Piareersaasimaneq nuannaarnerulersitsisarpoq
1 Oqaluusseqataaneq nuannaarutigisaqaarput. (Tus. 89:16, 17) Kisianni nuannaarneq ilumut misigilluassagutsigu piareersarluarsimasariaqarpugut. Piareersarluarsimagutta naammassisaqarnerussaagut, nuannaarnerlu naammassisavut malillugit annertusiartussaaq.
2 Atortussat pigeriikkavut atukkit: Piareersarninni pitsaassaaq Guutip Naalagaaffianut Kiffartorneq-mi sammineqartut atuaqqaaraanni imaqarnersiorlugillu. Tassani eqqarsaatigilluagaasunik siunnersuuteqarpoq tusarliussap saqqummiunneqarnissaanut piuminartumik kinguneqarluartumillu iluaqutigisinnaasatsinnik. Siunnersuutigineqarportaaq akerliliinerit nalinginnaat qanoq akineqarsinnaasut. Aamma Biibilimik atuaqqissaaqatiginnilernissaq anguniarlugu siuariartortumik pulaaqqiisinnaanermut siunnersuuteqarpoq. Siunnersuutit ilinnut naleqquttunngorsakkit. ˈRæsonnerbogimi’ amerlasuunik siunnersuuteqarpoq qanoq aallarniisinnaasugut patsisissarsiutillu qanoq akisinnaanerivut; atortuuvoq naleqarluartoq uagutsinnut ikiuutaasinnaasoq pissutsini assigiinngitsuni naammassisaqarnerunissatsinnut.
3 Atuagassaq saqqummiunniakkat misissorluaruk pulaakkannullu takutikkumasannik ataatsimik marlunnilluunniit qinersigit. Paasissutissaq tusarsimasat imaluunnit atuarsimasat eqqarsariarnartoq oqaloqatigiinnissamut immaqa aallarniutitut atorsinnaavat. Takorlooreeruk qanoq akineqarsinnaasutit, eqqarsaatigereerlugulu qanoq illit akissanerlugit. Kingornalu minutsialunnguit atorlugit sungiusarit eqqarsaatit eqqartorusutatit eqqaamalluarniarlugit.
4 Oqaluussinermut tunngasunik ataatsimiinnerit najuuffigiuaannakkit: Ataatsimiinnerni taamaattuni Guutip Naalagaaffianut Kiffartorneq-mit siunnersuutit saqqummiunneqaraangata, eqqartorneqaraangata takutinneqaraangatalu tusarnaaqqissaartarit. Atorsinnaasatit allattukkit. Oqaluussitillutit misigisimasatit ilaat eqqarsaatigikkit, isumaliutigalugulu qanoq ilillutit naammassisaqarnerusinnaanerlutit. Tamakku pillugit oqaluussisartut allat ataatsimiinneq sioqqullugu kingoqqulluguluunniit oqaloqatigikkit.
5 Qularinngissinnaavat ’ajunngitsuliornernut tamanut piareersaaguit’ inuit allat inuunerup aqqutaanut ikiorniarlugit suliniuteqarninni nuannaarnermik angisuumik angusaqarnerunermillu akilerneqarumaaravit. — 2 Tim. 2:21.