Ittuutugaluarlunga oqaluus­sisartutut aallartitan­ngorpunga

1951-imi Wienimi Østrigimiittumi inunngorpunga, angajoqqaanni katuuliusuni peroriar­torlunga. Ittoortuuvunga, Guutimulli upperisannut ammasumik qinusarpunga. Qulingiluanik ukioqartunga ataataga Jehovap Nalunaajaasuinik atuaqqis­saaqateqar­talerpoq, kinguninngualu anaanaga ilaasalerpoq.

Sivitsun­ngitsoq Wienimi Döbling ilagiit peqataaf­figisalerpagut. Suna tamaat ilaqutariittut aalluttarparput. Biibilimik atuaqatigiit­tarpugut, ataatsimeeqatigiit­tarpugut ataatsimeersuar­nernilu kajumis­sutsitsinnik ikiuuttarluta. Suli meeraasunga ataatama Jehovap asangaar­nissaanut killinniar­tuartarpaanga. Ataatama qinunermini nukaralu pionerin­ngornissarput ilanngut­tuartarpaa. Uangali tamanna taamani siunertarin­ngilluin­narpara.

PIFFISSAQ TAMAAT KIFFARTOR­TUNNGORPUNGA

1965-imi 14-inik ukioqarlunga imermut morsutsitaavunga. Inunnulli nalusannut oqaluus­sinissara sapernar­tingaarpara. Aamma imminut nikagisupilus­suuvunga inuusut­toqatinnillu akuerineqar­nissara kissaatigingaar­tarlugu. Jehovamut kiffartun­ngitsunik ikinngutitaar­tulerpunga taakkulu ilagiuaan­nartalerlugit. Nalunaajaasuun­ngitsulli ilagiuar­talerakkit ilerasuutigisarpara. Peqatigisarun­naarnissaalli ajornar­teqaara. Sunali allannguis­sutigaara?

Tamatuma nalaani inuusut­tunnguaq 16-inik ukiulik Dorothéemik atilik oqaluus­sisartun­ngorpoq. Illumiit-illumut oqaluus­silluni nuannarin­ninnera tupigusuutigisarpara. Uanga angajul­liunerulaarpunga, oqaluus­serpiar­tanngilangali. Ima eqqarsarpunga: “Uanga angajoqqaakka Nalunaajaasuupput, Dorothéelli ilaqutai Nalunaajaasuun­ngillat. Anaanani napparsimasoq najugaqatigaa, taamaattorli oqaluus­siuarpoq!” Maligas­saalluarnera iliuuseqar­nerunissannut kajumis­sissutigaara. Kinguninngualu Dorothéelu pionerioqatigiilerpugut. Ikiorti-pioneritut aallarteq­qaarpugut. Kingornalu marluulluta pionerin­ngorpugut. Dorothéep aallussil­luarnera uannut sunniuteqarluarpoq. Siullerpaamik Biibilimik atuaqqis­saaqateqaler­nissannik ikiorpaanga. Piffissap ingerlanerani inunnut sumiikkaluar­tunulluunniit, soorlu illuni aqqusinernilu, saaffigin­ninnissannut saperun­naariar­torpunga.

Pioneritut suli ukioq ataasin­ngornagu qatanngut angut Heinzimik atilik ilagiitsinnut nuuppoq. Heinzip Canadamut angajuminut Nalunaajaasuusumut tikeraar­tilluni ilumoortoq paasisimavaa. Maannalu Wienimi ilagiitsinnut specialpioneritut kiffartoriar­tortinneqarluni nuuppoq. Ingerlaannaq misigis­suseqarfigilerpara. Heinzip oqaluus­sisartutut aallartitan­ngornissani anguniagaraa. Uangali tamanna anguniagarin­nginnakku qanoq misigis­suseqarfiginerlugu aallaqqaammut oqaatigin­ngilara. Taamaattorli kingusin­nerusukkut peerariilerpugut, katereerattalu Østrigimi pionerioqatigiilerpugut.

OQALUUS­SISARTUTUT AALLARTITAANISSAQ ANGUNIAGARILERPARA

Heinzip oqaluus­sisartutut aallartitan­ngorusunnini eqqaakulasarpaa. Pinngitsaalineq ajorpaanga, eqqarsalersitsisumilli aperisarpaanga. Assersuutigalugu imatut: “Meeraqan­nginnerput eqqarsaatigalugu Jehovamut kiffartor­nitsinni iliuuseqar­nerusin­naavugut?” Pioneriugaluarpunga, ittoortarnerali pissutigalugu oqaluus­sisartutut aallartitatut kiffartuler­nissara takorloorsin­naanngilara. Heinzilli tamanna anguniagariuarpaa. Aamma kajumis­saartarpaanga imminut eqqarsaatigival­laarnanga inuit allat qanoq ikiorsin­naanerlugit eqqarsaatigeq­qullugu. Kajumis­saarutaalu iluaqutigeqaara.

Oqaluus­sisartutut aallartitan­ngornissamik kissaat arriitsun­nguamik ineriar­tortippara. Ilinniarfimmulli Gileadimut qinnuteqaratta immikkoor­tortaqarfimmi nakkutilliisup siunnersorpaanga tuluttut pikkorin­neruler­nissara sulissutigeq­qaaqqullugu. Siunnersuutaa malippara, ukiullu pingasut qaangiummata Østrigi qimannagu Salzburgimi ilagiinni serbo-Kroatiamiusut oqaluttuni suliassin­neqarpugut. Ukiut arfineq-marluk tulliuttut tassani kiffartorpugut, taakkunanilu ukioq ataaseq uiga ilagiinnik nakkutil­liisutut angalaqatigisarpara. Serbo-Kroatiamiusut oqaatsit nalunar­torujus­suupput, Biibilimilli misissueqaterpas­suaqalerpugut.

Taava 1979-imi qinnuigineqarpugut Bulgariamut “feerias­sasugut”. Oqaluussineq tassani inerteq­qutaammat oqaluus­sinngilagut. Biibililersaarutaatitsinnilli, qatanngutit arnat tallimat illoqarfimmi pingaarnermi Sofiami najugallit pissaannik, mikisuaran­ngorlugit naqitanik isertortumik eqqussivugut. Annilaangaqaanga, Jehovalli ikiorpaanga. Qatanngutit arnat taakku parnaarus­saariaan­naagaluarlutik sapiissuseqangaarput nuannaar­nertillu attattuarlugu. Maligas­saalluarnerat sapiissuseqar­nerulis­sutigaara upperalugulu Jehovap peqatigiis­sortaanit qanoq ittumil­luunniit suliassin­neqassagaluaruma sapernaviarnagu.

Gileadimut qinnuteqaq­qippugut, tamatumuunalu akuerisaalluta. Ilimagigaluarparput USA-liassalluta ilinniar­nerpullu tuluttut ingerlan­neqassasoq. 1981-imili Ilinniarfik Gileadi Tysklandimi klasseqalerpoq. Ilinniarnerlu tyskisut ingerlan­neqarmat uannut oqinnerujussuuvoq. Sumulli aallartitaas­saqaagut?

SORSUTTOQARFIUSUMI KIFFARTORNEQ

Kenyamut aallartitaavugut! Kenyamili immikkoor­tortaqarfimmit aperineqarpugut nunami Kenyap saniliani Ugandami kiffartorusun­nersugut. Ukiut qulit tamatuma siornatigut Ugandami naalakkersuisut sakkutuunit generalimit Idi Aminimit siulersor­neqartunit uppititaapput. Taassuma kisermaas­silluni naalakkersuinerani inuit tuusintillit toqutaapput allallu millionillit naalliutsitaallutik. Taava 1979-imi Idi Amin akerlilersor­timinit uppititaavoq. Paasisin­naassagunarparma nunamut tassunga nuunnissannut sooq nangaas­suteqartunga. Gileadimili ilinniar­tinneqarpugut Jehova tatigiuas­sagipput. Taamaattumik akuersivugut.

Ugandami pissutsit ajorluinnarput. Naalakkersuisut inuit pisariaqartitaat isumagisin­naanngilaat, soorlu imeqarneq, kallerup innera allallu. Oqarasuaatit attaveqan­ngillat. Inuit aallaasersortarput tillinniar­tarlutillu, pingaartumik unnuakkut. Taarsigaangat kikkut tamarmik angerlarsimasarput neriullutik – allaallu Guutimut qinusarlutik – tillinniarfigitinnatik unnuaq anigorumaarlugu. Pissutsit ajoraluaqisut qatanngutigut Ugandamiittut uppernikkut nukittoqaat!

1982-imi Heinzilu illoqarfimmut Ugandap pingaar­nersaanut, Kampalamut, tikippugut. Qaammatit tallimat siulliit aappariit Sam aamma Christina Waiswakkut meeraallu nukangasut tallimat ilaqutaallu sisamat inisimaf­figaagut. Taakku amerlanertigut ullormut ataasiaan­narlutik nerisarput. Taamaattumik inisimatitsinerat killitsis­sutigingaarparput. Taakkunani najugaqar­nitsinni kingusin­nerusukkut iluaqutigingaak­katsinnik ilikkagaqarpugut. Assersuutigalugu imermik sipaarluta uffartarpugut, imerlu atugarput anartarfiup kuutsin­nissaanut atoqqit­tarlugu. 1983-imi Heinzilu sumiiffimmi toqqissisimaf­fiukkan­nersumi initaarpugut.

Kampalami oqaluussineq nuannareqaarput. Eqqaamavara qaammammi ataatsimi atuagassianik 4.000-nit amerlanerusunik tunnius­saqarsimalluta! Inuilli nuannaarutaanerpaapput. Guuti ataqqivaat Biibililu eqqartorusut­tarlugu. Heinzilu tamatta immikkut qulit 15-illu akornanni atuaqqis­saaqateqar­tarpugut. Ilinniar­titagut ilinniarfigisaqaagut. Assersuutigalugu sapaatit-akunneri tamaasa ataatsimiigiarlutik pisuttariaqaraluarlutik nuannaarlutik qungujulajuarput.

1985-imi 1986-imilu Ugandami marloriarluni sorsuttoqaqqippoq. Meeqqat aallaasillit aqqusinernillu assersuisut takussaapput. Tamatuma nalaani soqutigin­nittunik ujaasinitsinni eqqortumik aalajangiinis­satsinnut eqqissisimaan­narnissatsinnullu ikioqqulluta qinusarpugut, Jehovallu qinnutigut akisarpai. Soqutigin­nittumik naapitsigaangatta ernumas­suteqarnerput puiortarparput.

Aamma allamiut Ugandamut nuussimasut oqaluus­siffigisarpagut. Assersuutigalugu aappariit Murat aamma Dilbar Ibatullin Ruslandip qiterpasissuani Tatarstanimeersut atuaqqis­saaqatigisalerpagut. Murat nakorsaavoq. Aappariit Nalunaajaasun­ngorput, ullorlu manna tikillugu kiffartor­nerminni Jehovamut aalajaat­tuarput. Kingusin­nerusukkut arnaq Ukrainemeersoq Tatjana Vileyska, imminut toqunnissamik eqqarsaateqarsimasoq, naapippara. Tatjana imermut morsutsitaareernermi kingorna Ukrainemut uterpoq kingornalu Biibililersaarutaatitsinnik nutserisutut kiffartulerluni.a

UNAMMINIAGASSAT NUTAAT

1991-imi Heinzilu Østrigimi feeriar­tilluta Østrigimi immikkoor­tortaqarfimmit allagarsivugut nutaamik suliassin­neqarsimalluta: Tamatumuuna Bulgariami. Europap Kangisissuani kommunistit uppitin­neqarnerata kingorna Bulgariami Jehovap Nalunaajaasuisa sulinerat ammaanneqarpoq. Soorlu oqaluttuarereeriga Bulgariami suliarput inerteq­qutaagallarmat Biibililersaarutaatitsinnik isertortumik eqqussinikuusugut. Maannakkulli tassunga oqaluus­siartor­tinneqarpugut.

Bulgariamut ingerlaannaq nooqquneqarpugut. Pisattagul­luunniit poortoriar­tunngilagut ikinngutigullu inuulluaq­qunngitsoorlugit. Ugandamut uternata ingerlaannaq Tysklandimiittumut Betelimukarpugut biilissarsigattalu Bulgariamut aallarluta. Sofiami eqimattani 20-t missaannik oqaluus­sisartulimmi suliassin­neqarpugut.

Bulgariami arlalinnik unamminiagaqalerpugut. Assersuutigalugu Bulgariamiusut oqalussin­naanngilagut. Aamma Bulgariamiusut atuakkat sagdlusuíssut inûnigssamut nâgssáungitsumut sangmisoĸ aamma Biibilimik oqaluttuaatikka kisiisa pigaagut. Biibilimillu atuaqqis­saaqateqaler­nissarput ajornaatsuin­naanngilaq. Taamaak­kaluartorli oqaluus­sisartoqatigiit ikittunnguit aallussil­luartuupput. Tamannalu ilagiit ortodoksikkut maluginiarpaat malersulerlutalu.

1994-imi Jehovap Nalunaajaasui upperisarsioqatigiittut pisortatigoortumik nalunaarsugaajun­naarput. Immikkoor­niaqatigiittut inerteq­qutaasutut pineqalerpugut, qatanngutillu ilaat tigusarineqar­talerput. Tusagas­siuutitigut ajortorujus­suarmik salluliuutigineqarpugut oqarlutik Jehovap Nalunaajaasuisa meeqqatik toquttaraat Nalunaajaasoqatitillu imminut toqunnis­saannut kajumis­saartarlugit. Heinzilu oqaluus­siniarnerput sapernar­teqaarput. Inunnit kamattunit nilliaf­figineqar­tarpugut, politiinut siarngutigineqar­tarpugut allaallu milloor­neqartarluta. Biibililersaarutaatitsinnik Bulgariamut eqqussiniarneq ajornarluinnarpoq ataatsimiit­tarfissanillu attartor­niarneq ajornakusooqaluni. Ataasiaq politiit iserlutik ataatsimeersuarnerput unitsippaat. Taamatut uumissugaaneq Heinzilu sungiusiman­ngilarput. Ugandami soqutigin­nittorpas­suarnut inussiar­nersunut sanilliullugu allaanerul­luinnarpoq! Sooq tunniutiin­nanngilagut?

Qatanngutit angutit arnallu ilagisarneri iluaqutigeqaarput. Ilumoortut Biibilimeersut paasisimagamikkit nuannaarutigingaarpaat ikiuinerpullu qujamasuutigingaarlugu. Tamatta ataqatigiil­luarpugut tapersersoqatigiillutalu. Heinzilu ilikkarparput inoqatigut soqutigalugit eqqarsaatiginerusarutsigit qanorluunniit suliassin­neqaraluarutta nuannaar­tuaannarsin­naalluta.

Piffissap ingerlanerani pissutsit pitsanngoriartorput. 1998-imi upperisarsioqatigiittut pisortatigut allassimaq­qilerpugut, Biibililersaarutillu amerlanerusut Bulgariamiusut nutserneqar­talerput. 2004-mi immikkoor­tortaqarfik nutaaq atoqqaarfis­siorneqarpoq. Ullumikkut Bulgariami ilagiit 57-iusut 2.953-inik oqaluus­sisartoqarput. 2024-mi eqqaaniaanermut najuuttut 6.475-iupput. Qanga Sofiami oqaluus­sisartut arnat tallimaan­naagaluartut maannakkut qulingiluanik ilageeqarpoq! Ilumut takusimavarput ‘minnersaat tuusintilin­ngortoq’. – Es 60:22.

NAPPAATEQALERNEQ

Inuuninni peqqiil­liuuterpas­suaqalerpunga. Ukiut ingerlanerini timikkut naasoqar­tarpunga, ataaserlu qaratsanni. Qinnguar­tartinnikkut millisarpaat, annersaalu Indiami akunnerni aqqaneq-marlunni suliaritillunga peerpaat. Nukkannissama tungaanut Indiami immikkoor­tortaqarfim­miippugut kingornalu Bulgariamut uterluta.

Tamatuma nalaani Heinz nappaammik kingornut­takkamik qaqutigoortumik, Huntingtonimik taaguutilimmik, eqqugaavoq. Pisunneq, oqalunneq nukimminillu aqutsisinnaaneq sapileriartorpai. Ajorsiar­tornerani ikiornerusariaqalerpara. Ilaannikkut qasungaar­tarpunga kingunissaalu isumakuluutigisarlugu. Qatanngutilli inuusuttup Bobimik atillip Heinz oqaluus­seqatigiumasarpaa. Heinzip oqalunniarnera timiminil­luunniit aqutsisin­naannginnera Bobip kanngusuutiginngilaa. Heinz ikiorsin­naanngik­kaangakku Bobi naatsorsuutigiuaan­narsinnaavara. Jehovamut kiffartornermi iliuuseqar­neruniarluta Heinzilu meerartaar­niarnata aalajanger­nikuuvugut, misigaagulli Jehovap Bobimik ernitsitut isigisatsinnik tunisimagaatigut! – Mak 10:29, 30.

Heinz asasara aamma kræftimik eqqugaavoq alianaraluar­tumillu 2015-imi toqukkut qimagulluni. Heinz toqummat sequmil­luinnarpunga ernumagaangama eqqissisar­tuaannar­tarmanga. Maqaaseqaara maaniik­kunnaartorlu upperiuminaatsit­tarlugu. Eqqarsaatin­niittuaan­narporli. (Luk 20:38) Oqaasii asannipaluttut siunnersuutaalu ullup ingerlanerani eqqarsaatigiuar­tarpakka. Ukiorpassuarni kiffartoqatigiis­simagatta qujamasut­taqaanga.

JEHOVAP ANNERTOQ­QUSERSUINERANUT QUJAMASUNNEQ

Atukkanni imaannaan­ngitsuni Jehovap ikiortuarpaanga. Aamma ittoortarnerma qaanger­nissaanut inuillu allat eqqarsaatiginerullugit oqaluus­sisarnissannut ikiorsimavaanga. (Tim 2. 1:7) Nukaralu marluulluta Jehovap ikiuineratigut piffissaq tamaat kiffartor­tuuvugut. Ullumikkut nukara uialu Europami ilageeqatigiinni Serbiamiusut oqaluttuni angalasartutut kiffartorput. Meeraalluta ataatama qinnutigisartagaa Jehovap akisimavaa!

Biibilimik atuaqqis­saartarnera eqqissis­sutigisarpara. Piffissani erloqinartuni Jiisusitut qamannga pisumik qinuneruler­nissara ilikkarsimavara. (Luk 22:44) Ikinngutima Nadezjdami Sofiamiittumi ilagiin­niittut ikiortaqaannga. Tamannalu qinnutinnut akissutitut isigisarpara. Pilluaam­missutigisar­takkannik qaaqqukulasarpaannga asanerar­tarlungalu.

Makititaaffissaq takorluukulasarpara. Angajoqqaakka takorloor­taqaakka katerlaajullutik isikkortik pinnersoq isikkoralugu illutta saavaniittut. Aamma nukara nerisas­siortoq Heinzilu hestimi saavani nikorfasoq takorloor­tarpakka. Taamaalillunga eqqarsaatit nuannin­ngitsut nuannersunik taarser­tarpakka qamanngalu pisumik Jehovamut qujamasuler­tarlunga.

Inuuninni Jehovamit ikiorneqarsimanera siunissarlu pillugu neriorsuutai nuannersorpassuit eqqarsaatigigaangakkit Daavitut ima oqartutut misigisarpunga: “Inuutillunga Jehovap ajunngissusia misigiuarumaarlugu upperin­ngikkaluarukku sumiissagaluarpunga? Jehova neriuffigiuk; sapiitsuugit pissatsil­lutillu. Aap, Jehova neriuffigiuk.” – Tuss 27:13, 14, New World Translation.