Uppeqatigiilluta ikinngutigiil­luarnerput iluaqutigisarparput!

1-2. Jehovamut suna pingaaruteqarpa, qanorlu iliornissarput kissaatigaa?

JEHOVAMUT pingaaruteqangaarpoq allanut ajunngitsulior­tarnissarput. Jiisusip ilinniar­tippaatigut imminut asanitsitut inoqatigut asassagigut. (Mat 22:37-39) Tassa imaappoq kikkunnut tamanut inussiar­nersuus­sasugut, aamma uppeqatigin­ngisatsinnut. Taamaalilluta Jehova ilaartarparput, taassumami “seqineq inunnut ajortunut ajunngitsunullu nuisittarpaa aamma naapertuil­luartunut naapertuil­luanngitsunullu siallersitsisarluni”. – Mat 5:45.

² Jehovap inuit tamaasa asavai, eqqortuliortulli asanerungaarpai. (Joh 14:21) Kissaatigaa ilaassagitsinni. Taamaat­tumillu kajumis­saarpaatigut ‘qamannga pisumik asaqatigiis­sasugut’ uppeqatigullu ‘qamannga pisumik misigis­suseqarfigis­sagigut’. (Pet 1. 4:8; Rom 12:10) Misigissutsit kissalaartut taamaattut ikinngutitsinnut qanigisatsinnut ilaquttatsin­nulluunniit asangaak­katsinnut misigis­sutsitsinnut assingupput.

3. Asanninneq eqqarsaatigalugu suna eqqaamasariaqarparput?

³ Naasuuterput alliartussappat paarilluar­tariaqarparput. Asanninnermut tunngatillugu aamma taamaappoq. Paulusip ima siunnersorpaatigut: “Qatanngutigiittut asaqatigiit­tuaritsi.” (Hebr 13:1) Jehovap kissaatigaa asaqatigiinnerput ineriar­tortittuar­niarlugu iliuuseqar­tuassasugut. Allaaserisami matumani sammissavarput sooq uppeqatitsinnut qaninneruler­nissarput pingaaruteqartoq qanorlu ililluta attaveqatigiinnerput nukittorsar­tuarsin­naaneripput.

ASAQATIGIINNERPUT SOOQ PINGAARUTEQARTOQ

4. Ataasioqatigiinnerput qujamasuutigiuas­sagutsigu susinnaavugut? (Tussiaat 133:1, Testamentitoqaq) (Aamma assit takukkit).

⁴ Tussiaat 133:1-imi allassimavoq: “Iluarlunilu nuannil­laaraaq qatanngutigiit isumaqatigiillutik najortigiileraangata.” (Testamentitoqaq 1990-imi naqitigaq) Tussiaasiortoq ilaarlugu ataasioqatigiinnerput nuannaarutigingaarparput, misigisimavugullu Jehovamik asannittunik ikinnguteqarneq nuannerluin­nartuusoq. Mianersor­tariaqarpugulli. Soorlu ullut tamaasa qaqqarsuaq kusanar­torujussuaq takujuar­tagarput naggataatigut maluginiar­tarunnaarsin­naagipput, ataasioqatigiinnerput taamaat­tussaannartut isigilersoorsin­naavarput. Uppeqatigut takujuaan­narpagut, immaqa sapaatip-akunneranut ilaanni arlaleriarluta. Qanoq ililluta asajuar­nerlugit naleqar­tinnerlugillu qulakkeersin­naavarput? Tamarmik ataasiak­kaarlutik ilagiitsinnut uagutsinnullu qanoq naleqar­tiginerisa eqqarsaatiginis­saannut piffissaqarluar­tariaqarpugut.

5. Asaqatigiinnerput inunnut allanut qanoq sunniuteqarsinnaava?

⁵ Ataatsimiigiaq­qaartut ilaasa asaqatigiinnerput assut tupigusuutigisarpaat. Immaqalu tamanna pissutigalugu upperisamik ilumoortumik nassaar­nerartarput. Jiisusi oqarpoq: “Asaqatigiikkussi kikkut tamarmik paasissavaat ilinniar­titarigissi.” (Joh 13:35) Tamanna Chaithrap, universitetimi ilinniartup Biibilimik misissueqatigineqartup, paasivaa. Ataatsimeersuar­nissamut qaaqquneqarami akuersivoq, ullorlu siulleq Biibilimik ilinniar­titsisuminut oqarpoq: “Ataatannit anaanan­nilluunniit eqinneqar­nikuunngisaan­narpunga. Ullumik­kuinnarli 52-eriarlunga eqinneqarpunga! Misigisimavunga Jehovap asanninnermik takutin­niarlunga ilissi aqqutigigaasi. Jehovap ilaqutariissuinut ilaarusoqaanga.” Chaithra siumukar­tuarpoq 2024-milu imermut morsutsitaalluni. Inuit allat ajunngitsuliagut asaqatigiin­nerpullu takugaangamikkit Jehovamut kiffanngorusulertarput. – Mat 5:16.

6. Uppeqatitsinnut qanittuarnerput qanoq illersuutigisin­naavarput?

⁶ Uppeqatitsinnut qanittuarnerput illersuutigisin­naavarput. Paulusi allappoq: “Ajortimit tammartitsinissamut pissaaneqartumit uummatikkut mannger­titinneqaqqunasi … ullut tamaasa qiimmas­saqatigiit­tuaritsi.” (Hebr 3:13) Nikallungalluta eqqortulior­nissarput sapernar­tilerutsigu Jehovap uppeqatitta ilaat atorlugu pisariaqar­tilluin­nakkatsinnik ikiorsin­naavaatigut. (Tuss 73:2, 17, 23) Qiimmas­saanerit taamaattut iluaqutigingaarsin­naavagut.

7. Asanninneq ataasioqatigiinnerlu qanoq atassuteqarpat? (Kolossimiut 3:13, 14)

⁷ Uppeqatigiiusugut tamatta asannit­tuliorumalluta iliuuseqangaar­tarpugut. (Joh 1. 4:11) Eqqarsaatigeriarullu ajunngitsumik qanoq kinguneqartartoq. Assersuutigalugu asanninneq kajumis­sissutigalugu ‘kamageqatigiit­tuarpugut’. Tamannalu ataasioqatigiin­nitsinnut nukittorsaataasarpoq. (Kolossimiut 3:13, 14 atuakkit; Ef 4:2-6) Taamaattumik ataatsimiin­nitsinni peqatigiik­kaangatta kissalaarneq misigisarput allami misigineqarsin­naanngilaq.

IMMITSINNUT ATAQQIN­NITTULIORTA

8. Ataasioqatigiis­sinnaaq­qulluta Jehovap qanoq ikiortarpaatigut?

⁸ Jehovap tupinnar­tuliorneratigut naammal­luinnan­ngitsuugaluarluta nunarsuaq tamakkerlugu ataasioqatigiippugut. (Kor 1. 12:25) Biibilimi allassimavoq ‘asaqatigiin­nissamik Guutimit ilinniar­tinneqartugut’. (Tes 1. 4:9) Biibili aqqutigalugu Jehovap ilinniar­teqqissaarpaatigut ataqatigiinnerput qanoq nakussatsis­sinnaagipput. Biibili misissoraangatsigu ilikkak­kagullu malillugit inuuleraangatta Jehovamit ilinniar­tinneqar­tarpugut. (Hebr 4:12; Jaak 1:25) Nunarsuarlu tamakkerlugu Jehovap Nalunaajaasui taamaalior­niartuarput.

9. Paulusip allataanit immitsinnut qanoq pisarnis­satsinnik sumik ilinniar­tinneqarpugut? (Romamiut 12:9-13)

⁹ Immitsinnut qanillisin­naaqqulluta Biibili qanoq iluaqutigisin­naavarput? Paulusip tamanna Romamiunut allakkamini eqqartorpaa. (Romamiut 12:9-13 atuakkit). Maluginiaruk ima allassimammat: “Siulliullusi ataqqin­nittulior­taritsi.” Qanoq isumaqarpa? Tassa inoroorsaarnikkut, tunisiumatuunikkut isumakkeerfigin­nipallat­tarnikkullu siulliulluta iliuuseqar­niartarnikkut immitsinnut ‘qamannga pisumik misigis­suseqarfigin­nissaagut’. (Ef 4:32) Uppeqatitta iliuuseqaq­qaarnissaat utaqqinagu qanilliniarlugit uagut iliuuseqaq­qaarsin­naavugut. Jiisusimi oqarpoq: “Tunisineq tigusinermit pilluar­narneruvoq.” – ApS 20:35.

10. Qanoq isumaqarpa ‘eqiasunnata’ ataqqin­nittulius­sasugut? (Aamma asseq takuuk).

¹⁰ Soqutiginarpoq maluginias­sallugu Paulusi immitsinnut ataqqin­nittulius­sasugut oqaatigereerlugu ima allammat: “Eqiasunnasi sulilluar­taritsi.” Eqiasuitsup suliassani suliaripal­lattarpai akisussaaf­feqarluar­tumillu naammas­sisarlugit. Ussatit 3:27, 28-milu ima kajumis­saarneqarpugut: “Ajunngitsuut nigorsimatin­niaqinagu atorfis­saqartitsisumit, ikiuissallutit sapinngik­kaangavit.” Taamaattumik ikiortarialimmik takugaangatta ikiuipal­lattarpugut. Kinguarsaas­sanngilagut eqqarsarluta allat ikiussaq­qaaraat. – Joh 1. 3:17, 18.

11. Ikinngutigiil­luarnissamut suna pingaaruteqarpa?

¹¹ Allatigut ataqqin­nittuliorsin­naavugut uppeqatitsinnit annersin­neqarutta isumakkeerfigin­nipallat­tarnikkut. Efesossimiut 4:26-mi allassimavoq: “Ulloq naatinnagu kamassimajun­naassaasi.” Sooq taama pingaaruteqartigaa? Versi 27-mi allassimasutut ‘Diaavulu periarfis­seqinagatsigu’. Jehovap isumakkeerfigeqatigiin­nissatsinnik eqqaasit­tuarpaatigut. Assersuutigalugu Kolossimiut 3:13-mi ima allassimasoqarpoq: “Ilumoorlusi isumakkeerfigeqatigiit­tuaritsi.” Ikinngutitsinnut qaninnerulis­sutigisin­naasarput pitsaanerpaaq tassaavoq kukkussutaannik isumakkeerfiginninneq. Taamaaliorutta ‘anersaamit ataqatigiilersin­neqarluta eqqisseqatigiinnikkut sapinngisatsinnik ataasioqatigiin­niartuarsin­naavugut’. (Ef 4:3) Naatsumik oqaatigalugu ataasioqatigiit­tuassagutta eqqisseqatigiillutalu isumakkeerfigeqatigiit­tuartariaqarpugut.

12. Jehovap isumakkeerfigin­ninnissatsinnut qanoq ikiortarpaatigut?

¹² Soorunami ilaannikkut isumakkeerfigin­ninnissaq oqitsuinnaaneq ajorpoq. Jehovalli anersaani atorlugu taamaalior­nissatsinnut ikiorsin­naavaatigut. ‘Qamannga pisumik misigis­suseqarfigiin­nissatsinnut’ aamma ‘eqiasuin­nissatsinnut’ kajumis­saareerluta Paulusi allappoq: “Anersaamit illernartumit sunnerneqangaaritsi.” Tassa Guutip anersaava illernartoq iluaqutigalugu taassuma piumasaatut iliornis­satsinnut aallussil­luarnerusin­naavugut kajumin­nerulerlutalu. Taamaalilluta qamannga pisumik misigis­suseqarfigin­ninnerulerlutalu isumakkeerfigin­nikkusun­neruler­tarpugut. Taamaat­tuminguna Jehovap anersaava illernartoq qinnutigiuar­taripput. – Luk 11:13.

AVISSAARTUUN­NAVEERSAARTA

13. Ilagiinni suna avissaar­tuussutaalersinnaava?

¹³ Ilagiit tamalaanik inoqarpoq tunuliaqut­tatsigullu assigiin­ngitsorujus­suulluta. (Tim 1. 2:3, 4) Tamatta immaqa assigiin­ngitsunik nuannarisaqarpugut, soorlu atisalersoriaatsimut, peqqissutsimut, katsorsaariaatsimut aliikkusersuinermullu tunngatillugu. Mianersuutigisariaqarparpulli aalajangikkatta assigiin­ngitsuuneri ilagiinnut avissaar­tuussutaas­sanngimmata. (Rom 14:4; Kor 1. 1:10) Asaqatigiin­nissamik Guutimit ilinniar­tinneqaratta isumaqar­navianngilagut aalajangikkagut uppeqatitta aalajangigaannit pitsaanerusut. – Flp 2:3.

14. Inunnut allanut qanoq pissuseqarusuppugut, aamma sooq?

¹⁴ Ilagiinni avissaar­tuutsitsinaveersaarsin­naavugut uppeqatitsinnik qiimmas­saanissamik nakussatsitsinis­samillu anguniagaqar­tuarnitsigut. (Tes 1. 5:11) Unittooq­qasimasut ilagiinnillu peerneqarsimasut qanittukkut utersimasut amerlaqaat. Taakkulu tikilluaq­qungaar­tarpagut! (Kor 2. 2:8) Uppeqatitta arnap ukiuni qulini unittooq­qasimasup ataatsimiigiaq­qeqqaarnini ima oqaluttuaraa: “Kissalaartumik qungujun­neqarlunga tikilluaq­qusaangaarpunga assammin­neqarlungalu.” (ApS 3:19) Inussiar­nisaarfigineqarnini qanoq sunniuteqaatigaa? Oqaluttuarpoq: “Soorlu Jehovap tasiorlunga nuannaar­nissannut uternissamut aqqutis­siuutiin­naraanga.” Tamanut qiimmas­saataagaangatta Jiisusip ‘qasusunut artorsar­tunullu’ nakussas­saatitut atorsin­naavaatigut. – Mat 11:28, 29.

15. Ataasioqatigiinnerput nakussatsik­kumallugu aamma susinnaavugut? (Aamma asseq takuuk).

¹⁵ Oqaatsigut oqaluttariaaserpullu ataasioqatigiin­nitsinnut sunniuteqangaartarput. Jobi 12:11-mi allassimavoq: “Siutip oqaatsit aninneqartut misissor­tussaan­nginnerpai soorlu oqqap nerisassat ooqattaartarai?” Soorlu iggarissup igaami sassaal­liutigin­nginnerini usseqqaartarai mamarnersut paasiniarlugu, taamatuttaaq eqqarsaatigisariaqarpagut oqaatiginiakkatta inunnut allanut qanoq sunniuteqarsin­naaneri. (Tuss 141:3) Anguniagaraarput oqaatsigut qiimmas­saataassasut, nukittorsaataassasut ‘tusartunullu iluaqutaassasut’. – Ef 4:29.

16. Kikkut ineriar­tuutaasumik oqalunnissartik ingammik eqqumaf­figissavaat?

¹⁶ Uiusut angajoqqaallu eqqumaf­figisariaqarpaat oqaatsitik ineriar­tuutaanersut iluaqutaanersullu. (Kol 3:19, 21; Tit 2:4) Utoqqaanertat Jehovap savaataanut paarsisuugamik tuppallersaanis­saminnik nakussas­saanissaminnillu akisussaaf­feqarput. (Es 32:1, 2; Gal 6:1) Oqaatsigut allanut sunniuteqangaarsin­naapput, soorlumi Biibilimi Ussatini ima allassimasoqartoq: “Ila ajunngit­tassusia oqaasissat piffissaasigut anillugit!” – Uss 15:23.

ILUMOORLUTA ASAQATIGIINNIARTA

17. Asaqatigiinnerput qanoq nakussatsis­sinnaavarput?

¹⁷ Apustili Johannesi ima allappoq: “Oqaasiin­nartigut pinnata ilumoorlutali iliuuseqarnikkut asannit­tuliortariaqarpugut.” (Joh 1. 3:18) Tassa ilumoorluta qamanngalu pisumik uppeqatitsinnut asannit­tariaqarpugut. Qanoq taamaaliorsin­naagatta? Uppeqatigut peqatigisarutsigit piffissaqarfigil­luarlugillu tamanna qaninnerulis­sutigisin­naavarput asaqatigiin­nerulerlutalu. Uppeqativit peqatigisar­nissaannut periarfis­sarsiortarit, soorlu ataatsimiinnerni oqaluus­sinermilu. Pulaartar­nissaannullu piffissaqartarit. Taamaalior­nitsigut takutis­savarput ‘asaqatigiin­nissamik Guutimit ilinniar­tinneqarsimalluta’. (Tes 1. 4:9) Taavalu Tussiaammi ima allassimasup ilumoor­tuunera misigis­savarput: “Iluarlunilu nuannil­laaraaq qatanngutigiit isumaqatigiillutik najortigiileraangata.” – Tuss 133:1, Testamentitoqaq 1990-imi naqitigaq.