Nefilimit kikkuuppat?
Akissut Biibilimeersoq
Nefilimit inorujussuupput inuit nalinginnaanngitsut nakuuserajuttut.a Taakku Noap nalaani inngilinit ajortunit arnanik innaassisunit qitornaapput.
Biibilimi allaatigineqarpoq Guutip ernerisa ‘inuit panii isigisaleraat pinnaralugit’. (1 Mosesi 6:2) Guutip erneri taakku pinngortitaapput anersaajusut Guutimut pikitsitsisut qilammi ‘inigisassaraluaminnik qimatsigamik’, inuttut timeqaleramik ‘pileritsaassaminnillu nulissiussisarlutik’. – Judasi 6; 1 Mosesi 6:2.
Pissusissamisuunngitsumik inngilinit inunnillu kinguaajusut meeraapput nalinginnaanngilluinnartut. (1 Mosesi 6:4) Nefilimit inorujussuusimapput peqqarniitsut, qunutitsigajuut nunarsuarmik nakuusernermik ulikkaarisut. (1 Mosesi 6:13) Biibilimi ‘pissarsuartut itsaq tusaamasatut’ allaatigineqarput. (1 Mosesi 6:4) Kingusinnerusukkut taakkua nakuusernerat inunnit ilaarneqartarpoq. – 1 Mosesi 6:5; 4 Mosesi 13:33.b
Nefilimit pillugit kukkusumik isummernerit
Kukkusoq: Nefilimit ullumikkut suli nunarsuarmi inuupput.
Eqqortoq: Jehova itsaq nunarsuaq tamakkerlugu ulersuartitsivoq silarsuaq nakuuserfiusoq suujunnaarsinniarlugu. Nefilimit inunnut ajortunut ilanngullutik piuneerussaapput. Noali ilaqutaalu Jehovamit iluarisaapput taamanikkullu aniguisutuaallutik. – 1 Mosesi 6:9; 7:12, 13, 23; 2 Petrusi 2:5.
Kukkusoq: Nefilimit inunnik ataataqarput.
Eqqortoq: Taakkua ataataat ‘Guutip ernerinik’ taaneqarput. (1 Mosesi 6:2, tastamantitoĸaĸ) Oqariartaaseq taanna aamma inngilit pillugit Biibilimi atorneqartarpoq. (Jobi 1:6; 2:1; 38:7) Taamanikkut inngilit inuttut timeqalernissamut pissaaneqarput. (1 Mosesi 19:1-5; Josva 5:13-15) Apustilip Petrusip ‘anersaat parnaarussaasut Noap nalaani Guuti nikallujuilluni utaqqitillugu naalasseriitsuunikut’ eqqartorpai. (1 Petrusi 3:19, 20) Taakkua atugaannut assingusut innersuussutigalugit Biibilimik allaqataasoq Judasi nassuiaavoq inngilit ilaat “suliassaminnik pingaaqisunik nakkutiginninnatik inigisassaraluaminnik qimatsisut”. – Judasi 6.
Kukkusoq: Nefilimit inngiliupput ajortuliorsimasut.
Eqqortoq: 1 Mosesi 6:4-mi allassimasunit erserpoq nefilimit inngiliunatik inngilit inuttut timeqalersimasut arnallu kinguaassiuutitigut atoqatigiinnerata kinguneranik inunngorsimasut. Inngilit taamanikkut ‘pileritsaassaminnik nulissiussisalermata’ Jehovap ukiut 120-t qaangiuppata silarsuaq guutiitsoq iliuuseqarfigiumaarnerarpaa. (1 Mosesi 6:1-3) Nangilluni allassimavoq inngilit inuttut timeqalersimasut taamanikkut suli ‘inuit panii innaattaraat qitornartaarfigalugillu pissarsuarnik itsarsuarli tusaamasanik’, nefiliminik. – 1 Mosesi 6:4.
a Biibilimi kalaallisuumi oqaaseq ‘inorujussuit’ atorneqartarpoq, Biibilinili allani oqaaseq “nefilimi” atorneqartarpoq. Nefilimi “uppititsisartut”-nik isumaqarunarpoq. Wilson’s Old Testament Word Studies-imi allassimavoq oqaaseq taanna “nakuuserlutik ujajaallutillu inunnik uppititsillutik saassussisarnerannut” tunngassuteqartoq.
b Israelikkut alapernaarsuiartortitaat 4 Mosesi 13:33-mi issuarneqartut inunnik nefiliminik, inuit oqaluttuaanni eqqaaneqartut ukiullu hundredit arlallit tamatuma siorna toqusimasut, eqqaanartunik angissusilinnik takusimapput. – 4 Mosesi 13:33; 1 Mosesi 7:21-23.