’Ajunngitsuliornernut tamanut piginnaanngorsagaavugut’
1 Jehovap innuttai ullutsinni anersaakkut nerisassanik naammattunik pilluaqquneqarput. (Jes. 25:6) Paasissutissanik Biibiliminngaanneersunik tuniorarneqartarpugut nammineq atuartarnitsigut, ilaqutariittut atuartarnitsigut, ilagiit ataatsimiinnerisigut aammalu ataatsimeersuartarnitsigut. Kisianni tamakku tamaasa atorluartarnerpavut ’inerilluarsinnaaqqulluta ajunngitsuliornernullu tamanut piginnaangorsarsinnaaqqulluta’? — 2 Tim. 3:17.
2 Ukiumi 1998-mi anersaakkut nerisassat piareersarneqarsimasut eqqarsaatigeriakkit. Sapaatip-akunneranut ilagiit ataatsimiinnerini sammisartagassavut tassaapput atuakkanit 23-nit assigiinngitsunit Kristumiut Allagaataanniit Griikerisuuneersunit pingaarnersiukkat, Hjælp til forståelse af Bibelen aamma Indsigt i Den Hellige Skrift atorlugit inuit Biibiliminngaanneersut assigiinngitsut 49-t pillugit paasissutissat aammalu atuakkami Jehovas Vidner — forkyndere af Guds rige-mi quppernerit 138-t sammineqassapput. Sammissavarputtaaq ’Ilisarsinerup’ pingajorarterutaa, atuagarlu Ilaqutariittut pilluarneq isertugaateqarpoq naasimavarput massakullu atuagassiaaraq Guutip sumik piumaffigaatigut? aallartissimallugu. Saniatigullu Naalagaaffimmut Kiffartorneq-p normuinik aqqaneq-marlunnik taavalu Napasuliaq Alapernaarsuiffik-mit allaaserisanik atuaqqissaaqatigiissutissanik 52-inik aammalu oqalugiaatinik taama amerlatigingajattunik Biibilimut tunngasunik anersaakkut nerisassanik pissaagut. Saniatigullu aamma ataatsimeersuarnerit anersaakkut pissarsiaqarluarnartarput. Pissarsiassat anersaakkut nerisassat naammattut!
3 Jehovap aaqqissuussinera qujamasuutigiuk: Tamakku iluaqutigiumallugit paasisariaqarparput sooq Jehovap anersaakkut taama pigissaartitsigineraatigut. Uppernerput taassumunngalu attaveqarnerput sakkortunerulersarpoq ajunngitsut tamakku ineriartortileraangatsigik. (1 Tim. 4:6) Siunertaanngilarli anersaakkut nerisassat tamakkua nammineq pigiinnassagivut. Killinneqarpugut allanut sallusuissummik nalunaajaanissatsinnut nutaarsiassamillu nuannersumik oqaluussisartutut pikkorinnerulernissatsinnut. — 2 Tim. 4:5.
4 Anersaakkut pisariaqartitsinitta matussusernissaata sumiginnannginnissaa sianigisariaqarparput, ilinniartariaqarlugulu nerisassat anersaakkut ineriartortitsisinnaasut Jehovap nerrivianiittut kajungerinissaat. (Mat. 5:3; 1 Pît. 2:2) Nerisassat anersaakkut ittut pissarsiffigilluarniarutsigik nammineq atuaqqissaartarnermut, ilaqutariittut atuaqqissaaqatigiittarnermut ataatsimiinnerillu peqataaffigisarnerannut piffissaq naammattoq immikkoortittariaqarparput. (Evf. 5:15, 16) Taama iliornerup akissarsiassartaa Paulusip hebriiarinut aalajaatsunut qimmassaatigisimasaanut Eprîarit 13:20, 21-mi nassaassaasumut naapertuutissaaq.