Jehova ‘Guuti tuppallersaajuartoq’ tatigiuk
“Unnersiutigineqarli Guuti Naalakkatta Jiisusi-Kristusip Ataataa, Ataataq nallittuisoq Guutilu tuppallersaajuartoq.” — 2 KORINTHIMIUT 1:3.
1. Tamatta suna pisariaqartipparput?
INUNNGORNITSINNIILLI tuppallersarneqarnissarput pisariaqartipparput. Naalungiarsuit tuppallersarneqarusukkaangamik qiasarput. Immaqa pakkunneqarusupput nererusullutilluunniit. Aamma inersimasut tuppallersarneqartariaqarlutillu qiimassarneqartariaqarput. Ingammik erloqinartorsioraangatta tuppallersarneqartariaqartarpugut.
2. Jehovap imminik tatiginnittut qanoq neriorsorpai?
2 Ilaquttavut ikinngutivullu uagutsinnik tuppallersaaqataasinnaapput. Ilaannikkulli tuppallersarsinnaasanngilaatigut. Ilaannikkut Guuti kisimi uagutsinnik tuppallersaasinnaasarpoq. Oqaasiani ima neriorsoqqissaarneqarpugut: “[Jehova] qanippoq torlorfigisiminut tamanut, . . . annikilliornerminni nillianerat tusartarpaa.” (Tussiaat 145:18, 19) Aap, Jehovap “isaasa sammivigaat iluartut, ikioqqullutik nillianerat siutaasa tusartarpaat.” (Tussiaat 34:16) Guutimit tuppallersarneqarusukkutta taanna tatigisariaqarparput. Daavi ima allappoq: “[Jehova] tassaassaaq qunutitaasut pallittaalisaat, pallittaalisaq ulluni annikilliornartuni, atinnik ilisimannittut tatigaatsit, qimannaviannginnakkit ilinnik ujarlersut, [Jehova].” — Tussiaat 9:10, 11.
3. Jehovap uagutsinnik asanningaarnera paasitinniarlugu Jiisusi qanoq oqarpa?
3 Jehovamik pallorfiginnittut taassumunnga erlinnangaartuupput. Jiisusi ima oqarpoq: “Qupaloraarsuit tallimat skillinginik marlunnik akilersillugit tunineqartannginnerpat? Taamaattorli taakkua ilaat ataaserluunniit Guutimit puiorneqanngilaq. Ilami ilissi nutsasiluunniit tamarmik kisissimapput. Erseqinasi, qupaloraarsuppassuarnit pingaarneruvusi.” (Lukasi 12:6, 7) Jehovap Israelikkut ima oqarfigai: “Asavakkit soraajuitsumik asannissuseqarlunga, taamaattumik ilinnut ilumoornera atatittuarpara.” — Jeremia 31:3.
4. Sooq Jehovap neriorsuutai upperisinnaavavut?
4 Jehovamik tatiginninnerput taassumalu neriorsuutaasa eqquunnissaannik upperinninnerput annikilliorfiusuni tuppallersaatigisinnaavavut. Josvap Guutimik tatiginninneratut tatiginnittariaqarpugut. Josva ima oqarpoq: ‘Ajunngitsut Jehovap Guutissi ilissinnut oqaatigisaasa ilaat ataasinnguarluunniit qammuinnarsimanngilaq. Tamarmik piviusunngorsimapput, oqaaseq ataasiinnarluunniit maangaannarsimanngilaq.’ (Josva 23:14) Aamma maannakkut unamminiarnartut pissutigalugit naalliuttaraluarluta qularutiginngilluinnarsinnaavarput ‘Guutip unneqqarissup’ kiffani aalajaatsut imminiiginnanngisaannassagai. — Atuaruk 1 Korinthimiut 10:13.
5. Sooq allanik tuppallersaasinnaavugut?
5 Apustilip Paulusip Jehova ‘Guutitut tuppallersaajuartutut’ eqqartorpaa. “Tuppallersaaneq” allap nanertuutigisaanik oqilisaaneruvoq eqqissisitsisartoq. Jehova taamatorluinnaq tuppallersaasarpoq. (Atuakkit 2 Korinthimiut 1:3, 4). Ataatarput qilammiusoq sumilluunniit kimilluunniillu killilerneqarneq ajorpoq. Taamaattumik imminik asannittut tuppallersarniarlugit iliuuserineqarsinnaasut tamaasa iliuuserisinnaavai. Guutimit tuppallersarneqaratta qatanngutivut ‘annikilliuuteqartut tamaasa Guutip uatsinnut tuppallersaatigisaanik’ tuppallersarsinnaavavut. Jehovap tuppallersaaneratut pitsaatigisumik tuppallersaasoqarsinnaanngilaq!
Naalliuuteqarnermut pissutaasartut
6. Naalliuuteqarnermut pissutaasartut ilaat suuppat?
6 Inuunermi sutigut tamatigut tuppallersarneqarnissarput pisariaqartittarparput. Aliasuutaanerpaasartut ilagaat asasamik, ingammik aapparmik meeqqamilluunniit, toqusoorneq. Aamma assigiinngisitsineq isummereersimanerlu pissutigalugit tuppallersarneqarnissamik pisariaqartitsisoqarsinnaavoq. Aamma peqqiilliorneq, utoqqalineq, piitsuussuseq, aappariittut ajornartorsiuteqarneq silarsuarmilu ajussuseq pissutigalugit naalliuuteqarsinnaavugut.
7. (a) Annikilliuuteqarnitsinni suna pisariaqartipparput? (b) Jehova uummammik ‘aserortersimasumik sequmittumillu’ qanoq katsorsaasinnaava?
7 Annikilliuuteqarnitsinni assigiinngitsutigut naalliuuteqartarpugut. Tuppallersarneqartariaqarpugut uummatitsinnut, isumatsinnut misigissutsitsinnullu eqqissisaataasumik aamma timikkut anersaakkullu peqqissutsitsinnut illersuutaasumik. Siullermik uummammut tunngasut sammeriartigit. Guutip oqaasiani allassimavoq uummateqalersinnaasugut ‘aserortersimasumik sequmittumillu’. (Tussiaat 51:19, 1900) Jehovalli ikiorsinnaavaatigut. Taassumami “katsorsarpai sequmissimasumik uummatillit, ikiilu mattuserlugit”. (Tussiaat 147:3) Allaat ajornartorsiungaarfitsinni Guuti uummatitsinnik aliasuutilimmik eqqissisaasinnaavoq taassumunnga upperluta qinusarutta taassumalu peqqussutaanik maleruaagutta. — Atuakkit 1 Johannesi 3:19-22; 5:14, 15.
8. Isumakkut erloqissuteqartilluta Jehovamit qanoq ikiorneqarsinnaavugut?
8 Assigiinngitsutigut misilinneqartaratta isumatsigut naalliuutigisatsinnik tuppallersarneqartariaqartarpugut. Taamatut misigisaqaraangatta ikiorneqartariaqartarpugut. Tussiaasiortoq ima erinarsorpoq: “Eqqarsaatima eqqissiviilliortileraangannga tuppallersaanerpit nuannaalersittarpaanga.” (Tussiaat 94:19) Paulusilu ima allappoq: “Sumilluunniit isumakuluuteqarnaveeritsi, kissaatigisasili qanoq ittukkulluunniit Guutimut saqqummiuttarsigit qinullusi torlulallusilu qujallusilu. Taava eqqissinerup Guutimit pisup siuneqassusernit tamanit annerungaartup uummatisi eqqarsaatisilu sernigissavai Kristusi-Jiisusimi.” (Filippimiut 4:6, 7) Isumakkut erloqissuteqartilluta Biibilimik atuartarneq atuakkatsinnillu eqqarsaatiginneqqissaartarneq uagutsinnut iluaqutaangaarsinnaapput. — 2 Timotheusi 3:15-17.
9. Nikallungagaangatta suna tuppallersaatigisinnaavarput?
9 Ilaannikkut ima nikallungatigilersinnaavugut misigissutsit nikallornartut eqqarsaatigiuaannalerlugit. Imaassinnaavoq pisussaaffitta Biibilimik tunngavillit imaluunniit ilagiinni immikkut ittumik pisinnaatitaaffitta eqqortinnissaat sapernartikkivut. Aamma taamatut misigigaangatta Jehovap tuppallersarsinnaallutalu ikiorsinnaavaatigut. Josva assersuutigeriartigu. Josva Jehovamit inuiannut akeqqersimaartunut pissaanilinnut sorsunnermi Israelikkunnik siulersueqquneqarmat Mosesip ima oqarfigaa: “Sapiitsuugit nukittuullutillu, nunamut [Jehovap] siuaasassinnut tunniukkumallugu neriorsuutigisimasaanut illit Israelikkut siulersussagakkit, nunalu taanna taakkununnga pigisassanngortissavat. [Jehova] nammineq illit siuninni ingerlajumaarpoq. Najorumaarpaatit. Iperassanngilaatit imminiiginnassanallu. Siooraniaqinak ersilersitaaniaqinallu!” (5 Mosesi 31:7, 8) Jehovap ikiuineratigut Josvap Israelikkut nunamut neriorsuutigisamut siulersorpai akeraasullu tamaasa ajugaaffigaat. Aamma Mosesi Immap Aappalaartup sinaaniikkami Jehovamit ikiorneqarpoq. — 2 Mosesi 14:13, 14, 29-31.
10. Peqqissutsitsinnut ajortumik sunniuteqartunik ajornartorsiuteqarutta suut iluaqutigisinnaavavut?
10 Ajornartorsiutit peqqissutsitsinnut ajortumik sunniuteqarsinnaapput. Soorunami peqqinnartunik nerisarutta, naammattumik sinittarutta, timigissartarutta, eqqiluisaartuuguttalu iluaqutaassaaq. Aamma siunissaq pillugu Biibilimi allassimasunik eqqarsaatiginnittarnerput peqqissutitsinnut ajunngitsumik sunniuteqarsinnaavoq. Misilinneqartilluta ajornartorsiuteqartillutaluunniit annikilliuuteqaraangatta Paulusip aamma annikilliuuteqartartup oqaasii uku qiimmassaatigisinnaavavut: “Tamatigut annikilliortitaasarpugut mattunneqaratali. Nalornisarpugut neriuutissaaruttarnatali. Qinugineqartarpugut ilaginnaannagaasarnatali, orlutitaasarpugut suujunnaarsitaanatali.” — 2 Korinthimiut 4:8, 9.
11. Qanoq iliussaagut uppernikkut sanngiilliorluta misigigutta?
11 Misilinneqaatit ilaat anersaakkut peqqissutsitsinnut ajortumik sunniuteqarsinnaapput. Taamatut nalaataqarutta Jehovap ikiorsinnaavaatigut. Taassuma oqaasiani ima neriorsorneqarpugut: “[Jehovap] najummisarpai orlulersut tamaasa, massitsittarlugillu taaqqungasut tamaasa.” (Tussiaat 145:14) Uppernikkut sanngiilliorluta misigigutta utoqqaanertanut ikiortissarsiortariaqarpugut. (Jaaku 5:14, 15) Aamma naassaanngitsumik inuunissamik neriuutitsinnik eqqarsaatiginnittuarnerput uppernikkut misilinneqaatit naammagalugit atornissaannut nakussatsissutigisinnaavarput. — Johannesi 17:3.
Guuti tuppallersaasartoq
12. Jehovap Aaperaat qanoq tuppallersarpaa?
12 Tussiaat 119-imik allattoq Jehovamut ima oqarpoq: “Eqqaagiuk kiffannut oqaaserisat uannut neriuutissiissutigisat. Tuppallersaatigaara atugarliorninni oqaatsivit inuuinnartimmannga.” (Tussiaat 119:49, 50) Ullumikkut Jehovap oqaasia allanneqarsimasoq, Biibili, pigaarput, tassanilu Guutip kiffaminik tuppallersaasimaneranik assersuutissarpassuaqarpoq. Aaperaat assersuutigeriartigu. Jehovap Sodoma Gomorralu piuneerunniarai paasigamiuk Aaperaat isumakulungaarpoq, Jehovalu ima aperaa: “Ilumut iluartut piiassanerpigit iluaatsunut ilanngullugit?” Jehovap Aaperaat tuppallersarpaa neriorsorlugu Sodoma 50-inik naapertuilluartoqarpat piuneerukkumanagu. Aaperaalli Jehova tallimariarlugu apereqqippaa: Naapertuilluartummi 45-innaappata? 40-innaappata? 30-innaappata? 20-innaappatami? Quliinnaallutilluunniit? Jehovap kamagittarluni inussiarnersumilli Aaperaat neriorsorpaa illoqarfik inunnik quliinnarnik naapertuilluartoqarpat piuneerukkumanagu. Tamaanili naapertuilluartut qulit inoraluaraat Jehovap Loti taassumalu panii aniguisippai. — 1 Mosesi 18:22-32; 19:15, 16, 26.
13. Hannap qanoq ersersippaa Jehova tatigalugu?
13 Elkanap nulia Hanna assut meerartaarusuppoq. Ernisuitsuuvorli, tamannalu aliasuutigaa. Tamanna pillugu Jehovamut qinuvoq, palasiunerullu Elip ima oqarfigaa: “Israelip Guutiata qinnutigisannik tunissavaatit.” Hannap tamanna tuppallersaatigaa, ‘isikkualu aliasuppasikkunnaarpoq’. (1 Samueli 1:8, 17, 18) Hannap Jehova tatigaa, upperaalu taassuma ajornartorsiutini isumagissagaa. Qanoq pisoqassanersoq nalugaluarlugu qamuuna eqqissivoq. Tamatuma kingorna Jehovap qinnutaa akivaa. Hanna naartulerpoq ernertaarlunilu, Samuelimillu atserpaa. — 1 Samueli 1:20.
14. Sooq Daavi tuppallersarneqartariaqarpa, kimullu saaffiginnippa?
14 Guutimit tuppallersarneqartoq alla tassaavoq kunngi Daavi. Jehovap “inuup uummataa isigisarpaa”. Taamaattumik Daavi Israelimut kunngiusussatut toqqaramiuk nalunngilaa taanna eqqortuliorusullunilu pallorfiginninnermik ilumoortumik nuannarisaqartoq. (1 Samueli 16:7; 2 Samueli 5:10) Kingusinnerusukkulli Daavip Batseba allasiorfigaa, ajortulianilu isertorniarlugu Batsebap uia toqutaatippaa. Daavip ajortuliami qanoq ajortiginera paasigamiuk Jehova ima qinnuigaa: “Guuti, unioqqutitsinikka piiarigit nallittuingaarninni! Salinnga pinerluutaarulluinnarlunga, minguersannga ajortaajarlunga! Massami unioqqutitsinikka ilisimavakka, ajortuliaralu sianigiuarpara.” (Tussiaat 51:3-5) Daavi ilumoorluni peqqissimivoq, Jehovallu isumakkeerfigaa. Taamaakkaluartorli Daavip iliuuserisimasami kingunipilui naammagalugit atortariaqarpai. (2 Samueli 12:9-12) Daavilli Jehovap nallittuinera tuppallersaatigaa.
15. Jehovap Jiisusi toqutaanngitsiarnerani qanoq ikiorpaa?
15 Nunamiikkallarami Jiisusip misilinneqaaterpassuit misigai, Guutillu misilinneqaatit taakku akuerai. Jiisusili aalajaattuarpoq. Angutaavoq naammalluinnartoq, taassumalu Jehova tatigiuarlugulu taanna kisiat oqartussaasutut naalappaa. Killuutigineqarluni toqutaanngitsiarnermini Jiisusi Jehovamut ima qinuvoq: “Uanga piumasara pinnani illit piumasat pili.” Taava inngili Jiisusimut takutippoq nakussatsillugulu. (Lukasi 22:42, 43) Jiisusi pisariaqartitarpiaanik Guutip tuppallersarpaa nakussatsillugulu ikiorlugu.
16. Jehovap qanoq ikiorsinnaavaatigut uppernerput pissutigalugu navianartorsiortinneqarutta?
16 Uppernerput pissutigalugu navianartorsiortinneqaraluaruttaluunniit Jehovap imminerminut aalajaattuarniassagatta ikiorsinnaallutalu ikiorusuppaatigut. Aamma makititaanissamik neriuut tuppallersaatigaarput. Ilumut, akeqqap kingulliup, toqup, ‘suujunnaarsitaajumaarnissaa’ qilanaaraarput! (1 Korinthimiut 15:26) Jehovap kiffani aalajaatsut toqusimasut, toqusimasullu allat, eqqaamavai. Jehovalu puiuineq ajorami taakku makitikkumaarpai. (Johannesi 5:28, 29; Apustilit Suliaat 24:15) Makititaanissamik neriuummik upperinninnerput malersugaanitsinni nakussatsissutigalugulu tuppallersaatigaarput.
17. Jehovap asasatsinnik toqusoqaraangat qanoq tuppallersarsinnaavaatigut?
17 Asasavut toqusimasut silarsuassami nutaami nuanninngaartussami makititaajumaartut nalunagu uagutsinnut tuppallersaataangaarpoq. Naalliuuteqarnermummi pissutaasartut peerutissapput. Jehovallu kiffaasa ‘amerlangaartut’ pissutsit aaqqissuussaanerata matuma naggatissaani aniguisut silarsuassami nutaami makititaasut tikilluaqqujumaarpaat ilinniartissallugillu. Ila pisinnaatitaaffiup angissusia! — Saqqummersitat 7:9, 10.
Jehovap ‘taliminik ittuinnartunik’ napatittarpaatigut
18, 19. Guutip kiffani malersugaasut qanoq tuppallersartarsimavai?
18 Mosesi Israelikkunnut nakussatsinnartumik tuppallernartumillu erinarsuusiorpoq. Erinarsuutillu ilaa imaappoq: ‘Itsarsuarli Guutiuvoq. Nunami maani ipput talii ittuinnartut.’ (5 Mosesi 33:27) Kingusinnerusukkut pruffiitip Samuelip Israelikkut ima oqarfigai: ‘Jehova tununnagu taanna uummatissigut iluunngarlusi kiffartuunniarsiuk. Jehovap atini naalannangaartoq pissutigalugu innuttani ajattornavianngilai.’ (1 Samueli 12:20-22) Aalajaalluta Jehova kiffartorfigiuarutsigu taassuma imminiiginnanngisaannassavaatigut. Pisariaqartitatsinnik ikiortuarumaarpaatigut.
19 Ulluni makkunani atugarliungaarfiusuni Guutip innuttani ikiortarlugillu tuppallersartarpai. Nalitsinni qatanngutivut tusindilippassuit nunarsuaq tamakkerlugu malersugaasarput parnaarusaasarlutillu Jehovamut kiffartornertik pissutigiinnarlugu. Taakkua misigisaannit erserpoq pissutsini erloqinartuni Jehovap kiffani ilumut tuppallersartarai. Assersuutigalugu Sovjetunionimi qatanngutitta ilaat uppernini pissutigalugu ukiuni 23-ni parnaarusassanngorlugu pineqaatissinneqarpoq. Parnaarussivimmiikkaluarluni atuagassianik Biibililersaarutinik nakussatsissutigisaminik tuppallersaatigisaminillu pisarpoq. Ima oqarpoq: “Ukiorpassuit taakku ingerlaneranni Jehovamik tatiginninnissaq ilikkarpara, taassumalu nakussatsittarpaanga.” — Atuakkit 1 Petrusi 5:6, 7.
20. Sooq qularutiginngilluinnarsinnaavarput Jehovap qimanngisaannassagaatigut?
20 Siunissami qanoq pineqaraluaruttaluunniit pitsaassaaq oqaatsit tuppallernartut uku eqqaasarutsigit: ‘Ajattussanngilai Jehovap innuttani.’ (Tussiaat 94:14) Tuppallersarneqarnissarput pisariaqartikkaluarlutigu allat tuppallersarsinnaavavut. Allaaserisami tulliuttumi sammissavarput silarsuarmi ajornartorsiuteqarfiusumi aliasuttut qanoq tuppallersarsinnaanerivut.
Qanoq akissavit?
• Naalliuuteqarnitsinnut pissutaasartut ilaat suuppat?
• Jehovap kiffani qanoq tuppallersartarpai?
• Navianartorsiortinneqarutta suna tuppallersaatigisinnaavarput?
[Qupp. 26-mi Ungalusaq/assiliartat]
AJORTUMIK SUNNIUTEQARSINNAASUT ANIGORNIARAANNI ILUAQUTAASINNAASUT . . .
▪ uummatitsinnut Tussiaat 147:3; 1 Johannesi 3:19-22; 5:14, 15
▪ isummatsinnut Tussiaat 94:19; Filippimiut 4:6, 7
▪ misigissutsitsinnut 2 Mosesi 14:13, 14; 5 Mosesi 31:6
▪ peqqissutsitsinnut 2 Korinthimiut 4:8, 9
▪ anersaakkut peqqissutsitsinnut Tussiaat 145:14; Jaaku 5:14, 15