„Guutimut ajornartoqanngilaq“
1 Ilagiit kristumiut suliassaasa annersaat tassaavoq Guutip Naalagaaffianik tusagassap silarsuaq tamakkerlugu oqaluussissutiginissaa. (Mat. 24:14) Tamanna suliassarujussuuvoq. Alaatsinaattorpassuit isumaqarput oqaluussinissamik suliamut tamatumunnga atortorisinnaasat oqaluussisussallu naammanngerujussuartut. Ilaasa paasimiunaatsippaat illaruaatigineqaraluarluta, assortorneqaraluarluta qinugineqaraluarlutalu oqaluussisinnaagatta. (Mat. 24:9; 2 Tim. 3:12) Qulartut isumaqavipput suliamik taamaattumik naammassinnittoqarsinnaanngitsoq. Jiisusili oqarpoq: „Guutimut ajornartoqanngilaq.“ — Mat. 19:26.
2 Maligassiuilluartut malissinnaasavut: Jiisusip kiffartornini aallartikkamiuk kisimiilluni silarsuarmut akiuuppoq. Assortuisuisa sapinngisartik tamaat unitsinniaraluarlugu ajortorujussuarmik pisarpaat, naggataatigullu naalliutsillugu toqullugu. Taamaattoq Jiisusi tatiginnilluni nalunaarsinnaavoq: „Silarsuarmut ajugaareerpunga.“ (Joh. 16:33) Naammassisap nuanningaassusia!
3 Jiisusip ajoqersugai taamatut aamma sapiilluinnarlutik ilungersorlutillu kiffartorput. Amerlasuut iperartorneqarput, unatarneqarlutik, parnaarussaallutik allaallu toqutaallutik. Taamaattoq ’nuannaarput Jiisusip aqqa pillugu narrunarsagaanissamut qinngaqqunnartitaannginnamik’. (Aps. 5:41) Pissutsini taama ajornartorsiorfiutigisuni nutaarsiassaq nuannersoq ’nunarsuup isua tikillugu allaat’ oqaluussissutigineqarnerani suliaq naammassineqarsinnaarpasinngitsoq naammassivaat. — Aps. 1:8; Kol. 1:23.
4 Qanoq iluatsissasugut: Uaguttaaq Guutip naalagaaffia ilungersorluta oqaluussissutigaarput, naak naammassineqarsinnaanngitsutut isikkoqaraluartoq. Inerteqqutaagaluartoq, qinuginnittoqaraluartoq, parnaarussaasoqartaraluartoq allatigullu unitsinniarneqartaraluarluta oqaluussineq siuariartorpoq. Tamanna qanoq pisinnaava? „Inuit pissaaneratigut pinnani inuillu nakuussusiatigut pinnani uanga anersaakkut pissaaq, oqarpoq Katersaarsuit [Jehovaat]!“ (Zak. 4:6) Tamanna Jehovap suliarimmagu kialuunniit imaluunniit suulluunniit unitsissinnaanngilaa. — Rom. 8:31.
5 Oqaluussigaangatta ittoornissatsinnut ersinissatsinnut imaluunniit naammanngitsutut misiginissatsinnut pissutissaqanngilagut. (2 Kor. 2:16, 17) Guutip naalagaaffianik ilungersuussilluta oqaluussiuaannarnissatsinnut pissutissaqarluaqaagut. Jehovap ikiuineratigut „inummut ajornartut“ anigorsinnaavavut. — Luk. 18:27.