Tamanut oqaluussinermi aaqqissuussat nutaat
1. Ukiuni hundredelinni siullerni kristumiut qanoq maligassiuippat?
1 Ukiuni hundredelinni siullerni kristumiut illumiit illumut oqaluussiinnaratik aamma tamanut saqqumisumik oqaluussisarput. (ApS 20:20) Assersuutigalugu naalaffimmukartarput nalunnginnamikku inuppassuit tamaani naapissinnaallugit. (ApS 5:42) Apustili Paulusi Athenimiitilluni inunnut niueriartortarfimmiittunut ullut tamaasa oqaluussisarpoq. (ApS 17:17) Ullumikkut illumiit illumut oqaluussinitsigut nutaarsiassamik nuannersumik siaruarterinerusarpugut. Taamaattorli aamma biilit unittarfiini, niuertarfinni, naatsiiviliarsuarni, aqqusinersuarni aamma inuit ornittagaanni allani oqaluussisarpugut. Naak oqaluussisartut tamarmik sumiluunniit tamanut oqaluussinissaminnut kajumissaarneqaraluartut tamanut saqqumisumik oqaluussinermi aaqqissuussanut nutaanut marlunnut peqataanissaminnut periarfissaqalissapput.
2. 2011-mi novembarimi suna misiliutigalugu suliniutigineqalersimava?
2 Illoqarfissuarni immikkut ittumik tamanut oqaluusseriaaseq: Soorlu ‘Årbogen’ 2013-imeersumi qupperneq 16-imi 17-imilu allaaserineqartoq, 2011-mi novembarimi New York City-mi tamanut oqaluussilluni misiliummik suliniuteqartoqalersimavoq. Nerriviit aamma atuagaasiviit angallattakkat assilialianik soqutiginartunik saqqalinnik Biibililersaarutinillu oqaatsinik assigiinngitsunik allanneqarsimasunik ilioraaffigineqarsimasut amerlasuut aqqusaartagaannut inissinneqarsimapput. Ullut tamaasa inuit tusindilippassuit, aamma inissiani isumannaallisakkani najugallit inuillu angerlarsimarpiartanngitsut, sanioqquttarput. Soqutiginnittorpassuaqarpoq. Qaammatimmi ataatsip ingerlanerinnaani atuagassiat 3797-it aamma atuakkat 7986-it tunniunneqarsimapput. Sanioqquttut ilarpassui atuaqqissaaqatigineqarnissaminnik noqqaassuteqarsimapput. Atuaqqissaaqateqalernissaq siunertarineqarmat, soqutiginnittut immersugaat tamarmik ilagiinnut taakku najugaqarfiisa qanittuaniittunut ingerlaannaq nassiunneqarput.
3. Suliniuteqarneq qanoq annertusarneqarpa?
3 Suliniut iluatsilluarmat maanna aaqqissuussaq silarsuaq tamakkerlugu illoqarfissuarni tamani atuutilersinneqarpoq. Immikkoortortaqarfinni aalajangerneqassaaq illoqarfiit sorliit aaqqissuussamut tulluartuunersut. Nalinginnaasumik tassaasinnaapput illoqarfiit angallaffiunerpaasut imaluunniit allaffeqarfippassuallit inissiarsuaqarfiusullu pisuinnarnik aqqusaarneqarluartartut. Tamatuma kingorna ilagiit peqataaniartut immikkoortortaqarfinnit saaffigineqassapput paasissutissanillu amerlanerusunik tunineqassallutik. Pionerit specialpionerillu nalinginnaasumik toqqarneqartarput allanili ikiorti-pionerit suliniummut peqataatinneqartarput.
4. Illoqarfissuarni immikkut ittumik tamanut oqaluussineq qanoq ingerlanneqartarpa?
4 Oqaluussineq qanoq ingerlanneqartartoq: Illoqarfissuarni immikkut ittumik tamanut oqaluussinermut peqataasut nerrivimmut imaluunniit atuagaasivimmut angallattakkamut orniguttoqarnissaa utaqqisarpaat. Orniguttut Biibililersaarutinik soqutigisaminnik tigusisinnaapput. Apeqqutissaqartoqaraangat apeqqutaat pionerit kajumillutik Biibilimiit akisarpaat. Biibililersaarutinik tigusisoqaraangat qanoq aningaasatigut tapersiisoqarsinnaanera pionerit oqaatigineq ajorpaat. Suliniarnerpulli qanoq aningaasalersorneqartarnersoq pillugu aperisoqarpat Biibililersaarutit tunuanni adressinut allassimasunut nassiussisoqarsinnaanerannik nassuiaassapput. Aperisoqarsinnaavoq: “Illit angerlarsimaffinni pulaartoqarusuppit?” Imaluunniit: “Nalunngiliuk atuagaq una atorlugu akeqanngitsumik atuaqqissaaqatigineqarsinnaallutit?”
5. Aaqqissuussamut suleqataaneq qanoq nuannaarutaasimava?
5 Aaqqissuussamut suleqataaneq nuannaarutaasimaqaaq. Aappariit ima allapput: “Nerriviup tunuaniittuulluni inuillu tusindillit ullut tamaasa sanioqquttartut isigalugit nunarsuaq tamakkerlugu inuit oqaluussiffiginiarlugit qanoq suliniartoqartigisoq eqqarsarnanngitsoornanngilaq. Inuppassuarnik takunnittarnerput Jehovallu inunnik tamanik soqutiginninneranik eqqarsaatiginninnerput oqaluussinermik salliutitsinissatsinnut nakussatsissutigaarput. Takorloortarparput inunnik qinngaqqunnaanngitsunik ujaasilluni Jehovap sanioqquttut tamaasa uummataat misissuiffigisarai. Aatsaat taama inngilinik qanimut suleqatiginnilluartigaluta misigaavut.”
6. (a) Ilagiippassuit tamanut oqaluussinermut qanoq suliniuteqarsimappat illoqarfissuarnilu immikkut ittumik tamanut oqaluussineq qanoq allaassuteqarpa? (b) Tamanut oqaluussinermi ilagiit qanoq suleqatigiissinnaappat?
6 Tamanut oqaluussineq ilagiinnit aaqqissugaavoq: Illoqarfissuarni immikkut ittumik tamanut oqaluussinerup saniatigut ilagiinni utoqqaanertarpassuit namminneq illoqarfimminni suliniummik allamik aaqqissuusipput. Suliniuteqarnermi tamatumani inuppassuit ingerlaarfigisartagaannut nerrivik imaluunniit atuagaasivik angallattagaq, oqaluussisartut ilagiit oqaluussiffigisartakkamik killeqarfiata iluani, inissittarpaat. Illoqarfissuarni immikkut ittumik tamanut oqaluussineq allaaneruvoq, illoqarfinni angallaffioqisuni taakkunani immikkoortortaqarfimmit toqqarneqarsimasuni ilagiit assigiinngitsut peqataaffigisaannik oqaluussisoqarpoq. — Takuuk ungalusaq “Suleqatigiilluarneq pisariaqarpoq”.
7. Sumiiffinni naleqquttuni, utoqqaanertat tamanut oqaluussinissamik qanoq aaqqissuussissappat?
7 Utoqqaanertat aalajangissavaat ilagiit illoqarfigisaminni angallaffiunerpaasumi tamanut oqaluussinissamik aaqqissuussinissaq pisariaqartinneqarnersoq. Immaqa nerrivik imaluunniit atuagaasivik angallattagaq angallaffiunerpaasumut, inuit katersuuffigisartagaannut, naatsiiviliarsuarnut, aqquserngini ulapaarfiusunut, pisiniarfiit eqqaannut, ilinniartut ineqarfiannut, timmisartoqarfinnut aamma pisoqarfiusunut inissinneqarsinnaavoq. Ullormi aalajangersimasumi aamma sumiiffimmi piffissamilu aalajangersimasumi nerrivik inissinneqarpat pitsaanerussaaq. Niuertarfiit ataasiakkaat, inuit aalajangersimasumik pisiniarfigisartagaasa silataanut nerrivimmik inissiinerminngarnit illorsuarmi amerlasuunik niuertarfilinni nerrivimmik inissiinissaq pitsaanerusoq paasineqarsimavoq. Sumiiffiit ilaanni, assersuutigalugu pisuinnaat aqqutigisartagaanni, atuagaasivik angallattagaq kisiat atorneqaruni tulluarnerussaaq. Atuagassiat Napasuliaq Alapernaarsuiffik, Vågn op! aamma atuagaq Biibilimi ajoqersuutigineqartut ilisaritinniarlugit assilissanik nittartakkatsinni utoqqaanertanit aaneqarsinnaasunik immikkut ittumik fililiortoqarsimavoq. Filit taakku tamanut oqaluussinermi atorneqartussanngorlugit sananeqarsimapput. Kiffartornermik nakkutilliisup malittarisassiai maleqqissaarlugit peqataasut illoqarfissuarni immikkut ittumik tamanut oqaluussisut iliornerattut iliuinnassapput. Soqutiginnittumik oqaluussiffigisaminni najugaqanngitsumik naapitsisoqarpat immersugassaq Besøg venligst (S-43) immersoriarlugu ilagiinni allatsimut tunniunneqassaaq.
8. Ilagiinni tamanut oqaluussinissamut aaqqissuussisoqarsimanngippat suut periarfissaappat?
8 Illit oqaluussininni tamanut oqaluussineq: Illoqarfimmi angallaffiuallanngitsumi ilageeqaruni nerrivimmik atuagaasivimmillu angallattakkamik inissiinissaq tulluartuunavianngilaq. Taamaattorli ilagiinni taakkunani oqaluussisartut kajumissaarneqarput nammineq tamanut oqaluussiniartaqqullugit. Illit oqaluussiffigisartakkanni uiguleriiaanik imaluunniit ulapaarfiusumik pisiniarfeqarpa? Katersuuffiusartumik inuit ornittagaqarpat? Najukkanni aalajangersimasumik pisoqarfiusunut katersuuttoqartarpa? Taamaappat tamanut oqaluussinissamut periarfissaqarluarputit.
9. Sooq inuit sumiikkaluartulluunniit peqqissaarluta oqaluussiffiginiartariaqarpavut?
9 Jehovap kissaatigaa “inuit tamarmik annaanneqassasut sallusuissummillu ilisarsissallutik.” (1 Tim 2:4) Taamaattumik naggatissap tikiutinnginnerani sapinngisamik inuit amerlasuut naalagaaffik pillugu tusarlerniartarpavut. (Matt 24:14) Sumiiffinni amerlasuuni inuit angerlarsimaffimminni naapinniarneri unamminiarnartuusarpoq. Silamili naapitassaaneranni oqaloqatiginiartariaqarpavut. Immaqa inuit ilaasa taamaallaat tamanut oqaluussineq aqqutigalugu nutaarsiassaq nuannersoq tusarsinnaavaat. Taamaattumik inuit sumiikkaluartulluunniit oqaluussiffiginerisigut kiffartornerput naammassiniartigu. — 2 Tim 4:5.
[Qupp. 5-mi ungalusaq]
Suleqatigiilluarneq pisariaqarpoq
Nalunaaruteqartoqarsimavoq ilagiit arlallit ilaannikkut aqqusinermi, biilit unittarfiini, niuertarfimmi aqqusinermiluunniit angallaffiunerpaasumi ataatsimi ataatsikkut oqaluussisarsimasut. Oqaluussisartut ilagiinnit assigiinngitsuneersut saaffiginnittarfimmi, utaqqisarfimmi imaluunniit errorsisarfimmi ataatsimi atuagassianik ilisisarsimallutillu niuertarfimmi ataatsimi oqaluussisarsimapput. Ataatsikkut tassaniissimanngikkaluarlutilluunniit oqaluussinerat niuertarfinni sulisunut aamma ineqartunut uumisulersitsisimavoq. Taamaattumik pitsaanerpaassaaq ilagiit oqaluussiffigisartakkamik killeqarfiata taamaallaat iluani tamanut oqaluussisarpata.
Oqaluussisartut ilagiit allat oqaluussisarfianni oqaluusserusukkunik kiffartornermik nakkutilliisortik oqaloqatigeqqaassavaat. Taamaaliortoqannginnerani kiffartornermik nakkutilliisup ilagiinni pineqartumi kiffartornermik nakkutilliisoq isumaqatigiissuteqarfiginiarlugu saaffigissavaa. Ilagiit allamiutut oqaasillit oqaluussiffigisartakkami ataatsimi aamma oqaluussisarunik, inuit pisariaqanngitsumik uumisuleqqunagit kiffartornermik nakkutilliisut suleqatigiilluartariaqarput. Suleqatigiilluarnikkut suna tamarmi “ippinnanngitsumik torersumillu” ingerlalluarsinnaavoq. — 1 Kor 14:40.
[Qupp. 6-mi assiliartaq]
[Qupp. 6-mi assiliartaq]