„Oqaatiginiakkat oqaatigipallaannaruk!“
1 Misigisimaviuk piareersarluarsimallugu oqaatiginiakkat pulaakkannit ima kipitinneqartoq: „Oqaatiginiakkat oqaatigiinnaruk. Suna oqaatiginiarpiuk?“ Misigisap taamaattup sumik paasitippaatigut?
2 Amerlasuut erinitsajasuupput. Paaserusuttarpaat kikkuunersugut aamma sooq aggernersugut. Paasigaangamikkulu Biibili pillugu oqaloqatiginiaritsik, immaqa oqaloqatigiinneq kipitiinnassavaat. Amerlasuut Biibilimik atuarneq anersaakkullu tunngasunik oqaloqatigiinneq inuunerminni pingaartinngilaat. Qanoq ililluta paasitissinnaavavut Biibilimut tunngasunik oqaloqatiginissatsinnut minutsialunnguit atortariaqaraat?
3 Periaaseq pitsaanerpaanik angusaqarfiusoq: Pulaagarput takutittariaqarparput taassuma isumakuluutigisinnaasaanik Biibili atoriaannaarnik siunnersuuteqartoq; taamaaliortariaqarpugut sapinngisamik oqaatsit ikittuinnaat atorlugit. Aallarniut kinguneqarluarsinnaasoq tassaavoq apeqqut aalajangersimasoq pulaakkatta eqqarsaataanik aalassatsitsisoq, allassimaffillu apeqqummut akissutaasoq. Siunnersuutit tulliuttut ilaat misilisinnaavatit. Taakku atorlugit ’oqaatiginiagarput oqaatigipallaannarsinnaavarput’ pulaarneqartumut soqutiginnilersitsisumik.
4 Oqaluussiffigisartakkanni inuit soqutiginninnginnerakulaffigisaanni akuliuffigisinnaasaannik aperisoqarsinnaavoq:
◼ „Maannakkut ukiut tusindissaat tulliuttut nalliulernerani isumaqarpit siunissaq pillugu ernumassutissaqartariaqartugut imaluunniit isumalluartariaqartugut? [Pulaagaq akili.] Pissutsit naalliunnartut sumi tamaani atuuttut Biibilimi siulittuutigineqarsimapput, siulittuutigineqarportaaq tamakku qanoq naggaserneqarumaartut.“ 2 Timûtiuse 3:1, 2, 5 aammalu Ussatit 2:21, 22 atuakkit.
◼ „Nunatsinni peqqinnissaqarfik napparsimasunillu paaqqinninnissaq oqaluuserineqartaqaat. Nalunngiliuk Guuti neriorsuisoq peqqinnissamut akornutaasut tamaasa nassaanngitsussamut nungutivikkumaarlugit?“ sarĸúmersitat 21:3, 4 atuaruk.
◼ „Isumaqarpit Biibilip najoqqutassiai malillugit inuit tamarmik inuugaluarpata inuiaqatigiinnut iluaqutaassagaluartoq?“ Matîuse 22:37-39 atuaruk.
5 Peqquneqarpugut Guutip naalagaaffia pillugu nutaarsiassaq nuannersoq oqaluussissutigeqqullugu, taamaattumik sukkulluunniit periarfissaatillugu Naalagaaffiup naammassiumaagassai pillugit oqaluttariaqarpugut. Ima oqarsinnaavutit:
◼ „Nalunngiliuk atuakkat nunarsuarmi pisoqaanerpaartaanni, Biibilimi siulittuutigineqartoq nunarsuaq tamakkerlugu ataasiinnarmik naalakkersuisoqalerumaartoq?“ Daniel 2:44 atuaruk.
◼ „Jesus Kristusip nunarsuaq tamaat kunngitut naalagaaffigilerpagu qanoq ikkumaarpa, illit qanoq isumaqarpit?“ Tussiaat 72:7, 8 atuaruk.
6 Oqaluussiffigisartakkanni inunnut upperisassarsiortunut aallarniutit uku misilissinnaavatit:
◼ „Amerlasuut arnaanertik, angutaanertik, upperisartik imaluunniit ammimmik qalipaataa piinnarlugit immikkoortinneqartarput. Isumaqarpit immikkoortitsinerit taamaattut Guutip iluarigai?“ apustilit suliait 10:34, 35 atuaruk.
◼ „Jesus nunamiikkallarami amerlasuunik tupinnartuliortarsimavoq. Ataatsimik tupinnartulioqqeqqullugu qinnuigisinnaasuugukku sunaassagaluarpa?“ Tussiaat 72:12-14, 16 atuaruk.
7 Pulaakkavit matu ikersilaaginnarlugu ammarpagu oqaloqatigiinneq imatut aallarnersinnaavat:
◼ „Amerlasuut ajornartorsiutit tusassallugit qatsutivippaat. Ajornartorsiutinut aaqqiissutissanik tusarumanerupput. Qularnanngitsumik aamma illit taama isumaqarputit. Kisianni ajornartorsiutitsinnut aaqqiissutissanik siunnersuutinik atorsinnaasunik sumit nassaarsinnaavugut?“ Pulaagaq akili. 2 Timûtiuse 3:16, 17 atuaruk.
8 Soormi misilinngiliuk? Amerlanertigut taamaallaat paasiuminartumik aalajangersimasumillu apeqquteqarneq pulaakkamut soqutiginnilersitsisarpoq. Arnap siornatigut akerliusimagaluartup qatanngutit arnat marluk isertissimavai aappaata aperisimammani: „’Ataatarpuumi’ naalagaaffik suna tikiuteqqullugu qinnutigisarneripput nalunngiliuk?“ Apeqqutip soqutiginnilersippaa, Biibilimillu atuaqqissaaqatigineqarnissani akueraa. Maannakkut arnaq Jehovamut kiffartortuuvoq tunniulluinnarsimasoq.
9 Pulaakkatsinnut ilumoorluta soqutiginninnerput malunnartittariaqarparput. ’Uummatinnit uumataanut’ oqalugit. Inuit ajunngitsumik qisuariarnerusarput malugigaangamikku ilumoorussilluta soqutigigitsik. — apustilit suliait 2:46, 47.
10 Ullutsinni nutaarsiassap nuannersup oqaluussissutiginera unamminiarnartuuvoq. Naapitakkatta ilaat takornartanut pasinnikkajuttuusarput imaluunniit uagutsinnut assigiinngitsunik ajorinnittuullutik. Ilaallu ulapputeqartuaannartuupput allanullu piffissakilliorlutik. Qularutigisariaqanngilarpulli suli amerlasuunik ’qinngaqqunnanngitsunik’ inoqartoq. (Mat. 10:11) Inunnik taakkuninnga nassaarniarluta ilungersornerput kinguneqarluarumaarpoq saqqummiussinerput naatsunnguuppat ’oqaatiginiagarpullu oqaatigipallakkutsigu’.