Sorsunnerit unitsis­sinnaavagut?

ANINGAASAQARNIKKUT PITSANNGORSAANEQ

Anguniagaq: Aningaasaqarnikkut assigiin­ngissutsit akiuunnernut pissutaasarmata inuit tamarmik atugaris­saarnissaat anguniar­neqartarpoq.

Sooq sapernartoq: Tamanna anguneqassappat naalakkersuisut aningaasanik atuinerminni allatut pingaar­nersiuisariaqarput. 2022-mi nunarsuaq tamakkerlugu inuit atugaris­saarnerunissaat angujumallugu dollarit 34,1 milliardit missaat atorneqarput. Taakkuli ukiumi tamatumani sakkutooqarnermut aningaasat atorneqartut 0,4 procentiinnaraat. – Global Peace Index 2023.

“Akiuunnernik pinaveersaar­titsinermi aningaasanik atuinitsinnit inuit akiuunnernit eqqugaasut ikiorniarlugit aningaasanik atuinerungaarpugut.” – António Guterres, FN-ip generalsekretæria.

Biibilimi qanoq allassimasoqartoq: Nunarsuarmi naalakkersuisut peqatigiiffiillu ikiuerusus­suseqartut piitsut ikiorsin­naavaat, inuilli naalakkersuisuutillugit piitsoqar­tuassaaq. – Mosesimik 5. 15:11; Matiusi 26:11.

ISUMAQATIGIIS­SITSINIAANEQ

Anguniagaq: Oqaloqatigiinnikkut isumaqatigiin­niarnikkullu akerleriis­sutaasut tamanut iluaqutaasumik aaqqinniar­neqartarput.

Sooq sapernartoq: Akerleriit ilaat immaqa oqaloqatigiin­nissamut isumaqatigiin­niarnis­samullu piumassuseqarneq ajorput. Eqqisseqatigiin­nissamillu isumaqatigiissutit unioqqutin­neqariaan­naasarput.

“Isumaqatigiis­sitsiniaaneq ilaannikkut iluatsinneq ajorpoq. Isumaqatigiissut ima naapertuil­luanngitsigisinnaavoq kingusin­nerusukkut akiuuteq­qinnermik kinguneqarsin­naasarluni.” – Raymond F. Smith, American Diplomacy.

Biibilimi qanoq allassimasoqartoq: Inuit ‘eqqissineq ujassavaat’. (Tussiaat 34:15) Nalitsinnili inuit amerlasuut ‘ilumoorfigin­ninngitsuupput, saammar­titassaan­ngitsuupput akeqqanullu pisitsisuullutik’. (Timuutiusimut 2. 3:1-4) Naalakkersuisut eqqortuliorusuttut akiuunnernik aaqqiiniaaneranni pissusiluttut taamaattut ajornar­titsisarput.

SAKKUNIK IKILISAANEQ

Anguniagaq: Sakkunik – ingammik atombombinik aamma kemii bakteriallu atorlugit sakkussianik – ikilisaaneq sakkuerutsitsiniaanerluunniit anguniagarineqartarpoq.

Sooq sapernartoq: Nunat ilaasa pissaanikil­linissartik imminul­luunniit illersorsin­naanngin­nissartik annilaan­ngatigigamikku sakkussiatik ikilisarusun­ngilaat. Nunallu tamarmik sakkueruk­kaluarpataluunniit inuit akiuukkusun­nerannut pissutaasut nungunnavian­ngillat.

“Sorsunnerup nillertup kingorna sakkunik ikilisaanermik isumaqatigiissutit amerlasuut eqqortin­neqarsiman­ngillat. Navianar­toqarun­naarnissamut iliuuseqar­nissamik nunallu akornanni akerleriit­toqarun­naarnissamik isumaqatigiit­toqaraluarpoq, taamaalillunilu inuit isumannaatsuunissaat toqqissisimanerunissaallu anguneqarsimas­sagaluarput.” – FN-ip sakkunik ikilisaanermik suliniuteqarfia, Securing Our Common Future: An Agenda for Disarmament.

Biibilimi qanoq allassimasoqartoq: Inuit sakkulersus­sanngillat, ‘panatimmi assallatserummut savissaliaralugit saffiussavaat’. (Esaja 2:4) Tamannali naammanngilaq, nakuuserusunnermi inuup uummataanit pisarmat. – Matiusi 15:19.

ILIGIINNEQ

Anguniagaq: Nunat illersoqatigiin­niarlutik isumaqatigiittarput. Isumaqarput taamaaliorunik saassun­neqarnaviarnatik, tassami nunamik ataatsimik saassussisup nunarpassuit sakkutuui sorsuffigilis­sammagit.

Sooq sapernartoq: Nunanik arlalinnik sorsuffigin­ninnissamik sioorasaarineq sorsunnermik pinaveersaar­titsineq ajorpoq. Nunat ilaannikkut neriorsuinermissut iliorneq ajorput. Aamma qaqugukkut qanorlu sorsulis­sanerlutik isumaqatigiis­sutigiuaannarneq ajorpaat.

“Folkeforbundi Naalagaaffiillu Peqatigiit nunat iligiiler­niassammata iliuuseqangaaraluartut suli sorsuttoqar­tuarpoq.” – Encyclopedia Britannica.

Biibilimi qanoq allassimasoqartoq: Suleqatigiilluni isumannaan­nerusarpoq. (Oqaluus­sisartup oqaasii 4:12) Nunarsuarmili naalakkersuisut peqatigiiffiillu eqqissinivimmik toqqissinivimmillu pilersitsisin­naanngillat. “Tatigeqinasigit naalagartat, inuit annaassisin­naanngitsut. Anerningerunik kingumut issunngussapput, pilersaarutaallu ulloq taanna maangaan­nassapput.” – Tussiaat 146:3, 4.