Uummatit misissoruk

Biibilimi ima mianersoq­quneqar­pugut: “[Uummammit] pisarput eqqarsaatipiluit, toqutsinerit, allasiornerit, kinguaassiuutitigut inuunerlunnerit, tillinnerit, sallulluni nalunaajaanerit mitallernerillu.” (Matt 15:19) Uummaterput, qamuuna pissuserput, uagutsinnik salloqittaasinnaavoq Guutillu piumasaanut naapertuutinngitsunik iliuuseqartit­sisinnaalluni. Immaqalu aatsaat kukkoreeraangatta paasilertarparput uummatitsinnit salloqittarneqar­simalluta. Kukkusumik iliunnginnitsinni qanoq uummammioqar­nerluta paasinninnissatsinnut suut iluaqutigisinnaavavut?

SUUT UUMMAMMIUGINERLUGIT QANOQ PAASISINNAAVIUK?

Ullut tamaasa Biibilimik atuartarit atuakkannillu eqqarsaatigin­neqqissaar­tarlutit.

Apustili Paulusi ima allappoq: “Guutip oqaasia uumavoq sunniisinnaassuseqarlunilu panamillu illuttut kiinalimmit ipinnerulluni. Magguttarpoq avissaartillugu tarneq anersaamit.” Guutip oqaasiata ‘uummatip eqqarsaatai isumaalu eqqartuuttarpai’. (Hebr 4:12) Biibilimik atuaqqissaaraangatta eqqarsartaatsitsinnik misissuillutalu iliuutsitsinnik eqqarsaatiginneqqissaartarutta paasisinnaavarput qanoq uummammioqarnerluta. Taamaattumik ullut tamaasa Biibilimik atuartarlutalu atuakkatsinnillu eqqarsaatiginneqqissaartarnerput pingaaruteqangaarpoq. Taamaaliorutta Jehovap eqqarsartaasia ilinniarsinnaagatsigu!

Biibilimi allassimasunik eqqumaffiginnittarnerput nalunngeqatiginnissutitsinnut sunniuteqarluarsinnaavoq. Nalunngeqatiginnissuterput eqqunngitsuliornissamut utoqqatsissutis­sarsiornaveer­saassutigisin­naavarput. (Rom 9:1) Aamma Biibilimi uagutsinnut ‘mianersoqqussutaasunik’ oqaluttuarpassuaqarpoq. (1 Kor 10:11) Mianersoqqussutaasut taakku ilinniutigigutsigit kukkusumik aalajangiinaveersaar­sinnaavugut. Suna aamma iluaqutigisinnaavarput?

Guuti qinnuigisaruk paasiumallugu qanoq uummammioqar­nerlutit.

Jehova uummatinik misissuisarpoq. (1 Nal 29:17) Guuti “uummatitsinnit anneruvoq suullu tamaasa ilisimallugit”. (1 Joh 3:20) Taamaattumik Jehova salloqittarneqarsinnaanngilaq. Isumakuluutivut, misigissutsivut kissaatigisavullu qinunikkut ilumoorluta eqqaasarutsigit Jehovap qanoq uummammioqarnerluta paasinninnissatsinnut ikiorsinnaavaatigut. Allaat Guuti qinnuigisinnaavarput ‘uummammik minguitsumik pinngortitsivigeqqulluta’. (Tuss 51:12) Jehovamit ikiorneqassagutta qinusarneq pingaaruteqarpoq.

Ataatsimiinnerni tusarnaaqqis­saartarit.

Tamanna qamuuna qanoq pissuseqarnitsinnik eqqarsaatigin­neqqissaar­nissatsinnut iluaqutaasinnaavoq. Ataatsimiinnerni ilaannikkut nutaamik paasissutissin­neqartanngik­kaluarluta najuuttuarnitsigut najoqqutassiat Biibilimeersut paasilluarnerusinnaavavut. Siunnersorneqartarpugut qanoq paasisinnaagipput suut uummammiuginerlugit taavalu allannguilluta. Aamma qatanngutitta akissutaat iluaqutigingaarsinnaavavut. (Uss 27:17) Ataatsimiinnernili najuuttarunnaarutta immitsinnuinnaq eqqarsaatigilersinnaavugut sianiilliorlutalu aalajanngiisinnaalluta. (Uss 18:1) Silatusaassaagut imminut ima aperigutta: ‘Ataatsimiinnernut tamatigut najuuttarpunga tusarnaaqqissaartarlungalu?’ — Hebr 10:24, 25.

UUMMATINNIT QANOQ SALLOQITTARNEQARSINNAAGAVIT?

Uummatitta assigiinngitsorpassuartigut salloqittarsinnaavaatigut. Sisamat uku sammeriartigit: Pigisalerituneq, imigassartorneq, ikinngutinik toqqaasarnerput aliikkutassanillu toqqaasarnerput.

Pigisalerituneq.

Timitta pisariaqartitaannik matussuseerusunnerput pissusissamisuuginnarpoq. Jiisusilli mianersoqquaatigut pigisat salliutissanngikkivut. Jiisusip assersuusiorluni angut pisooq quinik karriuterpassualik oqaluttuaraa. Karrinik katersugassaminik inissaqartitsinnginnami quini mikinerusut ingutserlugit quinik anginerusunik sananiarluni aalajangerpoq. Ima eqqarsarpoq: “[Taakkununnga] karriutikka tamaasa pigisakkalu tamaasa katersussavakka. Imminullu oqarfigissaanga: Uumaangaa, perpassuaqarputit ukiorpassuarnut naammattunik. Eqqasuutaarupputit, nerillutillu imerniarit inuulluataarlutillu!” Angutilli pisuup ilumoortoq una puiorpaa: Unnuakkut toqugaluaruni suliarpassuani iluaqutiginavianngikkini. — Luk 12:16-20.

Utoqqaliartortilluta immaqa isumakuluutigaarput utoqqalinissatsinnut atugassatsinnik naammattunik aningaasaateqarnerluta. Tamatuma kingunerisinnaavaa sulisarnerput pissutigalugu ataatsimiigianngitsoortarneq aamma kristumiutut akisussaaffitsinnik isumaginnikkunnaarneq. Imaluunniit imaassinnaavoq inuusuttuusutit nalunagulu piffissaq tamaat kiffartorneq tassaasoq inooriaaseq pitsaanerpaaq. Immaqali eqqarsarputit pionerinngunnginninni aningaasanik katersiumallutit suleqqaartariaqarlutit. Taamatut eqqarsaruit eqqaamajuk Guutimut kiffartorninni sapinngisannik iliornissannut maanna piffissaasoq. Tamattami aqagu susoqassanersoq naluarput.

Imigassartorneq.

Ussatit 23:20-mi ima allassimavoq: “Ilaginiaqinagit viinnisorpallaartut.” Imigassartorusussuataaruit imaassinnaavoq imigassartukulanissannut utoqqatsissutissarsiortutit. Immaqa ima oqassaatit: ‘Aalakoorniarnanga qasuersaatigiinnarlugu imertarpunga.’ Imigassaq qasuersaatigiumallugu pisariaqartikkukku qanoq uummammioqarnerlutit ilumoorlutit misissortariaqarpat.

Ikinngutinik toqqaasarnerput.

Ullut tamaasa atuarfimmi, suliffimmi oqaluussinermilu inuit Jehovamut kiffartortuunngitsut ilagisarpavut. Kukkunerussaarli taakku pisariaqanngitsumik ilagisarutsigit allaalluunniit qanittumik ikinngutigilerutsigit. Ajunngitsunik pissuseqarnerarlugit taakkuninnga ilagisartagaqarnissatsinnut utoqqatsissutissarsiussaagut? Biibilimi ima mianersoqquneqarpugut: “Tammarnaveeritsi! Ikinngutipalaaqarneq ileqqorikkaluartunut aseruutissiisarpoq.” (1 Kor 15:33) Soorlu imeq minguitsoq mingutsinneqariaannaasinnaasoq, taamatuttaaq Guutimik asanninngitsunik ikinnguteqarutta Jehovamut ikinngutaanerput ‘aserorsinnaavarput’. Aamma silamiutut eqqarsartalersinnaavugut, atisalersoriaaseqalersinnaalluta, oqaluttalersinnaalluta pissusilersortalersinnaallutalu.

Aliikkutassanik toqqaasarnerput.

Teknikkikkut siuariartorsimaneq pissutigalugu aliikkutassiat assigiinngitsorpassuit aliikkutarineqariaannaapput. Aliikkutassiallu amerlanerit taakku kristumiunut naleqqutinngillat. Paulusip kristumiut allaffigai ‘mingunnartut suulluunniit’ taasassanngikkaat. (Ef 5:3) ‘Mingunnartunimmi’ isiginnaarusukkutta tusarnaarusukkuttaluunniit? Immaqa utoqqatsissutissarsiorpugut eqqarsarluta tamatta nuannersumik sammisassanik pisariaqartitsisarluta aliikkutassanilluunniit nammineq toqqaasinnaatitaalluta. Paulusilli siunnersuutaa mingunnartunik sunilluunniit isiginnaarnaveersaarnitsigut tusarnaarnaveersaarnitsigullu maleruartuartariaqarparput.

ALLANNGUISINNAAVUGUT

Uummatitsinnit salloqittarneqarsimagaluarutta kukkusumillu iliuuseqarnermut utoqqatsissutissarsiorsimagaluarutta allannguinissamut suli periarfissaqarpugut. (Ef 4:22-24) Inuit inuunerminni misigisimasaat marluk sammeriartigit.

Miguela uiullunilu ataataasoq pigisat pillugit eqqarsartaatsiminik allannguisariaqarsimavoq. Ima oqaluttuarpoq: “Nunatsinni teknikkikkut nutaaliaanerusunik pitsaanerusunillu pissarsinissaq pingaartinneqartorujussuuvoq. Eqqarsaatiginikuuara pigisalerituujunanga naak sapinngasara tamaat silarsuup noqqaassutigisinnaasaanik pissarsigaluarlunga.” Kingusinnerusukkut Miguelip paasilerpaa kukkusimalluni. Jehovamut qinuvoq eqqarsartaatsiminik allannguinissamut ikioqqulluni. Miguel ima nangippoq: “Jehova qinunikkut oqarfigaara ilaqutariittut sapinngisarput tamaat kiffartorfigiumallutigu. Inooriaatsitsinnik pisariillisaanissatsinnut periarfissaqaratta oqaluussisartunik pisariaqartitsiffiusumut nuuppugut. Sivitsunngitsoq pionerinngorpugut. Paasilerparput pilluassagutta pigisarpassuaqartariaqarnata.”

Leep misigisimasaanit erserpoq ilumoorluni imminut misissorneq ikinngutipalaanik ilagisartagaqarunnaarnissamut iluaqutaasoq. Lee suliffimmigut niueqatini nunat allaneersut ilagalugit ataatsimiikkaangami imigassartortarpoq. Nalunngilaa ataatsimiinnerni taakkunani aalakoortoqalersinnaasartoq, najuuttarninili suli nuannaraa. Arlaleriarluni aalakuulingajattarsimavoq, kingusinnerusukkulli taamaaliorsimanini ilerasuutigilertarpaa. Paasivaa eqqarsartaatsini allanngortittariaqarlugu. Ima nassuiaavoq: “Oqaaqqissaarutit Guutip oqaasianiittut utoqqaanertallu siunnersuutaat iluaqutigalugit paasilerpara Jehovamik asanninngitsunik ilagisartagaqarusussimallunga.” Maannakkut Leep taakku amerlanertigut taamaallaat oqarasuaatikkut ataatsimeeqatigisarpai.

Immitsinnut ilumoorfigisariaqarpugut qanorlu uummammioqarnerluta misissorlugu. Qanoq taamaaliorsinnaavugut? Jehova qinnuigisinnaavarput, taassumami “uummatip anngigisai” nalunngilai. (Tuss 44:22) Aamma Guutip oqaasia atuarsinnaavarput. Atuartarnerput inummut tarrasuutikkut qanorpiaq isikkoqarnerluni paasiumallugu tarrarsortartumut assersuunneqarsinnaavoq. (Jaak 1:22-25) Aamma ataatsimiinnerit, atuagassiaativut atuakkavullu aqqutigalugit Jehovap siunnersortarpaatigut. Taakku tamaasa iluaqutigalugit uummaterput paarilluarsinnaavarput eqqortumillu iliortuarsinnaalluta.