaluussisartut siunnersuutigaat illoqarfiup radioatigut aningaasat nassaat nalunaarutigineqarnissaat. Politeeq nalornisoorpasilerpoq, oqarlunilu: „Aningaasat nassaassi piginnittuminnut apuunnissaat ila ilungersuutigingaarassiuk. Upperisarsiortunut sorlernut ilaavisi?“ Oqaluussisartut upperisarsiortunut sorlernut ilaasortaanertik oqaatigereeraallu politeeq akivoq: „Taama ilimagalugu, tassami Jehovap Nalunaajaasui kisimik taamatorujussuaq iliornissaminnut naammattumik unneqqarissuseqarput.“
Jehovap Nalunaajaasua alla illumiit illumut oqaluussitilluni pulaakkami ilaannit qaqutigooqisumik qinnuigineqarpoq. Pulaagaa nulianilu napparsimapput, ullormili tassani pinngitsooratik aningaasanik bankimut ilisisussaapput. Oqaluussisartorlu qinnuigaat pisariaqartoq tamanna suliareqqullugu. Taava aningaasat taakku bankiliaassassai 2000 dollarit tunniuppaat. Aningaasat bankiliaatereerlugit uterami ima aperinngitsoorsinnaanngilai: „Kinaanersungaluunniit nalullusinga qanoq ilillusi tatiginninnermik taama angitigisumik ersersitsiviginissannut sapinngilasi?“ Imalu akipput: „Nalunngilarput — kikkut tamarmik nalunngilaat — tatigineqarsinnaasutuat tassaasut Jehovap Nalunaajaasui.“
Nunani tamani soorunami Jehovap Nalunaajaasuisa saniatigut aamma inunnik allanik unneqqarissoqarpoq — kisianni nalunanngitsumik unneqqarissumik iliorneq qaqutiguungaarmat taamatut pisoqatuaraangat tusagassiuutitigut allaaserineqartarpoq. Unneqqarissuseq pillugu Bibelimi ajoqersuutigisap taama kinguneqarluartigissusia ila qujamasunnangaarmat!