Sooq Bibelimik atuaqqissaaqateqalernissaq kissaatigissavarput?
1 Kristumiunut nuannernerpaasoq tassaavoq allat Kristusimut ajoqersuganngornissaannut ikiuinermut Jehovamit atorneqarneq. (Mat. 28:19, 20; 1 Kor. 3:6, 9) Tamannalu ikiukkatsinnut inuunermik naassaanngitsumik kinguneqarsinnaavoq.
2 Ilinniartitsisoq ilinniartorlu imminnut qanittumik pissuseqalersarput. Ilinniartup anersaakkut ineriartornera nuannaarutissaangaarpoq. (1 Tás. 2:11, 19, 20) Taamaattumik kristumiut tamavimmik minnerpaamik nalunaajaasuunngitsumik ataatsimik Bibelimik atuaqqissaaqateqarnissaq anguniartariaqarpaat. Ilaqutariinni aalajangersimasumik akuttunngitsumik pissarsiffiulluartumik Bibelimik atuaqqissaaqatigiittarnissaq ataataasup soorunami akissusaaffigaa, kisianni ataataasoq uppinngitsuuppat, anaanaasup kristumiusup sapinngisaminik meeqqat atuaqqissaaqatigiittarnissaat isumagissavaa.
BIBELIMIK ATUAQQISSAAQATEQALERNISSAQ QINNUTIGIUK
3 Maanna naggatissaq naajartulermat, tamaviaarluta sunniuteqarluartumik Bibelimik atuaqqissaaqateqarniartariaqarpugut. Bibelimik atuaqqissaaqateqalernissaq qinnutigeqattaarutsigu takutissavarput tamatuminnga ilumoorluta kissaateqarluta. Taamaaliornitta erseqqissassavaa inuuneq toqulu pineqartut paasisimagipput. (Hes. 33:7-9, 14-16) Qularissanngilarput Jehovap ilunngersoqqissaarnivut pilluaqqussagai. — 1 Juán. 5:14, 15.
4 Ajoqersuganngortitsiniarnermik sulineq kinguneqarluassappat peqqissaartumik piareersarneqartariaqarpoq. Pingaartorujussuuvortaaq malugissallugu Bibelimik atuaqqissaaqateqartartut pikkorissut qanoq periaaseqartartut. Qaammatini tulliuttuni nakkutilliisut angalasartut ajoqersuganngortitsiniarnermillu misilittagaqartut allat siunnersuutaasa ilaat ingerlateqqinniarpavut. Ilanngutassiani nangeqattaartuni qanoq ililluni Bibelimik atuaqqissaaqatigiinnernik kinguneqarluartunik pilersitsisinnaaneq aqutsisinnaanerlu pillugit siunnersuutit atoriaannaasut allaatigiumaarpavut.
ILANNGUTASSIAT SAQQUMMERSUSSAT
5 Naalagaaffimmik Kiffartuuteqarneq-mi ilanngutassiani saqqummersussani suut sammineqassappat? Oqaluussisartut pionerillu assigiinngitsut qanoq ilillutik Bibelimik atuaqqissaaqatitaartarsimanerat qanorlu ilillutik soqutiginnittut uummataannut annguttarsimanerat oqaluttuarniarparput. Siunnersuutiginiarparputtaaq qanoq ililluni atuaqatigisaq Jehovap peqatigiissortaanik pingaartitsilersinneqarsinnaasoq qanorlu ililluni namminneq oqaluussinermi peqataarusunnerat annerulersinneqarsinnaasoq. Aamma meeqqat namminneq Jehovamut qanittumik attaveqaleqqullugit qanoq ililluni ilaqutariinni atuaqqissaaqatigiinneq ilikkagaqarluarfiunerusinnaasoq siunnersuutigineqassaaq.
6 Ukiuni sisamani kingullerni silarsuarmi tamarmi 959.834-t kuisissimapput. Qatanngutit taakkua amerlanersaat kuisipput atuaqqissaaqatigineqarnermik kingunerisaanik. Eqqaaniaanermi aasakkullu ataatsimeersuarnerni najuuttut amerlassusiata takutippaa suli amerlaneroqisut tunniulluinnarnissamut kuisinissamullu siumukarnissaminnut ikiorneqarsinnaasut. Uagut Bibelimik atuaqqissaaqateqalernissarput ilungersuutigiuarutsigu, suli amerlanerusut Jesus Kristusimut ajoqersuganngornissaannut inuunissamillu naassaanngitsumik neriuuteqarnissaannut ikiorsinnaassavavut. — 1 Tim. 6:12, 19. (kmD 8/90 Hvorfor ønske et bibelstudium?)