Immikkut suliniarneq kinguneqarluartarpoq

Ataatsimeersuarnerup aallartinnissaata sapaatit-akunneri pingasut sioqqullugit ilagiit oqaluussiffigisartakkaminneersut ataatsimeersuarnermut najuunnissaannut qaaqquniarlugit immikkut suliniaqqissapput. Ukiumoortumik immikkut suliniarnermut peqataanissamut pissutissaqarluarpugut. Ataatsimeersuarnermut qaaqquneqarsimanertik pissutigalugu najuuttut oqalugiaatit Biibilimik tunngavillit, nammineq kajumissutsimit sulisut, ileqqorissaarnerput ataasioqatigiinnerpullu tupigusuutigisarpaat. (Tuss 110:3; 133:1; Es 65:13, 14) Immikkulli suliniarnerput, ingammik soqutiginnittut ataatsimeersuarfimmit ungasissumik najugaqarpata, kinguneqarluassava?

2011-mi ataatsimeersuarnerup kingorna immikkoortortaqarfik arnamit, isaariamini qaaqqusissummik nassaarsimasumit, allagarsivoq. Arnaq taanna Jehovap Nalunaajaasui kasuttoraangata toqqortarsimagaluartoq ima allappoq: “Nuannersumik angerlarsimaffeqarpunga, asangaakkannik ueqarpunga aamma amigaateqanngitsutut pilluartutullu misigisaraluarpunga. Ajoraluartumilli pilluarnangalu inuuninni siunertaqanngitsutut misigivunga. Taamaattumik arfininngornermi ataatsimeersuarneq najuuffigiartorniarlugu 320 kilometerisut isorartussusulimmik biilerpunga.” Ataatsimeersuarnermut najuunnini nuannaringaaramiuk uiminut sianerpoq oqarfigalugulu sapaammi saqqummiunneqartussat tusarnaarusukkamigit unnuiniarluni. “Oqalugiaatinut suli amerlanerusunut tusarnaarusukkaluarlungalu Jehovap Nalunaajaasorpassui suli sivisunerusumik katerisimaaqatigerusukkaluarpakka.” Ataatsimeersuaqataareerluni atuaqqissaartalerpoq qaammatillu sisamat qaangiummata oqaluussisartunngorluni kuisimanngitsoq. “Qaaqqusissut isaariannut ilineqarsimanera qujamasuutigingaarpara, maannami inuunera siunertaqalerpoq!”

Inuit ilaat qaaqquneqartut najuukkiartussapput. Taamaattumik immikkut suliniarnermi pingaaruteqartumi aallussilluarlutit peqataagit. Qaaqqusissutit sinneruttut tamaasa illoqarfimmut ataatsimeersuarfiusumut nassakkit torrutiinnarlugulu oqaluussinermi atorlugit.

[Qupp. 5-mi ungalusaq]

Agguaassinitsinni qanoq oqassaagut?

Oqaluussiffigisartagarput tamakkissagutsigu naatsumik saqqummiisariaqarpugut. Ima oqarsinnaavugut: “Aluu. Nunarsuaq tamakkerlugu pisussamut qaaqqusissutinik agguaasseqataavugut, aajunalu illit pissat. Qaaqqusissummi paasisaqarnerusinnaavutit.” Uummaarissuugit. Naleqquppat akunnerup naanerani immikkut suliniaqataanermi atuagassiaativut ilanngullugit neqeroorutigisinnaavavut.