Meeraq inoorusuk­kunnaarpat

Ukiuni kingullerni inuusuttut imminut toquttut nunat ilaanni amerliar­torsimapput. Sunaana pissutaasoq? Illit qitornat imminut toqunnis­saminik eqqarsaateqartarpa?

Allaaserisami matumani

• Meeqqat imminullu toqunneq – Sooq angajoqqaat eqqumaf­figissavaat?

• Qanoq ilisimasin­naaviuk qitornat imminut toqunnissamik eqqarsaateqartoq?

• Qitornat imminut toqunnis­saminik eqqarsaateqarpat sussavit?

Meeqqat imminullu toqunneq – Sooq angajoqqaat eqqumaf­figissavaat?

2009-miit 2019-imut USA-mi ilinniar­nertuun­ngorniarfinni ilinniartut isumatsaq­qarujus­suarnermik ersiuteqartut 40 procentinik amerleriarsimapput. Aamma ukiuni taakkunani imminut toquttut amerleriarsimapput.a

“Nalitsinni ajornar­torsiutit inuusuttut nalaattagaat aatsaat taama sakkortutigipput … Tamakkulu inuusuttut eqqarsar­taatsikkut peqqissusiannut sunniuteqangaatsiarsimapput.” – Vivek H. Murthy, USA-mi Peqqinnissamut Qullersaqarfimmi pisortaq.

Najoqqutassiaq Biibilimeersoq: ‘Nikallunganeq saanernik aseroriar­tortitsisarpoq.’ – Ussatit 17:22, Testamentitoqaq 1990-imi naqitigaq.

Qanoq ilisimasin­naaviuk qitornat imminut toqunnissamik eqqarsaateqartoq?

Uku eqqarsaatigikkit:

• Pisimasut. Qitornat sakkortuumik misigisaqarnikuua – tatigisaminit sumigin­narneqarnikuua, ilaqutariinni avittoqarnikuua, arlaannik iluatsitsin­ngitsoornikuua, imaluunniit toqukkut annaasaqarnikuua? Taamaat­toqarsimappat illit ilimagisannit sakkortunerusumik qitornannut sunniuteqarsimava?

• Pissusilersornera. Qitornat ikinngutiminit ilaquttaminil­luunniit ungasil­lisimava? Sunngiffimmi nuannaralugit sammisar­takkani soqutigiun­naarpai? Pigisani nuannaril­luakkani allanut tunnius­simavai?

• Oqaasii. Qitornavit toqu eqqartortarpaa? Imaluunniit oqartarpa “maaniin­ngikkaluaruma pitsaanerus­sagaluarpoq”, assingusumil­luunniit? Ilinnut nanertuutaarusunnani oqartarpa?

  Soorunami taamatut oqaluttarneq ‘isumaatsutut oqaluin­narnerusinnaavoq’. (Jobi 6:3) Aammali imaassinnaavoq ikiortis­sarsior­neranut ersiutaasoq. Taamaattumik qitornat toqorusun­nerarpat oqaasii sumigin­nanngisaannakkit.

Qitornavit imminut toqunnissani eqqarsaatigisimanerarpagu ima aperisinnaavat: “Qaqugu qanorlu taamaalior­niarlutit eqqarsaatigereerpiuk?” Akissutaatigut paasisinnaavat qanoq pimoorus­sitiginersoq.

“Angajoq­qaajusugut qitornatta tusarusun­ngisatsinnik akissuteqar­nissaat merseriin­narlugu apeqqutigerusutagut nipangiusimas­sanngilagut. Oqaasiili qanorpiaq inneranut ersiutaappata tamatuma paasinissaa pitsaanerussaaq.” – Sandra.

Najoqqutassiaq Biibilimeersoq: “Inuup eqqarsaatai imertut itisuutut ipput; silassorissoq taakkuninnga qalooraasin­naasarpoq.” – Ussatit 20:5, Testamentitoqaq 1990-imi naqitigaq.

Qitornat imminut toqunnis­saminik eqqarsaateqarpat sussavit?

• Eqqissillutit paasiniaruk qitornat qanorpiaq misiginersoq eqqarsar­nersorlu. Siullertut, unneqqarinnera pillugu nersualaaruk. Taava ima oqarsin­naavutit: “Inuuninni pisimasut misigis­sutsitillu paasilluarusuppakka. Qanittukkut susoqarsimaneranik oqaluttuus­sinnaavinga?” imaluunniit “Nassuiaas­sinnaavinga suna taamatut misigilis­sutigigit?”

  

  Qitornavit akissutaanut tusarnaaq­qissaarit. Misigissusii suusupageqinagit imaluunniit ajornar­torsiutaanut aaqqiis­sutissamik siunnersuiniapal­laqinak.

  Najoqqutassiaq Biibilimeersoq: “Kinaluunniit tusaaniapal­lattassaaq, oqalunniapal­lattassanngilaq kamajasuujus­sananilu.” – Jaaku 1:19.

• Pilersaarusiorit. Ataani allassimasut qitornallu eqqartorsigit eqqartukkasilu allattorlugit.

  Eqqumaf­figisassat. Pissutsit eqqarsaatil­luunniit qanoq ittut imminut toqunnissamik eqqarsalis­sutigisarpai?

  Iluaqutissat. Suut stresserun­naarnis­saminut allamillu eqqarsaateqaler­nissaminut iluaqutigisarpai?

  Ikiuisinnaasut. Qitornat pisariaqar­titsigaangami oqaloqatigisin­naasaqarpa? Illiusinnaavoq, inersimasuusinnaavoq alla, psykologiusinnaavoq, imaluunniit imminut toqunnissamik pinaveersaar­titsiffimmi sulisuusinnaavoq.

  

  Najoqqutassiaq Biibilimeersoq: “Eqiasuitsup pilersaarusiai iluanaarutis­sarsisitsisarput.” – Ussatit 21:5.

• Eqqumaf­figiuaruk. Qitornat qanoq innersoq, pitsanngorpasis­simagaluarpal­luunniit, eqqumaf­figiuaruk.

  “Ernerma oqarfigimmanga imminut toqunnissamik eqqarsaateqarun­naarsimalluni isumaqaraluarpunga ajornar­torsiutaa qaangius­simasoq. Tamanna kukkunerujussuuvoq. Tassanngaannaq pisoqarsinnaavoq imminut toqunnissamik eqqarsaateqalersitseq­qittumik.” – Daniel.

  

  Inuusut­tuaraatinnut ilumoortoq tunngaviusoq una paasitiguk: Misigissutsit allanngortarput. Qarasaq pillugu atuakkami ima allassimavoq: “Misigissutsit silatulli allanngorartarput. Sialuk piviusuuvoq. Taamaattumik sialussuar­tillugu siallin­ngitsutut pissusilersoraanni sianiitsulior­nerussaaq. Aammali sianiitsulior­nerussaaq eqqarsaraanni seqineq nueqqin­ngisaan­nassasoq.” – The Whole-Brain Child.

• Qitornavit tatigisin­naagaatit ilisimatiguk: Asaneraruk, oqarfigalugulu ikiornissaanut piareersimajuartutit. Oqarsin­naavutit: “Taamatut misigininni sapinngisara tamaat ikiorusuppakkit.”

  Najoqqutassiaq Biibilimeersoq: “Ikinngutaasup asannissutsi tamatigut takutittarpaa, qatanngutaasorlu erniusimavoq annikil­liornermi ikiortis­saalluni.” – Ussatit 17:17.