Jehovap Josafatsi illersoraa

Josafatsip, Juudami kunngiusup, Baalimut pilliiviit guutipiluillu aserorterpai. Inuit Jehovap inatsisaani qanoq allassimasoqar­neranik paasitik­kusuppai. Taamaattumik naalagaanertat Levikkullu Juudap illoqarfiinut tamanut aallartippai Jehovap inatsisaanik ilinniar­titsiar­tortillugit.

Inuiaat Juudap eqqaaniittut Juudamut saassus­sinissartik qunugivaat nalunngin­namikku Jehovamit najorneqartut. Allaat kunngimut Josafatsimut tunissutinik nassarput. Taavali Moabikkut, Ammonikkut aamma Se’irip qaqqaaneersut Juudamut saassus­siartorput. Josafatsip nalunngilaa Jehovamit ikiorneqar­tariaqarluni. Taamaattumik angutit, arnat meeqqallu tamaasa Jerusalemmimi katersortippai. Taakkua saannut pilluni qinuvoq: ‘Jehova, aatsaat illit ikiorutsigut ajugaasin­naavugut. Qanoq iliornis­satsinnik ikioqquvugut.’

Qinnutaa Jehovap akivaa oqarluni: ‘Erseqinasi. Ikiussaq­qaarpassi. Inissis­simallusi uninngaan­nassaasi, taava qanoq annaatis­sanerissi takussavarsi.’ Jehovap qanoq annaappai?

Aqaguani ullaakkut Josafatsip erinarsortartut ilaat toqqarpai oqarfigaalu sorsuttartut siornanni ingerlaaq­qullugit. Jerusalemmimiit Tekoamut ingerlaarput.

Jehovamut unnersiutigin­nillutik nipituumik erinarsor­neranni innuttani annaanniarlugit Jehova sorsuppoq. Ammonikkut Moabikkullu paatsiveerutsippai imminnullu sorsuutilersillugit, tamarmillu toqupput. Jehovalli Juudakkut, sakkutuut palasillu illersorpai. Nunani eqqaaniittuni najugaqartut Jehovap qanoq iliorsimanera tusarpaat, nalunngilaallu Jehovap innuttani illersorun­naanngikkai. Jehova innuttaminik annaassiniarluni assigiin­ngitsorpas­suarnik iliuuseqartarpoq. Taamaalior­nissaminullu inunnit ikiorneqar­tariaqanngilaq.