Jehovap Nalunaajaasuisa napparsimmavinnut paasissutissiisarfiat — kiffartuussisoq

Napparsimmavinnut paasissutissiisarfik suua?

Napparsimmavinnut paasissutissiisarfik kiffartuussiffiuvoq Napparsimmavinnut Attaveqaatit inuiannit tamalaaneersut suliaannik ataqatigiissitsisoq. Attaveqaatit taakku namminneq kajumissutsiminnik sulisunik sulisoqarput, ilinniartitaappullu suleqatigiissitsisussatut nakorsat napparsimmaviillu illua-tungeralugit napparsimasut upperisarsiortunut Jehovap Nalunaajaasuinut ilaasortaasut, pingaartumik nakorsaatitigut ilisimatuussutsikkut aammut taartaasinnaasunik atuinermut tunngatillugu.

Ullumikkut Napparsimmavinnut Attaveqaatit 1400-nit amerlarnerusut nunani 150-init amerlanerusuni taamatut kiffartuussipput. Attaveqaatit Europami 500-nit amerlanerupput.

Kiffartuussineq tamanna sooq pisariaqartinneqarpa?

Nakorsat amerlanerit ilaannikkuinnaq Jehovap Nalunaajaasuinik katsorsaasassapput. Taamaattumik naatsorsuutigineqarsinnaanngilaq nakorsaatitigut ilisimatuussutsikkut aammut taartaasinnaasut pillugit paasissutissat tamaviisa paasiniarnissaannut piffissaqassasut. Aappaatigulli Jehovap Nalunaajaasuisa kissaatigingaarpaat aalersortinnatik nakorsartinnissartik. Taamaattumik paasissutissanik tamatumunnga tunngassuteqartunik nutaanerpaanik paasiniaajuarniarlutik siulliullutik iliuuseqarput nakorsanullu neqeroorutigalugit.

Qanoq periaaseqarpat?

Napparsimmavinnut Attaveqaatit qinnuigineqaraangamik marlutsigut ikiuisinnaapput: (1) Aalersortinnermut taartaasinnaasut pillugit nakorsaatitigut ilisimatuussutsikkut allaaserisat nutaanerpaat neqeroorutigisarpaat, aamma (2) nakorsap napparsimasullu attaveqatigiilluarnerulertinniarsinnaavaat paatsuuinertaqanngitsumik kinguarsaasoqanngitsumillu katsorsaasoqarniassammat.

Attaveqaatit nakorsanik napparsimmavimmilu sulisunik allanik ataatsimeeqateqarusuttorujussuupput Jehovap Nalunaajaasuinilu katsorsaariaatsit atorneqarsinnaagunartut innersuussutigalugit.

Pisariaqassappat nakorsap Jehovap Nalunaajaasuisaluunniit ilaasa, nakorsamut, napparsimmavimmut napparsimasumulluunniit akeqanngitsumik, Napparsimmavimmut Attaveqaatinut ilaasortaq ulloq unnuarlu saaffigisinnaavaat. (Qatanngutit taamatut saaffiginninniarunik soorunami ilagiinni utoqqaanertat aqqutigissavaat.) Attaveqaatinut ilaasortap napparsimasoq nakorsaatitigut ilisimatuussutsikkut aammut taartaasinnaasunik assigiinngitsunik oqaluttuussinnaavaa, nakorsarlu nakorsaatitigut allaaserisanik tunisinnaallugu nakorsallu passussisussap nakorsaqatiminik tamatumunnga tunngasunik misilittagalimmik saffiginninnissaa isumagisinnaallugu. Napparsimmavinnut Paasissutissiisarfiup database nakorsaatitigut ilisimatuussutsikkut allaaserisanik 3000-nik amerlanersunik allaaserisaateqartoq atorsinnaavaa. Paasissutissat nutaanerpaat database-mut ilanngunneqartarput.

Nakorsap napparsimasullu attaveqatigiinnerannut iluaqutaasoq

Ataatsimiititaliamut ilaasortaasut amerlanersaat nakorsaatitigut ilisimatuussutsimut tunngasunik ilinniagaqanngillat nakorsallu suliassaanik arlaannaatigulluunniit inangerniarnagu. Nammineq piumassutsiminnik nakorsaatitigut allaaserisanik soqutiginartunik nakorsat pissarsiuukkumavaat. Nakorsallu passusisut kissaatigippassut nakorsanut immikkut ilisimasalinnut misilittagalinnut attaveqartissinnaavaat. Nakorsap napparsimasullu piaartumik ammasumillu oqaloqatigiinnissaat oqaloqatigiittuarnissaallu kajumissaarutigaat. Soorunami aatsaat erseqqissumik qinnuigineqarunik taamaaliussapput.

Nakorsanut iluaqutissaq

Nakorsaatitigut paasissutissat napparsimasunik Jehovap Nalunaajaasuisa ilaannik naammaginarluinnartumik katsorsaanerminni iluaqutigisinnaasatik nakorsat atuarsinnaalissavaat, tamatumunnga ilutigalugu napparsimasut taakku upperisarsiornikkut upperisaat innimigissavaat. Aammattaaq katsorsaariaatsit aalersortinnissamik pisariaqatitsivallaarunnaartitsisut aalersortinnerullu navianaatai — katsorsaariaatsit tamanut atorneqarsinnaasut Jehovap Nalunaajaasuinuinnaanngitsoq — atuarsinnaalissavaat.

Innuttaaqatigiinnut iluaqutaasoq

Napparsimmavinnut Paasissutissiisarfik pingaartumik Jehovap Nalunaajaasuisa pisariaqartitaannik ikiorsiisussatut pilersinneqarpoq. Paasissutissalli Napparsimmavinnut Paasissutissiisarfik aqqutigalugu pissarsiat, Jehovap Nalunaajaasuinillu katsorsaanermikkut nakorsarpassuit misilittagaat, nakorsat aammik atuinikillisissimavaat, tamannalu napparsimasunut tamanut iluaqutaavoq. Allaaserisami ’Blodbanktjenesten i forandring — En forsinket tak til Jehovas vitner’-mi professori Stein A. Evensen allappoq: „Aak pillugu Jehovap Nalunaajaasuisa aalajangiusimalluinnagaat aak imerpallassarujussuarlugu sakissakkut pilattaanermi aqqutissiuivoq. Pilattaasartut Jehovap Nalunaajaasuinik ’maskiinami-uummataasami’ tarajulersuiinnarlutik sukkulersuiinnarlutillu pilattaasut paasivaat pisariinneruinnarani atorusunnarnerusoq. . . . Taamaattumik oqaatigisariaqarpoq Jehovap Nalunaajaasui pilatsittariaqartut aqqutissiuisuusut Norgellu peqqinnissaqarfianni immikkoortoqarfimmi pingaarutilimmi pitsanngorsaanissamut kajumissaarisuusut.“ — Tidsskrift for den Norske Lægeforening 1993-moortoq; 113(1): 16-17

Napparsimmavinnut Paasissutissiisarfik nakorsanut, misissueqqissaartartunut, tusagassiortunut allanullu nakorsaatitigut ilisimatuussutsikkut aammut taartaasinnaasunik soqutiginnissinnaasunut kiffartuusseriaannaapput.

Immikkut ilisimasallit oqaasii

„Jehovap Nalunaajaasui Napparsimmavinnut Attaveqaateqarput atuagassianut innersuusseriaannaasunik aammattaarlu nakorsaqatinik ajornartorsiutinik pineqartunik misilittagalinnik paasissutissiisinnaasunik.“ — Sverigimi inunnik isumaginninnermik qullersaqarfik; nalunaarusiaq SOS 1995:14, Autolog transfusion och andra möjligheter att minimera allogen blodtilförsel, qup. 35.

„Jehovap Nalunaajaasui ataqatigiinnik Napparsimmavinnut Attaveqaateqarput ulloq unnuarlu attavigineqarsinnaasunik Jehovap Nalunaajaasuinik napparsimasunik katsorsaanermut tunngatillugu ikiorsiisinnaasunik.“ — The Royal College of Surgeons of England, Code of Practice for the Surgical Management of Jehovah’s Witnesses, qup. 5.

„Jehovap Nalunaajaasui upperisarsioqatigiinnut ilaasortaasunik paasisimasaqarluartunik ilaasortaqartunik attaveqaateqarput napparsimasumik nakorsamillu ikiuinissaminnut piareersimajuartunik. Attaveqatigiinnut ilaasortaasup Jehovap Nalunaajaasuisa aalajangiusimasaannik nakorsaatitigullu ilisimatuussutsikkut aammut taartaasinnaasunik nakorsaq nassuiaassinnaavaat, aammattaaq katsorsaasarfimmit aattaqangitsumik pilattaanissamik katsorsaanissamillu neqeroortumik nakorsaq ikiortissarsiorsinnaavaat, katsorsaasarfimmulluunniit taamaattumut napparsimasup nuunneqarnissaa isumagisinnaallugu.“ — Dr. Richard K. Spence. „Surgical Red Blood Cell Transfusion Practice Policies“, The American Journal of Surgery, Consensus Conference: Blood Management — Surgical Practice Guidelines, decembari 1995-moortoq, qup. 14S-15S.

„Jehovap Nalunaajaasui suleqatigilluarpagut. Assersuutigalugu nakorsanut atuagassianit silarsuarmit tamaneersunit aammik atuinikillisaaneq pillugu allaaserisanik pissarsissuttarpaannga. Piffissarujussuaq sipaartarpara! . . . Upperisarsioqatigiit napparsimasortaminnut aaqqissuussinerat aamma napparsimasunut tamanut nakorsaanikkut iluaqutaasinnaapput.“ — Nakorsaaneq Eric Haldén, Uppsala Akademiska Sjukhus.

„Pingaaruteqarportaaq Jehovap Nalunaajaasuinik oqaloqateqartarnissaq. Upperisaat ataqqineqartariaqarpoq. Katsorsaariaatsinut tunngasunik pingaarutilinnik arlaleriarlutik paasissutissittarpaannga. Pingaaruteqarnerpaagunarpoq katsorsaariaatsit allanngortinniarlugit tatisisarnerat.“ — Professori Björn Lisander, Universitetssjukhuset, Linköping.

„Jehovap Nalunaajaasuisa Napparsimmavinnut Attaveqaataat ajungitsumik pissarsinartumillu suleqatigaavut tamatsinnut iluaqutaasumik.“ — Docent Anders Bengtsson, Anæstesiklinikken, Sahlgrenska Universitetssjukhuset/Östra.

„Jehovap Nalunaajaasui ataqatigiissunik [Napparsimmavinnut] Attaveqaateqarput nalunaaquttap-akunnerani 24-ni sianerfigineqarsinnaasunik. . . . Ajornartorsiortoqaleraangat suleqataarusupput napparsimasullu [katsorsaasarfimmut allamut] nuunnissaat aaqqissupallassinnaallugu.“ — Dr. M.E. Boyd, Vice Chairman, Department of Obstetrics and Gynecology, Mcgill University, Montreal, Quebec, Journal SOGC, juuli/aggusti 1992-moortoq, qup. 7-9.