Imigassaq pillugu qitornat oqaloqatigiuk

“Panipput arfinilinnik ukioqartoq imigassaq pillugu oqaloqatigeq­qaarparput. Imigassaq pillugu ilimagisatsinnit ilisimasaqar­nerunera tupaallaatigaarput.” – Alexander.

• Ilisimasariaqakkat

• Qanoq iliorsin­naasutit

• Imigassaq pillugu Biibilimi qanoq allassimasoqartoq

Ilisimasariaqakkat

Imigassaq pillugu qitornat oqaloqatigis­sallugu pingaaruteqarpoq. Oqaloqatiginissaa kinguar­tippallaaqinagu. “Ugguarisarpara imigassap qanoq atorneqarnissaa pillugu ernerput siusinnerusukkut oqaloqatigisiman­nginnakku,” Khamit Ruslandimeersoq taama oqarpoq. “Oqaloqatigiit­tarnissap pingaaruteqassusia misiginerluutigeq­qaarlugu paasivara. Sunaaffa ernera 13-inilli ukioqarluni imigassar­tortalereersimasoq.”

Sooq tamanna pingaaruteqarpa?

• Atuaqataasa, pilerisaarutit aallakaatitassiallu qitornavit imigassamut isiginnittaasia sunnersin­naavaat.

• 2015-imi misissuinermi inuusuttut qallunaat apersor­neqaramik agguaqatigiisillugu 73 procentii akisimapput qaammammi kingullermi imigassar­torsimallutik 32-llu procentii aalakoorsimallutik. – The European School Survey Project on Alcohol and Other Drugs (ESPAD)

Tupinnan­ngitsumik peqqinnis­saqarfinniit siunnersuutigineqartarpoq angajoqqaat meeqqatik imigassar­tornerup navianaataanik siusissukkut oqaloqatigisassagaat. Qanoq taamaaliorsinnaavit?

Qanoq iliorsin­naasutit

Qitornavit apeqqutissai piareersimaf­figikkit. Meeqqat apersor­tuupput. Meeqqat anginerulaat suli apersor­nerusarput. Taamaattumik akissutissannik piareersimatitaqar­tariaqarputit. Assersuutigalugu uku:

• Qitornavit paaserusuppagu imigassaq qanoq mamassuseqarnersoq oqarsin­naavutit viinni seernartumik mamassuseqartoq immiaararlu sungarnitsumik.

• Qitornavit imigassaq usserusuppagu oqarsin­naavutit meeqqanut kimittual­laartoq. Qanoq sunniuteqar­tarnersoq ima nassuiarsinnaavat: Imigassap inuup timaa qasukkar­tittarpaa, ingasaallugulu imeraanni inuup silaa kaavilersinnaavoq peqqissimis­sutigisin­naasaminillu oqaaseqarlunilu iliuuseqar­toorsin­naalluni. – Ussatit 23:29-35.

Nammineerlutit misissuigit. Biibilimi allassimavoq: “Silatooq kinaluunniit ilisimasaqarnikkut iliuuseqartarpoq.” (Ussatit 13:16) Imigassar­tornerup sunniutigisinnaasai aamma nunassinni imigassamut tunngatillugu inatsisit qassinillu ukioqalereersimanissaq pillugit paasiniaagit. Taamaalioruit meeqqavit ikiornissaanut piareersimal­luassaatit.

Imigassap eqqartor­nissaanut aallarniigit. Mark, ataataasoq Tuluit Nunaanneersoq, ima oqarpoq: “Meeqqat inuusut­tuaqqallu imigassamut tunngatillugu suna eqqortuunersoq nalornis­sutigisarpaat. Ernera 8-nik ukiulik eqqissisimasumik aperaara imigassar­tornissamut suna eqqortuunersoq sunalu eqqunngitsuunersoq nalunnginneraa. Taava ammalluni isummani annippaa.”

Immaqa imigassaq arlaleriarlutit eqqaasarukku sunniuteqarluar­nerussaaq. Qitornavit ukiui apeqqutaatillugit, biilertilluni isumannaal­lisaaneq pillugu imaluunniit atoqateqarnermut tunngasut pillugit imigassar­torsimanerup sunniutigisinnaasai eqqaasin­naavatit.

Nammineq maligas­saalluarit. Meeqqat suut tamaasa maluginiar­tarpaat. Misissuinerit ersersippaat angajoqqaat tassaasut meeqqaminnut sunniuteqar­nerpaasartut. Tassa imigassaq qasuersaatitut eqqissisaatitul­luunniit atortarukku qitornat isumaqalersinnaavoq ajornar­torsiutit taamatut aaqqinneqarsinnaasut. Taamaattumik maligas­saalluarit. Illit imigassamut silassorissumik isiginnit­taaseqassaatit.