Qalliinnaq isigisarpiuk?
1 Oqaluusseqataatilluta naapitatta isikkuata aallaqqaammut nutaarsiassamik nuannersumik tusartinnissaanut immaqa tunuarsimaartisinnaavaatigut. Assersuutigalugu soqutiginninnermik ersersitsisumik pulaaqqiiffigisartakkavit matuanut kasuttornerit tamaasa sanilianit angummit isikkuluttumit pasinnippaluttumit isikkorlunneqaraluaruit qanoq qisuariassagaluarpit? Qatanngut arnaq pioneriusoq taama ittumik naammattuuisimasoq aalajangersimavoq angut saaffiginiarlugu oqaloqatigissallugu. Inussiarnippasilluni qatanngutip ilassinera akivaa, tupaallaatigisaanulli Biibilip oqariartuutaa tusarnaarpaa atuaqqissaaqatigineqarnissamullu akuersilluni. Qatanngutip taassuma angut qalliinnakkut isiginngimmagu maanna angut taanna nulialu sallusuissutsip ilikkarnissaanut periarfissinneqarput.
2 Qatanngut alla arnaq angutip inuusuttup nujakkaap isikkua aallaqqaamut annilaarutigisimagaluarpaa, taamaakkaluartorli pisiniarfimmut suliffigisaminut iseraangat tamatigut oqaluussiffigillattarsimavaa. Qatanngutip ilungersornera kinguneqarluarpoq, angullu inuusuttoq maanna oqaluusisartunngorsimavoq kuisimasoq. Qanoq ililluta inuit tuaviorpallaammik sallusuissummik soqutiginninnginnerarnissaat pinngitsoortissinnaavarput?
3 Jesusip maligassiaa maliguk: Jesusip nalunngilaa inuit tamaasa pillugit inuunini tunniuttussaallugu. Taamaattumik allat qallikkut isikkui ersissutiginngilai. Nalunngilaa naak inuit ajortumik tusaamaneqaraluartut immaqa eqqortumik ikiorneqarlutillu kajumissaarneqarunik allanngorsinnaasut. (Mat. 9:9-13) Pisuut piitsullu ikiorniarsimavai. (Mat. 11:5; Mák. 10:17-22) Oqaluussitilluta inuit qallikkut isikkui kisiisa maluginiarnaveersaassavavut taamaalilluta ajunngitsumik uummammioqarsinnaaneri takunngitsoorlugit. (Mat. 7:1; Juá. 7:24) Jesusip maligassiaata ajunngitsup malinnissaanut suup ikiorsinnaavaatigut?
4 Biibilimik atuaqqissaartarnitsigut ilikkarparput Guutip oqaasiata inuup eqqarsartaasia, pissusia qanorlu ittuussusia allanngortissinnaallugit pissaaneqartoq. (Evf. 4:22-24; Epr. 4:12) Taamaattumik tulluartumik mianersuutigaluta ajunngitsumik pissusilersortariaqarpugut, sinneralu Jehovamut inuit uummammiuinnik takunnissinnaasumut isumagitillugu. — 1 Sam. 16:7; ap. sul. 10:34, 35.
5 Nutaarsiassaq nuannersoq immikkoortitsinata inunnut assigiinngitsunut tamanut oqaluussissutigisariaqarparput qanorluunniit isikkoqaraluarpata, katersuinersuarmut ulluni kingullerni makkunani suliarineqartumut peqataalluta. — 1 Tim. 2:3, 4.