Allaanerusugut takusinnaavaat
1 Siorna inuit 300.000-nit amerlanerusut ilaaqqussorfigisimavaatigut kuisillutillu. Taakkorpassuit Jehovap Nalunaajaasuisa akornanni suna takusimavaat Guutip peqatigiissortaanut ilaasortannguutigisaminnik? Upperisarsiortunit allanit suut allaanerussutigaavut? Akissutit aajuku ersarissut:
— Biibili malipparput, inuit pinnagit: Guuti pallorfigaarput ’anersaakkut ittumik ilumoortumillu’ Jesusip peqqusinera malillugu. Tamatuma nassataraa ajoqersuutinik eqqunngitsunik tunuartitsineq Guutillu oqaasia kisiat tunngavigalugu. — Juá. 4:23, 24; 2 Tim. 3:15-17.
— Inuit ornittarpavut aggernissaat utaqqiinnarnagu: Kristusip ajoqersuganngortitsiortoqqusinera ilinniartitseqqusineralu naalapparput, taassumalu maligassiuinera malillugu eqqortumik isumallit ujartarpavut. Angerlarsimaffiini, aqqusinermi sumiiffigisinnaasaanniluunniit ornittarpavut. — Mat. 9:35; 10:11; 28:19, 20; ap. sul. 10:42.
— Akeqanngitsumik Biibilimik atuaqqissaarnissamik tamanut neqeroorfiginnittarpugut: Pigisavut nukivullu atortarpavut, ukiumut nalunaaquttap-akunneri 1 milliardit sinnerlugit Guutimut kiffartornermi atorlugit. Inuit qanorluunniit ittut atuaqqissaaqatigisarpavut assigiinngisinnagit. — Mat. 10:8; ap. sul. 10:34, 35; sar. 22:17.
— Inuit anersaakkut ikiornissaannik ilinniartitaavugut: Nammineq atuaqqissaartarnitsigut ataatsimiinnernilu ataatsimeersuaararnernilu ataatsimeersuarnernilu ilinniartitaanitsigut, naleqanngitsumik siumukariartortumillu teokratiimik ilinniartitaavugut allat anersaakkut ilisimasaqalersissinnaaqqullugit. — Jes. 54:13; 2 Tim. 2:15; 1 Pît. 3:15.
— Sallusuissut ilumoorupparput ulluinnarnilu maleruarlugu: Guutimut asanninnitta taassuma piumasaa naapertorlugu ulluinnarni inooriaaseqartippaatigut. Kristumiutut pissuseqarnitta allat sallusuissummut kajungilersittarpai. — Kul. 3:9, 10; Jâk. 1:22, 25; 1 Juá. 5:3.
— Kikkut tamaasa eqqisseqatiginiarsarivavut: Kristumiutut pissutsit ineriartortinnerisigut oqaatsitta inooriaasittalu mianersuunnissaannut ikiorneqartarpugut. Allanut attaveqarnitsinni ’eqqissinissaq kajungeralugulu noqqaassutigerusupparput’. — 1 Pît. 3:10, 11; Evf. 4:1-3.
2 Kristumiutut inooriaaseq Jehovap peqatigiissortaasa iluanni takusartik amerlasuut sallusuissummik ilassinnissutigisarpaat. Qanortoq uagut aamma maligassiuinerput uagutsinnik nalunnginnittunut isiginnittunullu assingusumik kinguneqarili.