Qanoq ilillutik tusassappat?
1 Jiisusip aalajangersimasumik oqaatigaa: „Siullermik iivangkiiliu oqaluussissutigineqassaaq inuiaqatigiinnut tamanut.“ (Mark 13:10) Ilungersungaaraluarlutali suli inuit millionillit tusarliussaq nammineerlutik tusanngilaat. Nunat ilaanni suliarput naalakkersuisunit akerlilersorneqarpoq, nunanilu amerlasuuni inuit sukkaannaq amerliartupiloorput. Apeqqutaalerporlu: ’Qanoq ilillutik tusassappat’? — Rom 10:14.
2 Jehova tatigiuk: Inuit ataasiakkaat uummatimikkut qanoq ittuunerat Jehovap nalunngikkaa eqqaamasariaqarparput. Inuup ilumoorluni Guuti pillugu sallusuissut ujaruniuk naniumaarpaa, qanoq atuagaqarnera apeqqutaanani. — 1 Nal 28:9.
3 Abrahamip Sodomami Gomorramilu najugaqartut isumakuluutigai. Guutilli neriorsoqqissaarpaa quliinnarnilluunniit iluartoqassappat illoqarfik aserorniarnagu. (1 Mos 18:20, 23, 25, 32) Jehovap iluartut guutiitsunut ilanngullugit piuneerutitinngisaannarpai, soorlu Lotimut paniinullu iliorfiginninneratigut takuneqarsinnaasoq. — 2 Pet 2:6-9.
4 Elia qanga Guutimut ilumoortumut kiffartortuni amiakkutuaasorileraluarsimavoq. Jehovalli neriorsoqqissaarpaa kisimiinnginnerarlugu, sulianilu aallartissimasani naammassineqarumaartoq. (1 Kng 19:14-18) Ullutsinni qanoq ippa?
5 Guutimut kiffartornermi ulapputeqartuaannarit: Nalunaajaaneq qanoq annertutigisumik ingerlanneqarallassanersoq ilisimanngilarput. Jehovap suliassaq tamanna akisussaaffigaa inngilinilu aqqutigalugit nakkutigalugu. (Saqq 14:6, 7) Taassuma aalajangertussaavaa inuiaqatigiit qanoq sivisutigisumik nalunaajaaffigineqassanersut. Jehovallu iluariguniuk, Naalagaaffimmik tusarliussaq periaatsit takorloorsimanngisaannakkavut atorlugit tusarliussinnaavaa, amerlanerujussuit ’iivangkiiliu tusarniassammassuk uppertunngorlutillu.’ (ApS 15:7) Periaasia qanoq ittuussusianut naapertuulluinnassaaq — Guuti asannittoq, ilisimasoq naapertuilluartorlu.
6 Tusagassaq nuannersoq tamanut nalunaajaatiginiarlugu sapinngisamik iliussalluta pisussaaffigaarput, Jehovallu piumasaatut iliorneq immikkut pisinnaatitaafferujussuuvoq. — 1 Kor 9:16.