Mianersoqqussummik eqqumaffiginninnerit annassutigisinnaavat!

DECEMBARIP 26-anni 2004-mi Simeuluemi, qeqertami Indonesiami Sumatrap avannaata kitaaniittumi, 9,1-imik sakkortutigisumik nuna sajuppoq. Kikkut tamarmik avataanut nakkupput. Imaq pissusissamisuunngitsumik tinerujussuarpoq. Tassanngaannaq inuit tamarmik qaqqap tungaanut arpallutik taqqavanimiusut tsunami pillugu ima nillialerput: “Smong! Smong!” Minutsit 30-t qaangiummata malerujussuit sinerissamut pitoraammata illut illoqarfeeqqallu amerlanerpaat aseruatiterput.

Tsunameqarmat Simeulue siullerpaalluni eqqugaavoq. Taamaattorli innuttaasuni 78.000-ni arfineq-marluinnaat ajunaarput.a Sooq amerlanerunngillat? Qeqertami najugaqartut ima ussateqarput: ‘Nuna sajorujussuarpat imarlu tinerujussuarluni taava qaqqamut qimaagit, tassuugumi malerujussuit pitoraatissammata.’ Misilittakkat tunngavigalugit Simeuluemiut immap allanngorneratigut tsunameqarnissaa nalunngilaat. Mianersoqqussummik eqqumaffiginninnertik annassutigaat.

Biibilimi ajunaarnersuaq ‘naalliunnartorsiungaarfissaq silarsuup pileqqaarneraniit maannamut asseqanngitsoq nalliuteqqinngisaannassasorlu’ eqqartorneqarpoq. (Matthæusi 24:21) Guutip nunarsuup atajuarnissaa siunertarimmagu matumani nunarsuup inunnit akisussaassuseqanngitsunit pinngortitamiluunniit ajunaarnersuarmit suujunnaarsinneqarnissaa pineqanngilaq. (Oqaluussisartup oqaasii 1:4) Naalliunnartoqangaarnissamili Guutip ‘nunarsuarmik aseruisut aserussavai’, tassa ajussutsit naalliuutillu tamarmik suulluunniit atuukkunnaarsissavai. (Saqqummersitat 11:18; Ussatit 2:22) Tamanna pilluaqqussutaavoq!

Pinngortitami ajunaarnersuaqarnerani ajunaartoqartarneratut naggatissami inuit pisuussuteqanngitsut ajunaassanngillat. Biibilimi allassimavoq ‘Guuti tassaasoq asanninneq’, Guutillu Jehovamik atillip neriorsuutigaa ‘iluartut nuna kingornutissagaat najugaqassallutillu tassani naassaanngitsumik’. (1 Johannesi 4:8; Tussiaat 37:29) Qanorli naalliunnartoqangaarnissami aniguisinnaavit pilluaqqussutillu neriorsuutigineqartut nuannaarutigalugit? Mianersoqqussummik eqqumaffiginninnikkut!

PISSUTSIT ALLANNGORLUINNARNISSAAT EQQUMAFFIGIUK

Ajussutsit naalliuutillu qaqugorpiaq atuukkunnaassanersut ilisimasinnaanngilarput, Jiisusimi ima oqarami: “Ullorli taanna nalunaaquttap-akunneraluunniit kimilluunniit ilisimaneqanngillat, inngililluunniit qilanniittut Ernerulluunniit ilisimanngilaat, Ataatalli kisimi.” Jiisusilli ‘eqqumaqqulluta’ kajumissaarpaatigut. (Matthæusi 24:36; 25:13) Suna eqqumaffigissagatsigu? Guutip naggatissarititaa sioqqullugu nunarsuarmi pissutsit atugarineqartussat Biibilimi allaatigineqarput. Simeuluemi innuttaasut tassanngaannaq tinerujussuariasaarneratigut tsunameqarnissaanik paasinninnerattut nunarsuarmi pisut allanngorluinnarnerat naggatissap nalliutingajalerneranut takussutissaassapput. Taakkua ilaat ungalusami takuneqarsinnaapput.

Soorunami ungalusami allaatigineqartut ilaat itsarli takuneqartareerput. Jiisusili oqarpoq “tamakku tamaasa” takulerutsigit naggatissap nalliutingajalernera ilisimassagipput. (Matthæusi 24:33) Imminut ima aperigit: ‘Allaatigineqartut qanga oqaluttuarisaanermi (1) nunarsuaq tamakkerlugu pippat, (2) ataatsikkut pippat aamma (3) sakkortuneruleraluttuinnarpat?’ Ersarippoq piffissap tamatuma nalaani inuusugut.

GUUTIP ASANNINNERANUT ERSIUTAASOQ

“Piffissaalluartumi mianersoqqussutit ... annassutaasarput,” USA-mi præsidentiusimasoq taama oqarpoq. 2004-mi tsunameqarnerata kingorna nunap immikkoortui eqqugaasut siunissami taamatut eqqorneqaqqinnginniassammata atortorissaarutit mianersoqqussutit inissititerneqarput. Taamatuttaaq naggatissap nalliutinnginnerani mianersoqqusisoqarnissaa Guutip isumagaa. Biibilimi ima siulittuuteqarpoq: “[Naalagaaffimmik] iivangkiiliu taanna silarsuarmi tamarmi oqaluussissutigineqassaaq inuiannut tamanut nalujunnaarsillugu, taavalu naggatissaq nalliutissaaq.” – Matthæusi 24:14.

Siorna Jehovap Nalunaajaasuisa nutaarsiassap nuannersup nunani 240-ni oqaatsillu 700-nit amerlanerusut atorlugit oqaluussissutiginissaanut nalunaaquttap-akunneri 1,9 milliardit sinnerlugit atorpaat. Tamanna nalitsinni pisoq naggatissap nalliutingajalerneranut uppernarsaataalluarpoq. Jehovap Nalunaajaasui inoqatiminnik asannikkamik ullup Guutip eqqartuussiffissaata qanilliartupiloornera pillugu allanik mianersoqqusiniarlutik sapinngisaminnik iliuuseqarput. (Matthæusi 22:39) Paasissutissamik tamatuminnga iluaqutiginninnerit Jehovap ilinnik asanninneranut uppernarsaataavoq. Eqqaamallugu Guuti ‘kimilluunniit tammaqqusinngimmat, [inuillu] tamaasa allamik isumataarnissamut periarfissikkumammagit’. (2 Petrusi 3:9) Guutip asanninnera iluaqutigalugu mianersoqqussut eqqumaffigissaviuk?

ISUMANNAATSUMUT QIMAAGIT!

Eqqaamallugu Simeuluep sineriaani illoqarfeeqqani najugaqartut imaq tinerujussuarmat ulinnissaa utaqqeqqaarnagu ingerlaannaq qaqqanut qimaammata. Aalajangersimalluinnarlutik iliuuseqarnertik annassutigaat. Oqartoqarsinnaavoq naalliunnartoqangaarnissami aniguiumallutit kingusinaartinnak qaqqamut qimaasariaqartutit. Qanoq taamaaliorsinnaagavit? Pruffiitip Esajap isumassarsisitaalluni “ullussani kingullerni”, nalitsinni, killitsinnartumik ima qaaqqusisoqarnissaa allaatigaa: “Qaa, majuarta Naalakkap qaqqaanut, ... aqqutigeqqusaminik ajoqersussavaatigut, aqqusininnguisigullu ingerlajumaarpugut.” – Esaja 2:2, 3.

Qaqqap qaavanut qimaaguit ungasissumiittut takusinnaalissallugillu isumannaatsumiilissaatit. Taamatuttaaq ullumikkut nunarsuaq tamakkerlugu inuit millionillit Biibilimik atuartarnikkut Guutip aqqutigeqqusaanik ilisimanninneq inuunerminnik allannguinissamut iluaqutigaat. (2 Timotheusi 3:16, 17) Taamaaliornikkut Guutip ‘aqqusininnguisigut ingerlalerlutillu’ Guutimit iluarisaalerlutillu illersorneqartarput.

Ulluni artornartorsiorfiusuni makkunani Guutimit asannittumit illersorneqarumallutit qaaqqusissut akuerissaviuk? Kajumissaarpatsigit allaaserisami matumani ungalusami ‘ulluni kingullerni’ inuunitsinnut Allakkani Illernartuni uppernarsaatit misissoqqissaaqqullugit. Jehovap Nalunaajaasuisa allassimaffinnik paasinnilluarnerunissannut maleruaanissannullu ikiorusungaarpaatsit. Imaluunniit apeqqutitit nittartakkatsinni, www.jw.org-imi, akissutissarsisinnaavatit.