Jehovap aqqa Jiisusimut qanoq pingaaruteqar­tigisoq

1-2. (a) Toqussi aqaguttoq Jiisusi sua? (b) Allaaserisami apeqqutit suut akineqassappat?

UKIUMI 33-mi nisanip 14-ianni sisaman­ngornermi unnukkiartortoq Jiisusip apustilini aalajaatsut nalliut­torsioqatigalugit nereqatigeq­qammerpai. Nalunngilaa akeqqaminut pisinneqar­tussaalluni, unnerluun­neqartus­saalluni, eqqartuun­neqartus­saalluni, naalliutsin­neqartus­saalluni naggataatigullu toqutaasus­saalluni. Nerereernerup kingorna naggammik qiimmassarpai nakussatsin­niarlugit. Ingerlan­nginnerminni Jiisusi unippoq qamanngalu pisumik qinulluni. Qinnutaa apustilip Johannesip allappaa, tamannalu Johannesi kapitali 17-imi atuarneqarsinnaavoq.

² Jiisusip qinnutaa ilinniarfigil­luarsin­naavarput. Toqussi aqaguttoq suna eqqarsaatigeq­qissaarpaa? Nunarsuarmiin­nermini suna pingaar­nerpaatippaa? Allaaserisami tamakku sammiumaarpagut.

“ATIT ILISIMANEQALERSIPPARA”

3. Jiisusi Jehovap atia pillugu qanoq oqarpa, qanorlu isumaqarpa? (Johannesi 17:6, 26)

³ Qinnutimini Jiisusi oqarpoq: “Atit taakkununnga ilisimaneqalersippara.” Jiisusimut tamanna pingaaruteqangaarpoq, marloriarlunimi qinnutimini oqaatigaa. (Johannesi 17:6, 26 atuakkit). Qanoq isumaqarpa? Ilinniartitani oqaluttuus­simanerpai atermik nalusaannik? Naamik, juutiugamimmi Jehovap aqqa nalunngil­luinnarpaat. Taannalu Hebræerisut Allakkani Illernartuni tuusintileriarluni allassimavoq. Taamaattumik Jiisusi isumaqanngilaq Guutip aqqanik ilinniar­tiinnarsimallugit, isumaqarporli Jehovap Guutitut qanoq ittuuneranik ilinniar­tissimallugit. Jiisusip takutereersimavaa Jehovap qanoq ittuunera, inunnut qanoq kissaateqarnera, susimanera, sunissaa qanorlu pissuseqarnera. Jiisusitulli allamik Jehova pillugu ilisarititsisin­naasoqanngilaq.

4-5. (a) Nalunngisatta atia uagutsinnut qanoq isumaqar­nerulersinnaava? (b) Jiisusip ilinniar­titaasa Jehova qanoq ilisarisimal­luarnerulerpaat?

⁴ Takorlooriaruk illit ilagiinni utoqqaaner­taqartoq Daavimik atilimmik. Ukiorpassuarni utoqqaanertatut asannittutut nalunngisarisimavat, aammali pilattaasartuuvoq. Ullut ilaanni ajoquserputit ambulancimillu napparsim­maviliaan­neqarlutit. Tassanilu Daavip inuunerit annaappaa. Ilimanarluinnarpoq tassunga qujamasut­torujus­suussasutit asanerulerlugulu. Atia tusaraangakku ilinnut iliuuserisimasaa eqqarsaatigisarpat. Maanna Daavi tassaagin­nanngilaq utoqqaanertaq nalunngisat, pilattaasar­tuuvorli inuuninnik annaassisoq.

⁵ Jiisusip ilinniartitai assingusumik misigisaqarput. Jehovap aqqa nalunngereerpaat, Jiisusimilli ikiorneqarlutik Jehovap kinaassusia paasilluar­neruleramikku aqqa taakkununnga suli isumaqar­nerulerpoq. Jiisusimi oqaatsimigut iliuutsimigullu angusisarluinnarmat apustilit Jiisusimut tusarnaaraangamik allanillu qanoq pinnittarnersoq takugaangamikku Jehova ilisarisimal­luarneruler­tarpaat. – Joh 14:9; 17:3.

“ATIT – UANNUT ATEQAATIGITITAT”

6. Jehovap atini Jiisusimut ateqaatigitimmagu qanoq paasisariaqarpa? (Johannesi 17:11, 12)

⁶ Jiisusip ilinniartitani qinnuppai: “Atit – uannut ateqaatigititat – pillugu sernigikkit.” (Johannesi 17:11, 12 atuakkit). Tamanna isumaqarpa Jiisusi aamma Jehovamik ateqartoq? Naamik, maluginiaruk Jiisusi qinulluni oqarmat: “Atit … pillugu sernigikkit”. Jiisusi allamik ateqalinngilaq. Jiisusip ima oqarnera qanoq isumaqarpa: “Uannut ateqaatigititat”? Siullertut, Jiisusi Jehovamut sinniisuuvoq oqariar­tortitaallunilu. Ataatami aqqani tikiullunilu tupinnar­tuliortarpoq. (Joh 5:43; 10:25) Aappaattut, Jiisusip aqqa “Jehova Annassutaavoq”-mik isumaqarpoq. Tassa Jehovap aqqa Jiisusip aqqata isumaanut ilaavoq.

7. Nassuiaruk Jiisusi qanoq ililluni Jehovap aqqani oqalussinnaasoq.

⁷ Ullumikkut aamma inoqarpoq allat aqqini oqariar­tortartunik. Assersuutigalugu aallartitaq nunamini naalakkersuisut sinnerlugit oqariar­tortitaasarpoq. Naalakkersuisullu siulittaasuata oqariartuutai aallartitap oqartus­saasuseqarluni ingerlateq­qittarpai. Taamatulli Jiisusi Jehova sinnerlugu oqariar­tortitaavoq. – Mat 21:9; Luk 13:35.

8. Jehovap aqqa qanoq ililluni Jiisusimiippa nunarsuarmukan­ngikkallarmat? (Mosesimik 2. 23:20, 21)

⁸ Biibilimi Jiisusi “Oqaaseq”-tut allaatigineqarpoq Jehovamit paasissutissanik ilitsersuutis­sanillu inngilinut inunnullu oqariar­tortitatut atorneqartarami. (Joh 1:1-3) Jehovap Israalikkut Egyptenimiit aniguisimmagit ilimanarpoq inngili siulersuisoq Jiisusiusimasoq. Jehovap Israalikkut inngilimut tassunga naalaqqugamigit oqarpoq: “Atera taassumaniimmat.”a (Mosesimik 2. 23:20, 21 atuakkit). Jehovap aqqa Jiisusimiippoq ima paasillugu Jehovamit aallartitaasoq. Taamaammallu Jiisusimut pingaarutilerujussuuvoq Jehovap aqqata illersornissaa illernarsisin­nissaalu.

“ATAATA, ATIT QUTSISSISIGUK”

9. Jehovap aqqa Jiisusimut qanoq pingaaruteqartigaa? Nassuiaruk.

⁹ Soorlu sammereeripput Jehovap aqqa tamatigut Jiisusimut pingaaruteqarluin­nartuuvoq, aamma nunarsuarmukan­ngikkallarmat. Taamaattumik pissusis­samisoorluinnarpoq Jiisusip Ataatami aqqanik asanninnera inuttut iliuusaanut sunniuteqartarmat. Kiffartornini naammas­siartortoq Jiisusi qinuvoq: “Ataata, atit qutsissisiguk.” Ingerlaannarlu Jehovap qilammit kallertut nipeqarluni akivaa: “Qutsissisereerpara qutsissiseq­qissallugulu.” – Joh 12:28.

10-11. (a) Jiisusip Ataatami aqqa qanoq qutsissisippaa? (Aamma asseq takuuk). (b) Sooq Jehovap aqqata illernarsisin­neqarnissaa illersor­neqarnissaalu pisariaqarpat?

¹⁰ Jiisusittaaq Ataatami aqqa qutsissisippaa. Qanoq ililluni? Ataatami pissusiisa nuanningaartut inunnullu ajunngitsuliarpassuisa allanut oqaluttuarinerisigut. Aammali allamik iliuuseqar­tariaqarpoq. Jehovap aqqa illernarsisit­tariaqarpaa uppernarsar­tariaqarlugulu Jehovap iliuusii tamaasa eqqortulior­nerusut. Tamatuma pingaaruteqassusia Jiisusip ersersippaa ilinniartitani qanoq qinusar­nissaannik ima ilinniar­tikkamigit: “Ataatarput qilammiittutit, atit illernar­tinneqarli.” – Mat 6:9.

¹¹ Sooq Jehovap aqqata illernarsisin­neqarnissaa illersor­neqarnissaalu pisariaqarpat? Saatanip Jehova ajortorujus­suarmik salluliuutigisimammagu. Naatsiivimmi Edenimi Jehova sallutuujunerarpaa Adami Evalu ajunngitsunik erliguun­nerarlugit. (Mos 1. 3:1-5) Saatanillu Jehovap naalakkersueriaasia eqqunngitsuunerarpaa. Unnerluussinera Jehovap tusaamasaaneranut aqqanullu saassus­sineruvoq. Kingusin­nerusukkullu Juubip nalaani Saatanip Jehovamut kiffartortut unnerluuppai namminneq iluaqutissartik piinnarlugu Jehovamik kiffartuus­sinerarlugit. Aamma oqarpoq inuit Jehova ilumoorlutik asanngin­namikku ajornar­torsiulerunik kiffartorfigiun­naassagaat. (Job 1:9-11; 2:4) Kina sallutuujunersoq – Jehova Saataniluunniit – aatsaat piffissap ingerlanerani uppernarsar­neqarsinnaavoq.

“INUUNERA TUNNIUPPARA”

12. Jiisusi Jehovap aqqanik asannikkami qanoq ilioriaannaava?

¹² Jiisusip Jehova asangaaramiuk Jehovap aqqa illernarsisin­niarlugu illersor­niarlugulu sapinngisaminik iliuuseqar­niarpoq. Oqarpoq: “Inuunera tunniuppara.” (Joh 10:17, 18) Tassa Jehovap aqqa pillugu toqoriaannaavoq.b Inuit naammal­luinnartut siulliit marluk, Adamip Evallu, Jehova tunuppaat Saatani illersor­niarlugu. Jiisusili allaanerul­luinnartumik aalajangiivoq. Nunarsuarmukarusuppoq uppernarsarumallugu Jehova qanoq asatiginerlugu. Asanninninilu uppernarsarpaa aalajaal­luinnar­nermigut naalalluin­narnermigullu. (Hebr 4:15; 5:7-10) Allaat qisummik naalliutsitsiviliami naalliungaaraluaqaluni Jehovamut aalajaat­tuarpoq. (Hebr 12:2) Inuunini tamaat sutigut tamatigut takutittarpaa Jehovamik taassumalu aqqanik asanningaarluni.

13. Sooq Saatanip sallutuujuneranik uppernarsaasuunis­saminut Jiisusi piukkun­narnerpaava? (Aamma asseq takuuk).

¹³ Jiisusip inooriaatsimigut qularun­naarsivillugu uppernarsarpaa Saatani, Jehovaan­ngitsoq, sallutuujusoq! (Joh 8:44) Jiisusip Jehova allanit tamanit ilisarisimaneruaa. Saatanip unnerluus­sutaanik ilumoor­toqarsimagaluarpat Jiisusip nalusimanavian­ngikkaluarpaa. Jiisusilu aalajangersimavoq Jehova illersor­niarlugu. Allaat Jehovamit qimanneqarpasik­kaluarami toqorusun­neruvoq Ataataminut asasaminut naalannginnermit. – Mat 27:46.c

‘UANNUT SULIAREQQUSAT NAAMMASSIVARA’

14. Aalajaannini pillugu Jiisusi Jehovamit qanoq akissarsisin­neqarpa?

¹⁴ Toqussi aqaguttoq qinnummini Jiisusi oqarpoq: ‘Uannut suliareqqusat naammassivara.’ Jehova tatigaa aalajaannini pillugu akissarsisik­kumaaraani. (Joh 17:4, 5) Jehovalu taamaaliorpoq. Ilivermiitiin­narnagu Jiisusi makitippaa qilammilu qaffasin­nerusumik inissisimaf­feqalersillugu. (ApS 2:23, 24; Flp 2:8, 9) Kingusin­nerusukkullu Jiisusi qilammi kunngin­ngorpoq. Kunngeqarfik sunik angusaqassava? Tamanna qinnutip ataatarpuup ilaani akineqarpoq: “Kunngeqarfiit tikiulli. Piumasat [tassa Jehovap piumasaa] qilammi nunarsuarmilu eqquulli.” – Mat 6:10.

15. Jiisusi siunissami sussava?

¹⁵ Siunissami qanittumi Jiisusi Guutip akeraanut sorsussaaq inuillu ajortut Harmagedonnimi nungutillugit. (Saqq 16:14, 16; 19:11-16) Tamatumalu kinguninngua Saatani ‘itinersuarmut naloriutissavaa’, tassanilu soriarsin­naanani parnaarus­saaqqassaaq. (Saqq 20:1-3) Ukiut tuusintit ingerlaneranni Jiisusi nunarsuarmi tamarmi eqqissineqar­titsissaaq inuillu naammal­luinnar­tunngor­nissaannik ikiorlugit. Toqusunik makititsiumaarpoq nunarsuarlu tamaat paratiisin­ngortik­kumaarlugu. Taamanik­kussamullu Jehovap piumasaa kiisami naammas­sineqassaaq. – Saqq 21:1-4.

16. Ukiuni tuusintini naalakkersuinerup kingorna inuuneq qanoq issava?

¹⁶ Ukiuni tuusintini naalakkersuinerup kingorna inuunerup qanoq innissaa naatsorsuutigisin­naavarput? Taamanik­kussamut ajorti atuukkun­naarsimassaaq. Utertitsissut tunngavigalugu isumakkeerfigineqar­nissamik qinusariaqarun­naassaagut. Jehovamut attaveqar­niassagatta 144.000-t palaseqatigiittut Jiisusilu akunnermiliuttutut pisariaqar­tikkunnaas­savagut. “Akerarlu kingulleq”, tassa Adamip ajortuliornera pissutigalugu toqu, “suujunnaarsin­neqassaaq”. Ilerrit imaarutissapput toqusut uummaqqis­simassagamik. Nunarsuarmiut kikkut tamarmik naammal­luinnar­tunngorsimassapput. – Kor 1. 15:25, 26.

17-18. (a) Ukiuni tuusintini naalakkersuinerup kingorna susoqassava? (b) Jiisusi naalakkersuiun­naaruni sussava? (Korintimiunut 1. 15:24, 28) (Aamma asseq takuuk).

¹⁷ Ukiuni tuusintini naalakkersuinerup kingorna aamma susoqassava? Immikkorluinnaq ittumik pisoqassaaq. Jehovap Guutitut qanoq ittuunera naapertuil­luartumillu iliortarnera akerleriis­sutaajun­naassaaq. Kikkut tamarmik paasissavaat Jehovap aqqa pillugu unnerluussutit eqqunngitsuusut. Eqqaamajuk naatsiivimmi Edenimi Saatanip Jehova sallutuujunerarmagu inunnullu ajunngin­nerpaamik kissaas­sinngin­nerarlugu. Taamanimiilli Jehovamik asannittut ataqqin­nittullu aqqanik illersuisarsimapput illernarsisitsil­lutillu. Ukiuni tuusintini naalakkersuinerup kingorna Jehovap tamakkiisumik uppernarsareersimassavaa Ataataal­luarluni asannittoq. Allanil­luunniit unnerluun­neqaqqis­sinnaajun­naassaaq.

¹⁸ Kiisami naggammik uppernarsar­neqassaaq Saatanip unnerluussutai eqqunngitsuusut. Jiisusi sussava naalakkersuisutut suliassani naammas­siguniuk? Jehovamut pikitsitsilluni Saatanitut iliussava? Naamik, allaanerul­luinnarpormi. (Korintimiunut 1. 15:24, 28 atuakkit). Jiisusip Kunngeqarfik Ataataminut utertissavaa aqutsineranullu naalatsigitilluni. Jiisusip Ataatani asangaaramiuk kajumilluni oqartus­saanini utertissavaa.

19. Jehovap aqqa Jiisusimut qanoq pingaaruteqartigaa?

¹⁹ Tupinnan­ngilluinnarpoq Jehovap aqqi Jiisusimut ateqaatigitik­kusummagu. Jiisusi Ataatami qanoq ittuuneranik ersersitsil­luinnarsimavoq. Jehovap aqqa Jiisusimut qanoq pingaaruteqartigaa? Aqqa Jiisusip allanit tamanit pingaar­nerpaatippaa, allaat atia pillugu inuunini pilliutigiumavaa. Ukiunilu tuusintini naalakkersuereeruni oqartus­saassuseq tamaat Jehovamut utertik­kumassavaa. Qanoq ililluta Jiisusi ilaarsin­naavarput? Tamanna allaaserisami tulliuttumi sammineqassaaq.