Oqaluussineq inuup inuuneranik annaassisarpoq
1 Ulluni makkunani sulianit tamanit pingaarnerpaavoq. Jehova Guutip, Jiisusi Kristusip inngilerpassuillu 10 tusindillit suliaq tamanna malinnaaffigaat. Sunaana suliaq, aammalu sooq taama pingaaruteqartigaa? Tassa Naalagaaffik pillugu oqaluussineq, inuit annaanneqarnissaannut pissutaaqataasoq. — Rom 1:16; 10:13, 14.
2 Inuit ilaat isumaqarput silarsuaq inuuffigisarput pitsanngorsarniarsarigutsigu inuit ikiorluarnerusinnaagivut. Amerlasuut eqqissineqarnissaq ilungersuutigisarpaat nappaatit aningaasatigulluunniit ajornartorsiutit aaqqinniarlugit suliniuteqarlutik. Taakkununngali suna iluaqutaanerusinnaava?
3 Suliaq naleqarnerungaartoq: Naalagaaffimmik tusarliussap kisimi inuunerup siunertaa suunersoq inuillu naalliuutaannut suna pissutaanersoq akissutissaqartippai, siunissamilu tutsuiginartumik neriuutissaqalersitsisarluni. Inuit tusagassaq nuannersoq ilikkarunikku Jehovamut ikinngutaalersinnaapput ’eqqissinerlu Guutimit pisoq siuneqassusernit tamanit annerungaartoq’ pigilersinnaallugu. (Fil 4:7) Naalagaaffimmik tusarliussaq kisiartaaluni inuit inuunerminni ajornartorsiutaannik qaangiiniarnermi maannakkut atoriaannaasunik siunnersuuteqarpoq silarsuullu ajortup suujunnaarsitaanissaanut qanoq inuuginnartoqarsinnaaneranik paasititsilluni. (1 Joh 2:17) Oqaluussinermi tamaviaarnissatsinnut pissutissaqarluannginnerpugut?
4 Assersuusiaq eqqarsaatigilaariaruk: Nunaqarfimmi inuit sinittut sapusiarsuup aseroqqajaaneranit suujunnaarsitaanissamut navianartorsiortut qanoq ikiorluarneqarnerusinnaappat? Sapusiarsuup qajannartup imaarsarneratigut? Nunaqarfiup suujunnaarsitaaniartup kusassarneratigut? Naamik! Nunaqarfimmi innutaasut itersarneqartariaqarput navianartumut mianersoqqullugit isumannaatsumukaallugillu. Inuit ullumikkut anersaakkut sinittut navianartorsiorluinnarput. (Luk 21:34-36) Aaqqissuussaaneq manna suujunnaarsitaangajalermat sapinngisamik amerlasuut ikiorniarlugit oqaluussineq pingaarnerutittuartigu. — 2 Tim 4:2; 2 Pet 3:11, 12.
5 Tunniutiinnaqinak: Suli amerlanerusut qanoq ililluta tusagassamik nuannersumik killissinnaanerlugit eqqumaffigisigu. — Angerlarsimaffinni, aqqusinermi, oqarasuaatikkut torrutiinnarlugulu oqaluussinermi. Jehovap uagutsinnut suliakkiissutaa suliassaraarput tamanit pingaarnerpaaq. Uummammik tamakkiisumik suliarigutsigu ’immitsinnut annaatissaagut tusartivullu annatsillugit.’ — 1 Tim 4:16.