Aapparisaq allamik upperisalik qanillisinnaaviuk?
1. Sooq kristumiut allamik upperisalimmik aappaqartut kisiartaallutik kissaatiginngilaat aapparisap pallorfiginninnermik ilumoortumik ingerlalernissaa?
1 Illit ilagiinni oqaluussisartoqarpa allamik upperisalimmik aappaqartumik? Taamaattoqarpat, qularnanngitsumik oqaluussisartut taakkua pallorfiginninnermik ilumoortumik aapparmik ingerlaqatiginissaat kissaatigingaassavaat. Taakkuali kisimik taamak kissaateqanngillat. Guutitulli ilagiit tamarmik ‘piumasaraat inuit tamarmik annaanneqassasut sallusuissumillu ilisarsissallutik.’ (1 Tim 2:4) Qanoq ililluta ilagiinni oqaluussisartut aapparisaat allamik upperisallit qanillisinnaavavut?
2. Aapparisap allamik upperisallip qanillinissaanut paasisimasaqarnitta qanoq ikiorsinnaavaatigut?
2 Siullermik pingaarnerusumilli aapparisap allamik upperisallip tungaaniit paasinninniartariaqarpugut. Aappaasut allamik upperisallit amerlasuut ilaquttatik asavaat aappaalluarumallutik angajoqqaajulluarumallutillu sapinngisaminnik iliorlutik. Immaqa uagutsinnit allaannerusumik upperisamik paasinnissimassapput. Jehovalluunniit Nalunaajaasui immannguaannaq ilisimasaqarfigaat, nalunngisaminnit paasisimasaqanngitsunit kinaassusersiortunit paasisimasatik kisiisa ilisimallugit. Aappaasut ilaasa immaqa narraatigaat aapparmi siornatigut piffissaq ilaquttaminut atortarsimasaa maannakkut Jehovamut pallorfiginninnermut atortalermagu. Paasisimasaqarnitta ikiussavaatigut aapparisaq ilagitillugu annilaangavallaarnata inussiarnersumik ataqqinnittumillu pissusilersornissatsinnut. — Uss 16:20-23.
3. Aapparisaq allamik upperisalik sallusuissummik soqutiginnilersinniarlugu, qanoq iliorutta pitsaanerussava?
3 Inuttut soqutiginninneq: Immaqa aallaqqaataani — suliatsigut biibililersaarnikkuunngitsoq, aapparisaq allamik upperisalik sallusuissummik soqutiginnilersissinnaavarput. (1 Petr 3:1, 2) Tamatumani pingaarutilerujussuuvoq inuttut soqutiginninneq takutissallugu. Qatanngutit arnat nuliaasoq allamik upperisalik, qatanngutillu angutit uiusoq allamik upperisalik soqutiginninnermik ersersitsivigisinnaavaat. Qanoq?
4. Inuttut soqutiginninnermik qanoq iliorluta takutitsisinnaavugut?
4 Aapparisaq suli naapissimanngikkukku aappaasoq kristumiu isumasioriarlugu naapinniarsinnaavat. Aapparisap allamik upperisallip aallaqqaataani ilassiorpallaanngippatit pakatsiniaqinak. Inussiarnersuugutta aappaasorlu inuttut soqutiginninnermik takutitsivigalugu, Jehovap Nalunaajaasuinut pitsaanerusumik isiginnittaaseqalersinnaavoq. (Rom 12:20) Kristumiut inersimalluartut ilaasa aappaasoq ilaqutaalu neriartoqqusimavaat taanna ilikkarluarumallugu, aammalu Jehovap Nalunaajaasuinik kinaassusersiornerit illuatungilerumallugit. Anersaakkut tunngasut oqaloqatigiissutiginiarsariinnarnagit taassuma soqutigisai oqaloqatigiissutigaat. Immaqa kingusinnerusukkut, allamik upperisalik toqqissisimaneruleruni Biibilimik tunngasut oqaloqatigiissutigisinnaalissavaat. Immaqaluunniit aapparisaq, pingaartumik ilagiinni ilisarisimasaqareersimaguni, ataatsimiinnermut qaaquneqaruni aggerumassaaq paasiniarlugu aapparmi suut ilinniarnerai. Sallusuissutilluunniit misissorusunissaanut piareersimanngikkaluarpat nersualaarsinnaavarput aappani uppertoq tapersersormagu.
5. Utoqqaanertat aapparisaq allamik upperisalik qanoq ilillutik qanillisinnaavaat?
5 Pingaartumik utoqqaanertat aapparisaq uppeqatiginngisarput qanilliniarsinnaavaat eqqumaffiginiarlugulu qanoq ilillutik nalunaajaaffigisinnaanerlugu. Aapparisaq allamik upperisalik siornatigut Biibilimik tunngasunik soqutigisaqarsimanngitsoq, imaassinnaavoq napparsimmavimmi uninngatilluni imaluunniit peruluttumik napparsimalersimatilluni oqaatsinik qiimmaallannartunik Biibilimeersunik tusarusulersimassasoq. Inoqutigiit upperisaqaqatigiinngitsut pinartumik ajornartorsiuteqalissagaluarpata, assersuutigalugu ilaqutariinni toqusoqartillugu, utoqqaanertat aapparisaq oqarfigisinnaavaat ilaquttami tuppallersarneqarnerannut tusarnaarnissaminut tikilluaqqusaasoq.
6. Aapparisap allamik upperisallip qanillinissaanut sunik pissutissaqarpugut?
6 Takorluulaariaruk qanoq nuannertigissagaluartoq ilagiinni qatanngutip aappani sallusuissummiileraluarpat! Pisimasoq tamanna Jehovamut, inngilinut ilagiinnullu nuannaarutaangaassaaq. (Luk 15:7, 10) Aapparisaq allamik upperisalik aallaqqaataani ajunngitsumik qisuarianngikkaluarpalluunniit, Jehova ‘kimilluunniit tammaqqusinngitsoq, tamaasalu allamik isumataarnissamut periarfissiiumasoq’ iluarusutsinnissaanik ilungersortuarnerput nuannaarutigisinnaavarput. — 2 Petr 3:9.
[Issuagaq 6-mi assiliartaq]
Immaqa aallaqqaataani — suliatsigut biibililersaarnikkuunngitsoq, aapparisaq allamik upperisalik sallusuissummik soqutiginnilersissinnaavarput