Jehovap uppernarsaavigaatigut nunarsuaq paratiisin­ngortis­sallugu

1. Pruffiiti Iisaaja Israalikkunnut qanoq oqariar­tuuteqarpa?

PRUFFIITI Iisaaja allappoq Jehova ‘Guutiusoq ilumoortoq’. Allassimaq­qaarfinni oqaaseq uani “ilumoortoq”-mik nutserneqartoq tassaavoq “amen”. (Es 65:16) “Amen” isumaqarpoq “taama pili” imaluunniit “ilumut”. Oqaaseq “amen” Biibilimi atorneqarajuppoq ersersin­niarlugu Jehovap Jiisusil­luunniit iliuusii oqaasiilu ilumoortuusut. Tassa Iisaajap Israalikkunnut oqariartuutaa ersarippoq. Jehovap siulittuutai eqquuttuaannarput, Jehovammi neriorsuutini eqquutitit­tuaannarpai.

2. Siunissaq pillugu Jehovap neriorsuutai sooq upperil­luinnarsin­naavagut, aamma suut akissutis­sarsissavagut?

² Aamma siunissaq pillugu Jehovap neriorsuutai upperisin­naavagut? Iisaajap nalaaniit ukiut 800-ngajaat qaangiummata apustili Paulusi nassuiaavoq sooq Guutip neriorsuutaasa eqquukkumaarnerat upperil­luinnarsin­naaneripput. Allappoq ‘Guuti sallusin­naanngitsoq’. (Hebr 6:18) Soorlu puilasoq tarajor­ninngitsoq imermik tarajor­nitsumik puilalersitsisin­naanngitsoq, taamatuttaaq Jehova ilumoortumut pilerfiusoq sallusin­naanngilaq. Taamaat­tuminguna Jehovap oqaasii tamarluinnaasa aamma siunissaq pillugu neriorsuutai tamaasa upperil­luinnarsin­naagigut. Allaaserisami matumani uku akissutis­sarsissavagut: Jehovap siunissaq pillugu suna neriorsuutigisimavaa? Aamma neriorsuutini eqqortik­kumaarlugu qanoq uppernarsaavigaatigut?

JEHOVAP SUNA NERIORSUUTIGISIMAVAA?

3. (a) Guutip kiffaasa neriorsuut suna nuannaringaarpaat? (Saqqummersitat 21:3, 4) (b) Neriorsuut taanna tusaraangamikku ilaat qanoq isummertarpat?

³ Neriorsuut sammisassarput nunarsuaq tamakkerlugu Guutip kiffaasa nuannaringaarpaat. (Saqqummersitat 21:3, 4 atuakkit). Jehova neriorsuivoq ‘toqu, aliasunneq, nillianeq anniarnerlu atuukkun­naassasut’. Inuit tuppallersar­niarlugit paratiisissaq pillugu oqaluus­sigaangatta neriorsuut taanna takutit­tarparput. Tamanna tusaraangamikku ilaat qanoq isummertarpat? Immaqa oqarsin­naapput tamanna nuannerunaraluartoq upperiuminaatsillugu.

4. (a) Jehovap neriorsuigami suna nalunngilaa? (b) Neriorsuinermi saniatigut Jehova aamma sua?

⁴ Jehovap paratiisissamik neriorsuut pillugu apustili Johannesi allatsikkamiuk nalunngilaa nalitsinni oqaluus­sinermi neriuut taanna allanut ingerlatsik­kumaaripput. Aamma nalunngilaa inuppassuit siunissami pisussat nuannersut taakku upperiuminaatsissagaat. (Es 42:9; 60:2; Kor 2. 4:3, 4) Taava Saqqummersitat 21:3, 4-milu allassimasut eqquukkumaar­nerannik inuit qanoq qularun­naarsis­sinnaavagut? Uagullu nammineq Jehova neriorsuutaalu qanoq tatiginerulersin­naavagut? Jehovap killitsin­nartumik neriorsuiinnarani upperinissaanut pissutis­saqarluar­tippaatigut. Sunik?

JEHOVAP NERIORSUUTINI EQQORTIK­KUMAARLUGU UPPERNARSAAVIGAATIGUT

5. Guutip paratiisi pillugu neriorsuutaa sooq upperisin­naavarput, upperinis­saanullu pissutissat sumi atuarsin­naavagut?

⁵ Versini tulliuttuni sooq Jehovap paratiisi pillugu neriorsuutaa upperisin­naagipput atuarsin­naavarput. Ima allassimavoq: “Guuti issiavis­saarsuarmi issiasoq oqarpoq: ‘Takuat! Suut tamaasa nutaanngor­tippakka.’ Nangipporlu: ‘Oqaatsit taakku tutsuiginarlutillu ilumoormata allakkit.’ Oqarfigaangalu: ‘Oqaatsit eqquupput! Uanga tassaavunga Alfa aamma Omega, aallaqqaataal­lungalu naggataavunga.’” – Saqq 21:5, 6a.

6. Sooq Saqqummersitat 21:5, 6-imilu allassimasut Guutip neriorsuutaanik upperin­ninnerulis­sutigaagut?

⁶ Biibilimi allassimasut taakku sooq Guutimik tatigin­ninnerulis­sutigaagut? Versini taakkunani allassimasut Jehovap neriorsuutiminik eqquutitsil­luinnar­nissaminik atsiorneratut ippoq.b Tassa Guutip neriorsuutaa Saqqummersitat 21:3, 4-milu atuarparput. Taavali versi 5-imi 6-imilu Jehovap atsiorneralusooq atuarsin­naavarput, tamannalu neriorsuutaata ilumoor­tuuneranik qularnaveeq­qutaavoq. Jehovap oqaatsit suut atornerai misissoriartigit.

7. Vers 5-imi kina oqaluppa, aamma sooq tamanna immikkuul­larissuua?

⁷ Versi 5-ip aallaqqaataani ima allassimavoq: “Guuti issiavis­saarsuarmi issiasoq oqarpoq.” (Saqq 21:5a) Saqqummersitani Jehova pingasoriaan­narluni nammineq oqaaseqarpoq. Taamaattumik allassimasut taakku immikkuul­larissuupput. Tassa inngilip pissaanillip qularnaveeqqut oqaatiginngilaa, aamma Jiisusip makitin­neqareersimasup oqaatiginngilaa, Jehovalli nammineq oqaatigaa! Taamaammat qularnaveeqqut upperil­luinnarsin­naavarput, Jehovami ‘sallusin­naanngilaq’. (Tit 1:2) Tassa Saqqummersitat 21:5, 6-imilu allassimasut upperil­luinnarsin­naavagut.

“TAKUAT! SUUT TAMAASA NUTAANNGOR­TIPPAKKA”

8. Jehovap neriorsuutimi eqquukkumaarnera qanoq ersersippaa? (Esaja 46:10)

⁸ Jehova ima oqarpoq: “Takuat!” (Saqq 21:5) Oqaaseq grækerisooq “takuat”-mik nutserneqartoq Saqqummersitani atorneqarajuppoq. Qinerlerfissiaq naapertorlugu oqaaseq taanna atorneqartarpoq oqaatsit tulliuttut atuartup maluginiar­niassammagit. Taava Guuti ima oqarpoq: “Suut tamaasa nutaanngor­tippakka.” Jehovap siunissami allannguutissat eqqartoraluarlugit neriorsuutimi eqquukkumaarnera ersersippaa eqquutereersutut oqaatigigamiuk. – Esaja 46:10 atuaruk.

9. (a) Jehovap iliuusii marluk suut pineqarpat oqarmat “suut tamaasa nutaanngor­tippakka”? (b) ‘Qilak nunarsuarlu’ massakkut atuuttut qanoq pineqassappat?

⁹ Suna pineqarpa Jehova oqarmat “suut tamaasa nutaanngor­tippakka”? Oqaaseqatigiinni taakkunani Jehovap iliuusii assigiin­ngitsut marluk pineqarput, tassa taarsiinissaa aaqqiinissaalu. Siullertut, Jehovap suna taarser­niaramiuk? Saqqummersitat 21:1-imi ima allassimavoq: “Qilak siulleq nunarsuarlu siulleq peerupput.” “Qilak siulleq” eqqaaneqarmat politikkikkut oqartussaasut Saatanimit anersaapiluinillu sunnerneqarsimasut pineqarput. (Mat 4:8, 9; Joh 1. 5:19) Biibilimi oqaatsit ‘nuna’ aamma ‘nunarsuaq’ atorneqaraangata ilaatigut nunarsuup inui pineqartarput. (Mos 1. 18:25; Tuss 66:4) Tassa ‘nunarsuaq siulleq’ eqqaaneqarmat nalitsinni inuit ajortut pineqarput. Jehovap ‘qilak nunarsuarlu’ massakkut atuuttut iluarsiin­nassanngilai, peerluin­nassavaali. ‘Qilammik nutaamik nunarsuarmillu nutaamik’ taarsissavai, tassa oqartussaasut nutaat inunnut naapertuil­luartunut naalakkersuissapput.

10. Jehovap suut nutaanngor­tissavai?

¹⁰ Jehovap suut tamaasa aamma qanoq nutaanngor­tissavai? (Saqq 21:5) Nunarsuarmi pissutsit aaqqikkumaarpai inuillu naammal­luinnar­tunngor­tillugit. Iisaajap siulittuutigisaatut nunarsuaq tamarmi naatsiivis­suartut issaaq, soorlulusooq Edeniusoq. Uagut aamma nutaanngor­tinneqassaagut ajorunnaarsin­neqarluin­narluta. Nukillaarsimasut, tappiitsut tusilartullu ajorunnaarsin­neqassapput allaallu toqusimasut inuunermut makitin­neqassallutik. – Es 25:8; 35:1-7.

‘OQAATSIT TAAKKU TUTSUIGINARLUTILLU ILUMOORLUTILLU EQQUUPPUT!’

11. Jehovap Johannesi qanoq ilioqquaa, aamma sooq?

¹¹ Guutip aamma qanoq uppernarsaavigaatigut? Jehovap Johannesi ima oqarfigaa: “Oqaatsit taakku tutsuiginarlutillu ilumoormata allakkit.” (Saqq 21:5) Jehova oqaannanngilaq “allakkit”. Aammali sooq taamaalius­sanersoq nassuiarlugu ima oqarpoq: “Oqaatsit taakku tutsuiginarlutillu ilumoormata.” Johannesip ilioqquneqar­nermisut oqaatsit allammagit qujamasuppugut. Taamaaliormammi Guutip paratiisi pillugu neriorsuutaa atuarsin­naalerparput misigisas­sagullu nuannersut eqqarsaatigeq­qissaarsin­naalerlugit.

12. Sooq Jehova oqarpa ‘oqaatsit eqquuttut’?

¹² Taava Guuti ima oqarpoq: “Oqaatsit eqquupput!” (Saqq 21:6) Jehovap paratiisi pillugu neriorsuutini piviusun­ngoreersimasutut oqaatigaa. Taamaaliorsin­naavorlu suulluunniit kialuunniillu unitsis­sinnaan­ngimmanni. Aamma neriorsuutimi eqquunnissaanut allamik uppernarsaavigaatigut. Sumik?

“UANGA TASSAAVUNGA ALFA AAMMA OMEGA”

13. Sooq Jehova oqarpa tassaalluni “Alfa aamma Omega”?

¹³ Eqqaaneqareersutut Saqqummersitani Jehova nammineq pingasoriarluni oqaluppoq. (Saqq 1:8; 21:5, 6; 22:13) Taakkunani pingasuni Jehova ima oqarpoq: “Uanga tassaavunga Alfa aamma Omega.” Grækerit naqinnerisa tulleriinnerini alfa siulliuvoq omegalu kingulliulluni. Tassa taama oqarami Jehovap ersersippaa aallarnikkani naammas­siuaannarlugu.

14. (a) Jehova qanga oqarpalusooq “Alfa”, qaqugulu oqassavalusooq “Omega”? (b) Mosesimik allakkat siulliit 2:1-3 sumik qularnaveeq­quteqarpa?

¹⁴ Jehovap Adami Evalu pinngor­tereerlugit inunnut nunarsuarmullu siunertani oqaatigaa. Biibilimi ima allassimavoq: “[Guutip] pilluaqquai oqarfigalugit: ‘Kinguaas­siorlusi amerliar­toritsi nunarsuaq tamakkerlugu ilissinnullu naalatsigitillugu.’” (Mos 1. 1:28) Tassa Jehovap siunertani oqaatigigamiuk oqarporlusooq “Alfa”. Siunertani eqquutereerpat Adamip Evallu kinguaavinik aalajaatsunik nunarsuaq ulikkaarpat paratiisin­ngorpallu Jehova oqassaarlusooq “Omega”. Aallaqqaammut, “qilaap nunallu qilaallu perpassuisa tamarmik pinngor­titaanerat” naammassimmat, Jehovap ullut arfineq-aappaat illernar­tillugu immikkoortippaa. (Mosesimik 1. 2:1-3 atuakkit). Taamaalior­nermigut suna ersersippaa? Jehovap qularnaveeq­qutitut uppernarsaavigaatigut inunnut nunarsuarmullu siunertani ullut arfineq-aappaata naanerani naammas­sissasoq.

15. Sooq Saatani eqqarsarsimassava Jehovap siunertaata naammas­sinissaanik ajornar­titsilersimalluni?

¹⁵ Adami Evalu pikitsitsigamik ajortulior­tunngorput kinguaaminnullu ajorti toqulu kingornutsillugit. (Rom 5:12) Tamatuma kingunerisaanik nunarsuup inunnik naammal­luinnartunik aalajaatsunillu ulikkaarnissaa pillugu Guutip siunertaa ajornarpasilerpoq. Soorlulusooq Jehovap “Omega”-mik oqarnissaa Saatanip ajornarsisikkaa. Saatani eqqarsarsimassaaq Jehovap neriorsuutini naammas­sisinnaan­ngikkaa. Immaqa eqqarsarsimavoq Jehovap Adami Evalu toqussagai inunnullu siunertani naammas­siumallugu aappariit naammal­luinnartut nutaat pinngor­tissagai. Guutili taamaaliorsimagaluarpat Saatanip sallulior­nerassagaluarpaa. Sooq? Mosesimik allakkat siulliit 1:28-mi allaatigineqartutut Jehovap Adami Evalu oqarfigisimammagit nunarsuaq taakkua kinguaavinik ulikkaassasoq.

16. Sooq Saatani eqqarsarsimasinnaava Jehova iluatsitsin­nginnerarsin­naallugu?

¹⁶ Guutip sunik periarfis­saqarnera Saatanip qanoq eqqarsaatigisimasinnaavaa? Immaqa Saatani eqqarsarpoq Jehovap Adamip Evallu naammal­luinnar­tunngorsin­naanngitsunik qitornior­nissaat akuerissagaa. (Oqal 7:20; Rom 3:23) Adamip Evallu qitornai naammal­luinnar­tunngorsin­naanngippata Diaavulup Jehova iluatsitsin­nginnerarsimas­sagaluarpaa, Jehovammi nunarsuup inunnik naammal­luinnartunik ulikkaarnissaa siunertarivaa.

17. Saatani, Adami Evalu pikitsitsigaluartut Jehova qanoq aaqqiis­sutissaqarpa, naggataatigullu suna naammas­sineqassava? (Aamma assiliaq takuuk).

¹⁷ Saatani, Adami Evalu pikitsitsisimagaluartut siunertani naammas­siniarlugu Jehova pitsaanerpaamik aaqqiis­sutissaqarpoq. Saatanillu tamanna takorloorsiman­ngisaannarpaa. (Tuss 92:6) Adamip Evallu meeqqior­nissaat Jehovap akuerigamiuk uppernarsarpaa salluliornani oqaatsini ilumoortuusut. Aamma ersersippaa siunertaminik eqqortitsisarami iluatsitsiuaan­narluni. Adamip Evallu kinguaavinik aalajaatsunik annaassisussamik ‘kinguaassamik’ pilersitsivoq. (Mos 1. 3:15; 22:18) Jehovap utertitsis­sutitut akiliummik aaqqiissutaa Saatanip ilimaginagu tupigusuutigingaarsimassavaa! Sooq? Tamanna namminis­sarsiorani asanninnermut ersiutaammat. (Mat 20:28; Joh 3:16) Saatanilu namminis­sarsior­tuugami asannis­suseqanngilaq. Utertitsis­sutitut akiliut pissutigalugu suut naammas­sineqassappat? Jehovap aallaqqaammut siunertaa eqquutissaaq. Kristusip ukiuni 1.000-ni naalakkersuinerata kingorna Adamip Evallu kinguaavi aalajaatsut naammal­luinnartullu nunarsuarmi paratiisiusumi inuussapput. Taamanik­kussamullu Jehova oqassaarlusooq: “Omega.”

JEHOVAP PARATIISISSAMIK NERIORSUUTAA QANOQ UPPERINERULERSIN­NAAVARPUT?

18. Jehovap sunik pingasunik uppernarsaavigaatigut? (Aamma ungalusaq “Jehovap neriorsuutaata upperinissaanut pissutaasut pingasut” takuuk).

¹⁸ Guutip paratiisissamik neriorsuutaanik qularutigin­nittunut sammisatsitut suut oqaluttuarisin­naavagut? Siullertut, Jehova nammineq neriorsuivoq. Saqqummersitani ima allassimavoq: “Guuti issiavis­saarsuarmi issiasoq oqarpoq: ‘Takuat! Suut tamaasa nutaanngor­tippakka.’” Neriorsuutiminik eqqortitsinis­saminut ilisimas­suseqarlunilu pissaaneqarlunilu kissaateqarpoq. Aappaattut, Jehovap nalunnginnamiuk neriorsuutini eqqortik­kumaarlugu eqquutereersutut ima oqaatigaa: ‘Oqaatsit taakku tutsuiginarlutillu ilumoorlutillu eqquupput!’ Pingajuattut, Jehovap aallarnikkani naammas­siuaannarpaa. Ima oqaaseqar­nermini tamanna uppernarsarpaa: “Uanga tassaavunga Alfa aamma Omega.” Aap, Jehovap uppernarsassavaa Saatani sallutuujusoq iluatsitsinavian­ngitsorlu.

19. Guutip paratiisissamik neriorsuutaa inuit upperiuminaatsik­kaangassuk susarsinnaavit?

¹⁹ Eqqaamajuk Jehovap qanoq uppernarsaavigigaatigut allanut oqaluttuarigaangakku neriorsuutai upperineruler­tarakkit. Taamaattumik tulliani paratiisissaq pillugu neriorsuutaa killitsinnartoq Saqqummersitat 21:4-mi takutikkukku oqartoqas­sappallu upperiuminaatsoq qanoq iliorsinnaavit? Versi 5 aamma 6 atuarsin­naavatit nassuiarlugillu. Nassuiarsinnaavat Jehovap qanoq uppernarsaavigigaatigut neriorsuutini pinngitsoorani eqquutissasoq, soorlulusooq nammineq uppernarsaalluni atsiorsimasoq. – Es 65:16.