Tusarnaaqqissaartuugit
1 Tusarnaaqqissaassagaanni imminut naalakkersinnaasariaqarpoq. Tusarnaartoq aamma ilinniarusussuseqartariaqarpoq tusakkanilu iluaqutigiumallugit. ’Taamaattumik sianiginiaritsi qanoq ilillusi tusartusi,’ Jesus oqaaqqissaarivoq. — Lúk. 8:18.
2 Ingammik taamaassaagut ilagiit ataatsimiinneri ataatsimeersuarnerillu najuuffigigaangatsigit. Taakkunani tusarnaaqqissaarnissamut pissutissaqarluarpoq. (Epr. 2:1) Tulliuttut kristumiut katerisimaarnerini tusarnaaqqissaarnissamut iluaqutaasinnaapput.
◼ Ataatsimiinnerit pingaartikkit. Ataatsimiinnerni ’pilittaq ilumoortoq’ aqqutigalugu ’Jehovamit ajoqersorneqartarpugut’. — Jes. 54:13; Lúk. 12:42.
◼ Ataatsimiigiannginninni piareersartarit. Sammineqartussat misissukkit, Biibilit atugassallu nammineq pigisatit nassakkit.
◼ Malinnaaqqissaarniarsarigit. Sapinngisamik sanilitit oqaloqatiginaveersaakkit, najuuttulluunniit sunersut malinnaaffiginaveersaakkit. Ataatsimiinnerup kingorna sussanerlutit allalluunniit ilinnut tunngasut eqqarsaatigalugit imminut akornusersoqinak.
◼ Sammineqartoq eqqarsaatigiuk, imminullu aperigit: ’Uannut tamanna qanoq attuumassuteqarpa? Qanoq atorsinnaavara?’
◼ Pingaarnerit allassimaffiillu allattukkit. Pineqartut malinnaaffiginissaanut ikiussavaatsit, saqqummiunneqartullu pingaarnersaat eqqaamanissaanut kingornagullu atornissaanut iluaqutigisinnaassavatit.
3 Meeqqatit tusaarnaarnissaannut ilinniartikkit: Meeqqat anersaakkut ilinniartinneqarnissartik pisariaqartippaat. (5 Mos. 31:12) Itsaq Guutip innuttaasa ’tusakkaminnik paasinnissinnaasut’ tamarmik allakkat atuffassissutigineqarneranni tusarnaaqqissaartussaapput. (Neh. 8:1-3) Angajoqqaat ataatsimiinneq malinnaaffigeqqissaarpassuk tusarnaaqqissaarlutillu qularnanngitsumik meeraat aamma taammaliorumassapput. Meeqqat pinngussanik qalipagassanilluunniit sukisaarsaaruteqartissallugit silatusaarnerunngilaq. Aammattaaq pisariaqanngitsumik anartarfiliartarnerisa tusarnaarnissaraluaannik akornusersussavaat. ’Inuusuttuaqqat sianiissusermik pigisaqarmata’ ataatsimiinnerni angajoqqaat meeqqami issialluarnissaannut tusarnaarluarnissaannullu ilungersornerusariaqarput. — Uss. 22:15.
4 Tusarnaarniarluni aalajangersimagaanni ’suli annerusumik ilisimasaqalerusunnermik’ ersersitsineruvoq, tamannalu silatusaarneruvoq. — Uss. 1:5.