’Qanoq iliorsinnaavunga?’
1 ’Qanoq iliorsinnaavunga?’ Biibilimik atuaqqissaartartut ikittunnguit Charles Taze Russellip 1870-ikkunni aallarnersimasaanut ilaasut qularnanngitsumik imminut taama aperisimassapput. Guutip piumasaanik paasisaqarnerujartortillutik Guutip siunertaanik allat paasitikkumallugit qanoq iliorsinnaanerlutik eqqarsaatigisimassagunarpaat. Biibilimik ilisimalikkatik silarsuaq tamakkerlugu siaruartissallugit suliarujussuuvoq.
2 Nuannaarutigeqaarput taamani peqqussut ilassilluarsimammassuk. Qanoq iliorsimappat? Tamarmik immikkut iliuuserisassatik annikitsuaqqat suliarisimavaat, taamaattumillu Jehovap Naalunaajaasui ullumikkut silarsuarmi tamarmi ilisimaneqalersimapput. Tassaapput peqatigiiffik 6.000.000-it missaani oqaluussisartulik nunani qeqertanilu 234-ni ilagiinnut 90.000-inut agguataarsimasut. — Jes. 60:22.
3 Suliaq tamakkiisumik tapersersoruk: Suliamut annertungaartumut Jesusip siulittuutigisimasaanut ulluni kingullerni naammassineqartussamut tamatta immikkut peqataanissarput pingaaruteqartupilussuuvoq. (Mák. 13.10) Suliassaq utoqqaanertanit ikinnerussusilinnit kisimi naammassineqarsinnaanngilaq; aammattaaq oqaluussineq pioneeriinnaat kisimik nammagassaattut tunniunneqanngilaq. Kinaluunniit kristumiutut tunniulluinnarsimasoq pingaarutilerujussuarmik iliuuseqarsinnaalluarpoq. Tamatta kiffartuussinernut assigiinngitsunut peqataasinnaavugut. (1 Tim. 1:12) Qanorluunniit annertutigisumik annikitsigisumilluunniit iliorutta uagutsinnut allanullu iluaqutaasaaq. 1 Tim. 4:16.
4 Inuusuttut utoqqaallu, nukappiaqqat niviarsiaqqallu qatanngutigiit kristumiut allatigut pingaartutigut tapersersorsinnaavaattaaq. (Tus. 148:12, 13) Ilagiit ataatsimiittarneri aalajaalluta najuuffigisarnerisigut piumassuseqarluarlutalu peqataaffigisarnerisigut tapersersorsinnaavavut. (Tus. 122:1, 8, 9) Ilagiit ileqqussatigut minguitsuutinniarlugu iliuuseqarsinnaavugut. Silarsuarmi tamarmi oqaluussinermut tamatta pisinnaasarput naapertorlugu aningaasatigut taperseeqataasinnaavugut. Naalagaaffilersaarfiup eqqiarneqarnissaanut peqataasinnaavugut. Ilagiinni tamarmik nutaanik, inuusuttunik utoqqarnillu ikiuinermikkut asanninnerup ataasiussutsillu anersaavanik siuarsaaqataasinnaapput. — Kul. 3:12, 14.
5 Immaqa ima aperigunarputit: ’Qanoq iliorsinnaavunga?’ Naak nammineq iliuuserisat immaqa soqutaarpasinngikkaluartoq, iliuuseqaqataaninnik ilagiit nukittuujunissaannut, sulilluarnissaannut peqqinnissaannullu taperseeqataasinnaavutit. Taamaalilluta tamatta Jehovap aqqata ataqqineqarnissaanut peqataasinnaavugut.