2002-imi Teokratiimik Atuarfik
1 Oqalussinnaaneq amerlasuut taamaattussaannartut isigisarpaat. Kisiannili tunissutaavoq Jehovamit pisarput. Taanna iluaqutigalugu allanik oqaloqateqarsinnaavugut, eqqarsaatigut misigissutsivullu oqaatigisinnaavavut minnerunngitsumillu Guuti unnersiutigisinnaavarput. — Tuss. 22:23; 1 Kor. 1:4-7
2 Angutit, arnat meeqqallu Teokratiimik Atuarfimmi Jehovap aqqanik ilisarisitsiniaanermi ajoqersorneqartarput. (Tuss. 148:12, 13) 2002-mi Atuarfimmi Pilersaarutip imarai oqaluuserisassat Biibiliminngaanneersut inuttut iluaqutigisinnaasavut oqaluussinermilu atorsinnaasavut. Piareersartarnikkut peqataasarnikkullu ilisimasatit alliartorsinnaapput Guutillu oqaasianik ilinniartitsinissamut pikkorinnerulerlutit. — Tuss. 45:1
3 Ullut tamaasa Biibilimit atuarneq: Eqqannguatsinni Biibileqartuaannarutta unillatsiartarnerput atorluarsinnaavarput atuarlugu. Amerlanerpaajusugut ullup ingerlanerani minutsialunnik uninngallatsiartarpugut tassunga atorsinnaasatsinnik. Ullormut qupperneq ataaseq atuartaraanni iluaqutaassaaq, tassa atuarfimmi Biibilimi atuagassamut pilersaarummi malinnaanissamut piumasaqaataasutuaq. — Tuss. 1:1-3
4 Biibilimit atuaallaqqikkaanni tusarnaartut ummataat killinneqarsinnaapput Jehovallu unnersiutiginissaanut kajumilersinneqarlutik. Qatanngutit angutit atuarfimmi pissassat aappaanik pisassaqartut, pissassartik atuartaqattaarlugu piareersartariaqarpaat. Atuarfimmik nakkutilliisup, pisaqartup atuallaqqissinissaanut ikiorniarlugu nersualaarlugulu siunnersussavaa.
5 ’Ræsonnerebogi’ atoruk: 3, 4-milu pisassat ’Ræsonnerebogimit’ tigusaapput. Immaqa amerlanerpaajusugut iluaqutissap tamatuma oqaluussinermi atornissaa eqqumaffiginerusariaqaraluarparput. Periaatsit qatanngutit arnat atugaat angalaartarfinni atorneqarsinnaassapput. Atuarfimmik nakkutilliisup eqqumaffiginerusariaqarpaa pisassaqartut qanoq ajoqersuinersut qanorlu allassimaffiit atortarneraat.
6 Qanortoq Teokratiimik atuarfiup, oqalussinnaaneq Guutip tunissutaa atorlugu tusarliussap nuannersup ilisaritinnissaanut, pinngortitsisorsuattalu Jehovap unnersiutiginissaanut tamatta ikiorlitigut. — Tuss. 34:2; Ef. 6:19