Jerusalemmip qarmarsui

Ezrap nalaani Nehemia Israalikkuusoq kunngimut Artaxerxesimut kiffaavoq. Persiap illoqarfittaani Susami najugaqarpoq. Taamaalluni Nehemiap qatanngutaa Juudamit aggerpoq ima nuannin­ngitsumik tusagas­saateqarluni: ‘Inuit Jerusalemmimut utersimasut uloriar­nartorsiorput. Illoqarfiummi qarmarsui isaaffiilu Babylonnimiut aserorsimasaat iluarsaan­neqarnikuun­ngillat.’ Tamanna tusarlugu Nehemia aliatsappoq. Jerusalemmimut ikiuukkiar­torusukkami Jehovamut qinuvoq aallarnissani kunngip akuerissagaa.

Kingusin­nerusukkut kunngip maluginiarpaa Nehemia nikallungasoq. Aperaa: ‘Sooq taama nikallungatigaat?’ Nehemia akivoq: ‘Qanormi aamma illoqarfiga Jerusalemmi illukuin­nanngorsimasoq aliasuutigis­sanngilara?’ Kunngip aperaa: ‘Qanoq ikiussavakkit?’ Ingerlaannarlu Nehemia nipaatsumik qinuvoq, taavalu kunngimut oqarluni: ‘Qinnuigaakkit Jerusalemmip qarmarsui sanaqqin­niassagakkit aallarnissara akuerissagit.’ Kunngip Artaxerxesip Nehemia oqarfigaa aallarsinnaasoq. Isumannaatsumillu angalanissaa isumagaa. Aamma Nehemia Juudami naalagaatitan­ngortippaa illoqarfiullu isaaffianut atugassaanik qisunnik tunillugu.

Nehemiap Jerusalemmimut apuukkami illoqarfiup qarmarsui misissorpai. Taava palasit illoqarfiullu aqutsisui katersor­teriarlugit oqarfigai: ‘Ajorluinnarpoq! Sanaqqit­tariaqarpagut.’ Inuit isumaqataapput sanalerlutillu.

Israalik­kunnulli akeraasut illaruaatigaat oqarlutik: ‘Qarmarsuaq sanasarsi terianniap pissiffigiguniuk uppiseriaannaavaa.’ Sanasulli illaruaatigineqarnertik soqutiginagu sulinertik ingerlateq­qiinnarpaat. Qarmarsuarlu portuneruleralut­tuinnarpoq.

Taava akeqqat allamik periaaseqarlutik Jerusalemmimut saassus­siniarlutik aalajangerput. Juutit tamanna tusaramikku annilaangalerput. Nehemialli oqarfigai: ‘Annilaangas­sanngilasi. Jehovap ilagaatigut.’ Taava sulisut illersor­niarlugit paarsisulerpai akeqqallu saassus­sisinnaajun­naarput.

Ullut 52-it ingerlanerinnaani qarmarsuaq isaaffiillu naammas­sineqarput. Tamannalu nalliut­torsiutiginiarlugu Nehemiap Levikkut tamaasa Jerusalemmimut aggertippai. Erinarsoqatigiit marlunngorlugit immikkoortippai. Erinarsoqatigiillu illoqarfiup qarmarsuisa qaavisigut pisullutik naapikkiar­tuaarput. Qarlortaatinik, cymbelinik kukkilat­tarissanillu nipilersorput Jehovamullu erinarsorlutik guutisiorfimmut apuunnissamik tungaanut. Ezrap erinarsoqatigiit aappaat ilagai aappaalu Nehemiap ilagalugit. Inuit tamarmik – angutit, arnat meeqqallu – nalliut­torsiorput Jehovamullu tunissuteqarlutik. Nuannaarnerat ima nipitutigaaq inunnit ungasis­sumiittunit tusaaneqarsin­naallutik.