Kamanneq pillugu Biibilimi qanoq allassimasoqarpa?
Akissut Biibilimeersoq
Biibilimi ilinniartitsissutigineqarpoq kamanneq aqunneqanngitsoq ajoqutaasoq, kamattumut aamma inunnut kamattup eqqaaniittunut. (Ussatit 29:22) Ilaannikkut pissuteqarluarluni kamattoqarsinnaavoq, Biibilimili allassimavoq kamarujussuartartut ‘Guutip kunngeqarfianik kingornussisussaanngitsut’. (Galaatiamiut 5:19-21) Kamannermik aqutsilluarsinnaanissamut Biibili najoqqutassiaqarpoq iluaqutaasunik.
Kamannissaq tamatigut eqqunngitsuliornerua?
Naamik. Ilaannikkut kamannissaq naleqqussinnaasarpoq. Assersuutigalugu angut upperluartoq Nehemia ‘assut kamalerpoq’ paasigamiuk uppeqatimi ilaat naqisimaneqartut. – Nehemia 5:6.
Aamma Guuti ilaannikkut kamattarpoq. Assersuutigalugu itsaq innuttami neriorsuutertik unioqqutikkamikku guutipiluillu guutisiorfigisalerlugit Jehovap ‘kamaatingaalerpai’. (Eqqartuussisut 2:13, 14) Taamaakkaluartoq Jehova tassaanngilaq Guuti kamajasoq. Kamaleraangamili tamatigut taamaaliornissaminut pissutissaqarluartarpoq aqulluarsinnaasarlugulu. – Mosesimik 2. 34:6; Esaja 48:9.
Kamannissaq qaqugukkut eqqunngitsuliornerusarpa?
Kamanneq aqunneqanngitsoq tunngaveqanngitsorlu eqqunngitsuliorneruvoq. Inuillu naammalluinnanngitsut kamattarnerat taamaakkajuppoq. Aajuku assersuutit:
Pilliutini Guutip iluarinngimmagu Kaini kamarujussualerpoq. Kainillu kamannini nununagu alliartortikkamiuk naggataatigut nukkani toquppaa. – Mosesimik 1. 4:3-8.
Guutip Niinivimiut naakkigigamigit pruffiitip Juunap kamaatigaa. Guutip Juuna naqqippaa paasitillugu kamannera eqqortuunngitsoq, ajortuliortullu peqqissimisut misiginneqatigisussaagaluarai. – Jona 3:10–4:1, 4, 11.a
Assersuutit taakkua Biibilimi ilumoortoq una erseqqissarpaat: “[Inuup] kamannera Guutip isaani eqqortuliornermik kinguneqarneq ajorpoq.” – Jaaku 1:20.
Kamanninnik qanoq aqutsisinnaavit?
Ilisimassavat aqussinnaanngisamik kamanneq sanngiissutaasoq. Inuit ilaat isumaqarput kamannertik ersersittarunikku nukittuujunermut ersiutaasoq. Biibilimili allassimavoq: “Illoqarfittut ammaannartutut qarmaajakkatut ippoq angut imminut naalakkersinnaassuseqanngitsoq.” (Ussatit 25:28; 29:11) Tassa imminut aqussinnaanani kamattartoq sanngiissuteqarpoq iliuuseqarfigisariaqakkaminik. Kamannittali aqunnissaa ilikkarutsigu ilumut oqarsinnaanngussaagut nukittulluta naliliilluarsinnaallutalu. (Ussatit 14:29) Biibilimi allassimavoq: “Kamajaatsuuneq pitsaaneruvoq pissarsuulluni sorsuttartuunermit.” – Ussatit 16:32.
Peqqissimissutigisannik iliunnginniassagavit kamannerpit aqunnissaa ilikkaruk. Tussiaat 37:8-mi allassimavoq: “Kamannaveersaarniarit uumitsattarunnaarlutillu, narrutsannaveerit tamanna ajunaarutaaginnartussaammat.” Tassa kamalerutta aalajangigassaqarpugut. Aalajangersinnaavugut ajortumik iliunnginniassagatta kamassimajunnaarniarluta. Taamaalilluta siunnersuut Efesossimiut 4:26-mi allassimasoq maleruassavarput: “Kamalerussi ajortuliussanngilasi.”
Malugigukku kamalerlutit ajornanngippat sammisaq alla eqqartuleruk qimagullutilluunniit. Biibilimi allassimavoq: “Oqqateqalerneq sapummik ammaanertut ippoq. Assortuunnersuaqalertinnagu qimagutiinnarit.” (Ussatit 17:14, New World Translation) Ajornartorsiummik piaartumik aaqqiinissaq silatusaarnerugaluartoq, imaassinnaavoq eqqissisimasumik oqaloqatigiissutigissagussiuk marluullusi qasukkarnissamut piffissaqaqqaartariaqartusi.
Misigissutsinnit aqunneqannginniassagavit paasiniaagit. Ussatit 19:11-mi allassimavoq: “Inuk silatussusiata kamajaatsunngortittarpaa.” Eqqortumik inerniliiumalluta pissutsit piviusut ilisimasariaqarpavut. Allat iliuusiinut pissutaasoq paasiniarutsigu tusarnaaqqissaaruttalu pisariaqanngitsumik kamalernissarput ilimanannginnerussaaq. – Jaaku 1:19.
Qamuuna eqqissineq qinnutigiuk. Qinugaangatta ‘Guutip eqqissinera inuit paasisinnaasaannit annerungaartoq’ misigisinnaavarput. (Filippimiut 4:7) Pingaartumik qinunikkut Guutip anersaavanik tunineqarsinnaavugut. Guutillu anersaava illernartoq iluaqutigalugu eqqissineq, naammagittarneq, imminut aqussinnaaneq iluaqutaasinnaasullu allat ineriartortissinnaavagut. – Lukkarsi 11:13; Galaatiamiut 5:22, 23.
Kammalaatigerusutannik toqqaalluarit. Ilagisartakkatsinnit sunnerneqartarpugut. (Ussatit 13:20; Korintimiunut 1. 15:33) Taamaammat Biibilimi ima mianersoqqussuteqarpoq: “Narrajasumik ikinnguteqarniaqinak kamajasumillu peqateqarnaveersaarlutit.” Imalu nangippoq: “Taassuma inuusaasia ilinniarfigeqqunagu inuunerillu napiaaniutinut napititaaqqunagu.” – Ussatit 22:24, 25.
a Juunap Guutimit perorsaatissinneqarnini akuererpasippaa kamakkunnaarlunilu. Juunammi atuagaq ateqaatigisani allataa Guutip Biibilimut ilanngutitippaa.