Tamanut oqaluussinermi oqaluusseriaaseq nutaaq pissanganartorlu
1. Ilagiit qanoq kajumissaarneqarpat?
1 Ilagiit angalaarfigisartagaanni pisuinnarnut angallattorpassuaqarfeqarpat ilagiit kajumissaarneqarput tamanut oqaluussinermi nerrivik imaluunniit atuagaasivik angallattagaq atorlugit oqaluussinissamut aaqqissuusseqqullugit. Atuagaasivik angallattagaq atorneqarpat oqaluussisartoq minnerpaamik ataaseq atuagaasiviup eqqaaniissaaq. Nerrivilli atorneqarpat oqaluussisartut marluk tamatigut eqqaaniittassapput. Atuagaasiviup eqqaaniittut qanilaartuussapput inussiarnersuullutillu saaffigiuminartut. Soqutiginnittumik orniguttoqarpat oqaluussisartup aappaata oqaloqatiginiarsinnaavaa imalu aallarniisinnaalluni: “Tamakku pillugit Biibilimi qanoq allassimasoqarnera eqqarsaatiginikuuiuk?” Oqaluussisartoq alla ataaseq imaluunniit allat marluk atuagaasiviup ungasinngisaani torrutiinnarlugu oqaluussisinnaapput.
2. Misigisaq oqaluusseriaatsip tamatuma pingaaruteqassusianik ersersitsisoq oqaluttuariuk.
2 Oqaluusseriaatsip tamatuma kinguneraa Biibilimik atuaqqissaartartut nutaat amerleriarsimanerat. Ilinniartup ataatsip Jehovap Nalunaajaasui allaaseriniarlugit toqqarsimavai naalagaaffilersaarfimmilli nassaarsinnaasimanani. Ullorpaaluilli qaangiummata nerrivik atuagaasivik ilinniarfiup qanittuaniittoq takulerpaa. Arnaq taanna Biibilimik atuaqqissaaqatigineqartalerpoq, maannalu oqaluussisartuuvoq kuisimasoq periutsimullu tamatumunnga nammineq oqaluusseqataasarluni.
3. Oqaluusseriaaseq tamanna oqaluussisartut ilaasa qanoq isumaqarfigaat?
3 Qatanngut arnaq oqaluusseriaatsimik tamatuminnga misilittagalik ima oqaluttuarpoq: “Ilaat atuagassianik nutaanik perusullutik atuagaasiviup saavanut pisarput. Allat Jehovap Nalunaajaasui pillugit tusarsimanngisaannarsimapput. Taamatut oqaluussineq inuppassuarnik oqaloqatiginnilersitsisarpoq.” Qatanngut arnaq alla ima oqarpoq: “Oqaluusseriaaseq nutaajuvoq pissanganarlunilu inuit nammineerlutik ornittarmatsit aamma soqutiginninngikkaluarlutilluunniit alapernaattarmata.”
4. Sooq nerriviup atuagaasiviulluunniit angallattakkap sapaatip-akunneri tamaasa piffissami aalajangersimasumi inissisimaffimminiittuartarnissaa ajunnginnerussava?
4 Nerrivik atuagaasivilluunniit angallattagaq sapaatip-akunneri tamaasa piffissami aalajangersimasumi inissisimaffimminiittuartarpat ajunnginnerussaaq. Inuit taamaasillutik nerrivik atuagaasivilluunniit angallattagaq takujuaannaleraangamikku sungiussiartornerminni aggerlutik apeqquteqarniartarput atuagassianilluunniit piumasarlutik. Illit ilagiinni taamatut tamanut oqaluussinermik aaqqissuussisoqarnikuua? Taamaassimappat immaqa ‘illit Guutip naalagaaffia oqaluussissutigalugu’ nuannersumut inerititaqarnangaartumullu tamatumunnga peqataasinnaavutit. — Luk 9:60.