Pioneeritut kiffartorneq — utoqqaanertatut imaluunniit ilagiinni kiffartortutut
1 Jesus Kristus aqqutigalugu Jehovap suliassissimavaatigut nunarsuarmi suliarineqartut pingaarnersaasa ilaannik — iivangkiiliu siaruarteqqullugu. Eqqartuussinissamut tamanna tunngaviussaaq, aamma ilagiit suliassaasa tamanna pingaarnersaraat. (Mat. 25:40, 45) Taamaattumik utoqqaanertanut ilagiinnilu kiffartortunut tamanut piumasaqaataavoq pissusissamisoortoq oqaluussinermi ilungersuussillutik siuttuussasut ’savaatinut maligassanngorlutik’ — ajornanngippat pioneeritut. (1 Pît. 5:2, 3) Kikkunnut iluaqutaassava?
2 Ilagiit. Oqalugiaaterpassuarnit kajumissinarnerungaarpoq, ilagiillu isumaannut sunniuteqangaarluni. Allat kiffartornermi aaqqissuussinerit aalajaannerullutik tapersissavaat. Aamma sapaatip-akunnerata ingerlanerani assigiinngitsunik arlalinnik suleqateqartoqarsinnaavoq taamaalillunilu ataasiakkaat ilisarisimanerulerlugit pisariaqartitaannillu ikiorlugit. Taamaalillutit paarsisutut ajunngitsuliungaarsinnaavutit.
3 Ilagiinni Jyllandimi 45-nik oqaluussisartulinni pisimasumit sunniutaa takuneqarsinnaavoq. Utoqqaanertat ilaat nulianilu pioneeriupput, tamannalu pissutaaqataalluni massakkut 11-nik pioneereqarneranut 3-nillu aalajangersimasumik ikiorti-pioneereqarneranut allaallu aappariit pioneeriusut nunamut allamut aallartitaasimallutik. Kiffartortut pioneeriusut ilumut ’inunnik tunissutaapput’ ilagiinnut iluaqutaasumik ’siooranatik’ oqaluttaramik. — Evf. 4:8; Epr. 3:6.
4 Oqaluussiffigisartagaq. Kiffartortut amerlanertigut ilinniartitsinermut sungiussisimagamik inersimalluarlutillu, tusagassaq pissarsinartumik saqqummiussinnaavaat. Pulaakkat angunerusinnaavaat misilittakkatillu atorsinnaallugit. Aammattaaq oqaluusseriaatsini allaanerusuni peqataanermikkut aallartitsilluarsinnaapput. Soorlu piffissaq tamaat kiffartortoq oqarsimasoq: „Sooq qatanngutitta pikkorinersaasa oqaluussinermut piginnaanitik silarsuatoqami suliassanut maangaannartissavaat? “ Pioneeritut atasussanik, nungujartortut pinnagit, suliaqartuupput. — 1 Juá. 2:17.
5 Ilaqutariit. Misigisat takutippaat ilaqutariit imminnut qaninnerulertartut aamma anersaap piinik pingaartitsinerulertartut. Utoqqaanertaq nulianilu ukiuni 12-ini pioneerioqatigiissimasut meeqqanillu pingasunik sallusuissummi perorsaasimasut oqarput, ilaqutariinnut sunniutai eqqarsaatigalugit pilliutigineqartut imminut akilersinnaapput. Meeqqat aamma namminneq taama isumaqarsimassapput ullumikkut pingasuullutik piffissaq tamaat kiffartortuugamik. Angajoqqaanut pilluarnarnerpaajussaaq meeqqamik sallusuissummi ingerlalluarnerat. Pioneeritut kiffartornerup ilaqutariit ataasiussuseqartippai.
6 Nammineq. Pioneeritut kiffartorneq tamakkiisumik tunniulluinnarnerup kingunerimmagu pissusissamisoortoq, periarfissavut atortarutsigik ilerasuuteqannginnerussaagut. Aamma ilagiinnit immikkut ataqqinneqalissaaq. Utoqqaanertaq pioneeriullunilu ulloq naallugu sulisartoq oqarpoq: „Maanna uannut nuannerneruvoq apeqqut una akissallugu: ’Ullumi Jehovap pilluaqqusinnaasaanik iliuuseqarpunga?’ Pioneeriullunga nuannaraara, siusinnerusukkullu aallartissimannginnera peqqissimissutigalugu. “ Misigisat takutippaat ullut marluk ullut naallugit ullullu pingasut ullup ilaannaa eqaatsumik pilersaaruteqarnikkut sapaatip-akunneranut nalunaaquttap-akunneri 18-it anguneqarsinnaasut.
7 Utoqqaanertaq marlunnik meeralik pioneeriusumillu nulialik misigisimavoq ilaquttani nunap piisigut isumaginerat naammanngitsoq. Allat isumaqassagunarput atukkani pissutigalugit pioneerinngorsinnaanngitsoq, kisianni taamaakkaluartoq kiffartornini annertuserusuppaa. Oqarpoq: „Isumaqarpunga akornutaasoq annerpaaq tassaasimasoq uanga nammineq. Ajornartorsiutaavoq pioneeritut kiffartorneq eqqarsaatinniitiinnarakku. Qaqugu angussanerlugu ullulersimanngisaannarpara. “ Qinunikkut pissutsit atukkani isumaliutigereerlugit qatanngutip taassuma piffissaq tamaat kiffartornissani sulissutigilerpaa, Jehovallu ikiuineratigut iluatsippoq. — Mat. 17:20.
8 Piffissaq sivikitsoq qularinnginnatsigu peqataanerput takuneqarsinnaasariaqarpoq. Aap, utoqqaanertat aamma ilagiinni kiffartortut pioneeritut immikkut iliuuseqartut, amerlasoorpassuartigut iluaqutaapput, Jehovallu aqqanik illernarsisiteqataapput. Tamanna qinunikkut isumaliutigissallugu ilaqutariinnilu eqqartussallugu angutinut inersimalluartunut ’amerlasuunik tunineqartunut’ pissusissamisoorpoq. — Lúk. 12:48.