Siulersuisoq alla arnallu sapiitsut marluk

Josva ukiorpassuarni Jehovap innuttaanut siulersuisooreerluni 110-nik ukioqarluni toquvoq. Josva inuutillugu Israalikkut Jehovamik guutisior­tuarput. Toqummalli Kaanaanikkut ilaarlugit guutipilus­siortalerput. Israalikkut Jehova guutisiorfigin­ngimmassuk Kaanaanimi kunngip Jabinimik atillip taakku Jehovap akuerisaanik erloqinar­torsiortippai. Israalikkut ikioqqullutik Jehova qinnuigaat. Jehovallu allamik siulersuisoqalersippai Baarakkimik atilimmik. Taassuma Israalikkut Jehovamut uternis­saannik ikiussavai.

Pruffiitip Deboramik atillip Baarakki aggeqquaa Jehovamin­ngaanniit nalunaarutis­saqarluni: ‘Angutinik 10.000-nik nassarlutit kuunnguamut Kishonimut Jabinip sakkutuui naapikkiar­tussavatit. Tassani Jabinip sakkutuuisa naalagaanertaat, Sisera, ajugaaf­figissavat.’ Baarakkip Debora oqarfigaa: ‘Ilaassaguit aatsaat aallassaanga.’ Debora akivoq: ‘Ilagissavakkit. Illilli Sisera toqunnavianngilat. Jehovami oqarsimavoq arnamit toqunneqarumaartoq.’

Debora, Baarakki sakkutuullu 10.000-t qaqqamut Taborimut majuarput sorsunnissamut piareersariar­torlutik. Siserap tamanna tusaannarlugu qamutini sorsuutit sakkutuunilu qaqqap ataanut qooqqumut katersortippai. Debora Baarakkimut oqarpoq: ‘Ullumi Jehovap ajugaatis­savaatit.’ Baarakki sakkutuunilu qaqqamit aterasuarput Siserap sakkutuuinut nukittoorsuarnut akiuukkiar­torlutik.

Taava Jehovap kuunnguaq Kishoni qarsutsippaa. Nuna marulluin­nanngormat Siserap qamutai sorsuutit marripput. Taamaattumik Sisera qamutiminit sorsuutinit arpalluni qimaavoq. Baarakki sakkutuuilu Siserap sakkutuuinut ajugaapput, Siserali qimaavoq! Arpaannaq arnap Jaelimik atillip tupianut toqqorpoq. Jaelip immummik tunivaa tippimillu qipillugu. Sorsuttartorlu qasuuikkami sinilerpoq. Taava Jaeli mianersoq­qissaarluni Siseramut qanilliartorpoq, toqqullu paagutaa niaquanut kappuppaa. Taamaalillunilu Sisera toquvoq.

Baarakkip Sisera ujalerpaa. Jaeli tupiminiit anigami Baarakkimut oqarpoq: ‘Iserit, angut ujakkat takutissavara.’ Tupimut iserami Baarakkip Sisera toqungasoq takuaa. Jehovap Israalikkut akeqqaminnut ajugaatis­simammagit Baarakkip Deborallu erinarsorlutik Jehova unnersiutigaat. Ukiuni 40-ni tulliuttuni Israalimi eqqissineqarpoq.