Giidiuup Midjanikkut ajugaaffigai

Israalikkut piffissap ingerlanerani Jehova naalannagu guutipilus­sioqqilerput. Midjanikkut ukiuni arfineq-marlunni Israalikkut uumasuutaannik tillittarput nunamilu naatitaataannik aserorterisarlutik. Israalikkut Midjanikkunnit qimaallutik qaqqani qaarusunnilu toqqoqqapput. Jehovamut nilliallutik ikioqqupput. Jehovallu inngilini angummut inuusuttumut Giidiuumukartippaa. Inngilip oqarfigaa: ‘Jehovap sorsuttar­tussatut qunusuitsutut toqqarsimavaatit.’ Giidiuut aperivoq: ‘Qanoq ilillunga Israali annaassin­naagakku? Suunngilangami.’

Giidiuup Jehovamit toqqagaasimanini qanoq qulakkeersinnaavaa? Savap meqquinik nunamut iliseriarluni Jehovamut oqarpoq: ‘Aqagu ullaakkut meqqut kisimik isugutsersimas­sappata nunali eqqaaniittoq panerluni, taava paasissavara Israalikkut aniguisin­nissaannut atorusukkimma.’ Aqaguani ullaakkut meqqut masattorujus­suupput nunalu panerluni. Taavali Giidiuup kissaatigaa aqaguani meqqut panertuullutik nuna masassasoq. Taamaalisoqarmallu Giidiuup kiisami qulariun­naarpaa Jehovamit toqqarneqarsimalluni. Sakkutuuni Midjanikkunnut akiuunnis­saannut katersortippai.

Jehova Giidiuumut oqarpoq: ‘Israalikkut ajugaatis­savakka. Sakkutoorpas­suaqaravilli immaqa kingorna isumaqalissaasi nammineq ajugaasimallusi. Taamaattumik ersisut tamaasa oqarfigis­savatit angerlassasut.’ Taava sakkutuut 22.000-t angerlarput 10.000-llu uninngaan­narlutik. Jehovalu oqarpoq: ‘Sakkutuut suli amerlaval­laarput. Kuummukartikkit kuummiillu imeqqullugit. Angutit imernerminni akeqqanut alapernaasertut kisiisa toqqassavatit.’ Imertillutik alapernaasertut 300-innaapput. Jehova neriorsuivoq angutit taakku 300-t Midjanikkut sakkutuuinut 135.000-usunut ajugaajumaartut.

Unnuami Jehova Giidiuumut oqarpoq: ‘Midjanikkut saassun­nissaannut piffissan­ngorpoq!’ Giidiuup sakkutuuni immikkut tamaasa qarlortaammik marrarmillu imiisiviliamik ikumatitamik imalimmik tunivai. Taava oqarfigai: ‘Isigisinga ilaaqqis­saarlungalu.’ Giidiuut siggartaamminik qarlortarpoq marrarmillu imiisiviliani aserorlugu ikumatitanilu aalatiutigalugu nillialluni: ‘Jehova Giidiuullu pillugit panasi silutsissigit!’ Angutit 300-t aamma taamaaliorput. Midjanikkut ersisorujus­suupput sumullu tamaanga qimarrallutik. Paatsiveerun­nerminni Midjanikkut imminnut saassutilerput. Taamaalilluni Jehovap Israalikkut akeraannut ajugaateqqippai.