Siulersuisoqatigiinnit allakkat

Salliutitaangaarpugut! Jehovap Nalunaajaasuisut Jehova, Guuti ilumoortutuaq, silarsuarmik Pinngortitsisoq, ilisimaannarnagu, aammali aqqanik atuinerput kiffartornerpullu immikkut pisinnaatitaaffigaarput. Sunik annerusunik pilluaqqusaasinnaavugut? — Es. 43:12; Hebr. 8:11.

Annaanneqarnissaq neriuutigaarput Naalagaaffillu pillugu nutaarsiassaq nuannersoq oqaluussissutigisussaavarput allattaaq neriuuteqalersinnaaqqullugit Jehovamullu kiffartulersinnaaqqullugit. (Matt. 24:14; Rom. 10:13, 14; 1 Thess. 5:8) Aammattaaq silarsuaq tamakkerlugu qatanngutigiissuarnut Guutimut pallorfiginnittunut ikioqatigiillutillu asaqatigiittunut ilaanerput nuannaarutigaarput. Tamakku tamarmik nuannaarutaangaarput.

Taamaattumik Biibilimi naleqquttumik ima qaaqquneqarpugut: „[Jehvova] kiffartorfigisiuk tipaatsuummik erinarsorlusi, . . . Isaaffiisigut iseritsi qujaniummik tussiarlusi, silarliutaanut iseritsi erinalimmik unnersiutiginnillusi. Qutsavigisiuk aqqa unnersiutigisiuk! [Jehova] ajunngitsuummat unneqqarissusia atavoq naassaanngitsumik, ilumuussusialu kinguaariikkuutaani.“ (Tus. 100:2-5) Jehovamut nuannaarluni kiffartorneq tassunga inuttut qanittumik attaveqarnermut toqqaannartumik attuumassuteqarpoq. Taamatut attaveqarnissamut periarfissaqartippaatigut, ineriartortinnissaalu immikkut pisinnaatitaaffigaarput. Jehovamut taamatut attaveqarutta pisariaqartikkaangatsigu ikiortuassagaatigut nakussatsittuassagaatigullu nalunngilarput. Tatigilluinnarparput pissutsit aaqqissuussaanerata matuma ulluini kingullerni inuunermi unamminiarnartut anigornissaannut pisariaqartumik anersaakkut nakussatsillutalu siulersussagaatigut. Qanorluunniit tatineqaraluarluta kiffartornerput nuannaarutigaarput ullullu tamaasa Jehovap Biibilimi oqaatigineqartutut isumassormatigut qutsavigaarput. — 1 Petr. 5:7.

Ukiuni qaangiuttuni Jehovap pilluaqqungaartarpaatigut. Ataatsimeersuarnermi „Oqaatsimik naammassinnittut“-mik qulequtalimmi nuannaarutigaarput uppeqativut tusintilippassuit katersuuteqatigisinnaagatisigit, erinarsoqatigisinnaagatsigit Jehovallu anersaakkut nerriviani nereqatigisinnaagatigit. Ilagiit atuakkamik atuaqqissaqatigiinneranni atuagaq Giv agt på Daniels profeti! uppernikkut nakussatsinnartoq atuaqqissaaqatigiissutigaarput. Aammattaaq atuagaq nutaaq Esajas’ profeti — et lys for alle mennesker atuakkat immikkoortuat siulleq pisarput pissanganarpoq. „Ermusera ulikkaarsimavoq.“ — Tus. 23:5.

Anersaakkut qatanngutit millionillit Jehovamut kiffartoqatiginerat nalunagu nuanneqaaq. Aammattaaq oqaluussinermut tunngatillugu amerlanerpaaffiit nutaat atuaratsigit qiimmaallannaqaaq. Nuannaarutigaarput silarsuarmi pissutsit taamaakkaluartut eqqaaniaanermut millionilipassutit najuummata. Silarsuarmi oqaluussiffik qimerlooraangatsigu katersuagassat amerlaqisut malunnarpoq. (Luk. 10:2) Siorna sapaatip-akunneri tamaasa agguaqatigiissillugu 5555-it Biibilimik atuaqqissaarnerminni ima siumukartigisimapput tunniulluinnarnertik kuisinnermikkut takutissimallugu. Silarsuup ilaani sumiiffinnit allanit katersuisoqarnerusimavoq, Jehovalli suliai tamaasa nuannaarutigaavut. Kiffami ataasioqatigiillutik suliaannik pilluaqqusineranut nalunaajaateqarnera erseqqippoq.

Nutaanik naalagaaffilersaarfiliortiterneq nuannaangaarnermut pissutaasut ilagaat. Nuannaarutigeqaarput qatanngutitta nunani ineriartortitaannginnerusuni uummammik tamakkiisumik suliamik tamatuminnga tapersersuinerat takullugu. Naalagaaffilersaarfiit hundredelikkuutaat naalagaaffilersaarfiliortartunit pisariaqartumik ilinniartitaasunit sanaartorneqareerput. Qatanngutit taakku naalagaaffilersaarfiliornerit siulersorniarlugit ilagiinniit ilagiinnut nuttartuarput. Naalagaaffilersaarfinnik tusintilikkuutaanik suli sanaartugassaqarmat suliamut pisariaqartumut tamatumunnga nunani ineriartortitaannginnerusuni nammineq kajumissutsiminnik sulisussat amerlanerusut nalunaaqqullugit kajumissaarpavut. Nunat taakkua arlaanniikkuit illit taamaaliorusussinnaavit? Qatanngutitta asasatta namminneq nalaaffilersaarfimminni katersuussinnaanertik nuannaarutigeqaat. Aammattaaq aningaasatigut ikiorneqarnerminnut katersuuffissaqalernerminnullu silarsuarmi qatanngutigiissuarnut qujamasoqaat.

Inatsisitigut ajugaanerput tusarlugu tupinnaqaaq. Aammattaaq sumiiffippassuarni inuit sunniuteqarluartut Jehovamut pallorfiginninneq inerteqqutaalersinniarpaat. Tamanna iliuuseqarfigiuarusupparput, aammattaaq qularutiginngilarput qanorluunniit akerlilersuisut amerlatigigaluarpata qanorluuniillu kiffani qajannarsorinartigigaluarpata Jehovap ikiuisinnaanera. (2 Nal. 14:11) Pallorfiginninnermut ilumoortumut aalajaattuartut qatanngutit tamaasa nersualaarniarpavut.

Kristumiutut pisussaaffissinnik nuannaarutiginniitigalusi uppernersi nakussatsinniarsiuk Jehovallu siulersuinera tatigilluinnarlugu. (Uss. 3:5, 6) Akeraq qanorluunniit iliortitaagaluarpat nikallortariaqanngilagut. Elisap kiffaminut isumakuluttumut qiimmassaataa eqqaamajuk: „Ersissanngilatit, uagut ilivut akeqqatta iliinit amerlanerupput!“ (2 kun. 6:15-17) Jehovap qilammi sakkutuui pallorfiginninnerup minguitsup soqutigisaanik illersuinissaminnut Elisap nalaanitulli piareersimatigipput. Siunissaq isumalluarfigaarput. Jehovap pissaaneq pigaa. Inuiaat akerlilersorsinnaanngivippaat. Erni kunnginngortippaa naalakkersuinissaanullu tamakkiisumik oqartussaassuseqartillugu. „Pilluarpoq taassumani qimarnguissarsiortoq.“ — Tus. 2:1-6, 12.

Qatanngutit asanartut, puiunngisaannarsiuk tamassinnut asanningaarnerput. Qamannga pisumik qinnutigaarput „aalajaaqqullusi naammalluinnartooqqullusi qularutiginngilluinnaqqullugulu tamatigut Guutip piumasaata suunera“. — Kol. 4:12.

Qatanngutisi

Jehovap Nalunaajaasuisa Siulersuisoqatigiivi