Meeqqat ilinniartinneqarneranni — Ilinniartitseriaatsit sorliit pitsaanerpaappat?

“Oqaatsit taakku peqqussutillu ullumi ilinnut tunniussakka aalajangiutissavatit. Erninnut nangeqqittuartassavatit eqqartortarlugillu angerlarsimatillutit issiasaraangavit, angalaartaraangavit, innartaraangavit makittaraangavillu.” — 5 MOSESI 6:6, 7.

QITORNANIK perorsaaneq ilaannikkut angajoqqaanut artornarpasissinnaasarpoq. Perorsaanerlu pillugu siunnersortissarsioraangamik siunnersuuterpassuaqarmat perorsaaneq artornarpasinneruliinnartarpoq. Aammami ilaquttat ikinngutillu siunnersuerusuttaqaat. Aammattaaq atuakkani, atuagassiani internettimilu nittartakkani siunnersuuterpassuaqartarpoq, immaqa imminnut akerliusunik.

Biibilimili angajoqqaat qitornatik sunik ilinniartissaneraat tutsuiginartunik siunnersuuteqaannarani, aamma qanoq taamaaliorsinnaanerannik atoriaannaasunik siunnersuuteqarpoq. Soorlu versini qulaani issuarneqartunit ersertoq angajoqqaat ullut tamaasa qitornaminnik Guuti pillugu oqaloqatiginninnissaminnut periarfissarsiortariaqarput. Maanna siunnersuutit sisamat Biibilimik tunngaveqartut angajoqqaat tusindilikkuutaat qitornatik Guuti pillugu ilinniartikkaangamikkik iluaqutigisaat sammissavavut.

1. Pinngortitat ilinniarfigisigit. Apustili Paulusi ima allappoq: “[Takussaanngitsuunera], ittuinnartumik pissaanera Guutiussusialu, silarsuup pinngortitaaneraniilli takussaagaluarput suliaasigullu ilisimaneqarlutik.” (Romamiut 1:20) Angajoqqaat qitornatik Guutip kinaassusiviuneranik ilinniartinniarlugit taassuma pinngortitaanik eqqartuisarnermikkut pinngortitarsuarmilu Guutip pissusii sorliit ersernersut meeqqanit paasisinnaaqqullugit ikiuinermikkut iliuuseqarluarsinnaapput.

Jiisusi taamatut periaaseqartarpoq ajoqersukkani ilinniartikkaangamigit. Assersuutigalugu ima oqarpoq: “Qilaap timmiai isigeriarsigit; siaruarterinatillu katersuinngillat quinullu qimatulinatik, Ataatassilu qilammiittup nerisittarpai. Ilissili taakkunannga pingaarnerujussuunnginnerpisi?” (Matthæusi 6:26) Uani Jehovap asanninnera isumassuisuuneralu Jiisusip erseqqissarpai. Aamma Guutip qitornaminut qanoq taamaattuunera pillugu Jiisusip ajoqersukkani eqqarsalersittarpai.

Kunngip Salomop silatuup eqqaavaa Guutip uniaaluit ‘ilisimassuseqalersikkai’, pinngortitallu eqiasuitsut taakku atorlugit ilinniagassaq pingaarutilik ima erseqqissarpaa: “Eqiasuttutit, uniaaluk orniguk, iliuusai misissukkit ilisimassuseqalerlutillu. Siulersorteqanngikkaluarpoq, qullersaqarnani naalagaqarnaniluunniit, taamaattoq aasami nerisassarsiortarpoq nerisassaminillu eqqanaarsartarluni katersuiffiup nalaani.” (Ussatit 6:6-8) Anguniagassaalluartumik anguniagaqarneq Guutillu ikiuineratigut tamatuma anguniarnera pillugit ilinniartitseriaatsip pitsaassusia!

Angajoqqaat Jiisusip Salomollu ilinniartitseriaasiat sunniuteqarluartoq ilaarsinnaavaat, imaaliornermikkut: (1) Qitornatik naasut uumasullu sorliit soqutigineraat aperalugit. (2) Naasut uumasullu taakku pillugit paasiniaallutik. (3) Guuti pillugu taakkunannga suut ilinniarnerlugit eqqartorlugit.

2. Jiisusip ilinniartitaminut isiginnittaasia ilaarsiuk. Jiisusi inuusimasunit tamanit pingaaruteqarnerpaanik oqaasissaqartuuvoq. Taamaattoq piffissarujussuaq apersornermut atortarpaa. Ilinniartitami misigissusii eqqarsaataallu soqutigingaartarpai. (Matthæusi 17:24, 25; Markusi 8:27-29) Aamma angajoqqaat qitornaminnut pingaarutilinnik ilinniartitsissutissarpassuaqarput. Angusaqarluassagunilli Jiisusitut iliortariaqarput meeqqat eqqarsaatiminnik misigissutsiminnillu aniatitsinissaannik kajumissaarlugit.

Taavami meeqqat eqqunngitsumik isiginnittaaseqarpata imaluunniit ilinniartitsissutigisat pingaarutilik paasiumaataarpassuk? Jiisusip apustilinut periaasia malugiuk. Ilaannikkut apustilit oqqattarput maniguuttuunerullu pingaaruteqassusia ilikkarumaataarlugu. Jiisusili kamagittartuuvoq maniguunnerullu pingaaruteqassusia eqqartortuarlugu. (Markusi 9:33, 34; Lukasi 9:46-48; 22:24, 25) Angajoqqaat Jiisusimik ilaarsisut qitornatik kamagittarlutik siunnersussavaat pisariaqarpallu ilinniartitsissutigisartik nangeqqittassallugu meeqqat tamatuma pingaaruteqassusianik paasitserlugit.

3. Maligassiuinikkut ilinniartitsigitsi. Paulusip kristumiut Romamiittut siunnersorpai ullumikkut angajoqqaat iluaqutigisinnaasaannik. Ima allappoq: “Illit allamik ajoqersuisuusutit imminut ajoqersunngitsoorpit? Oqaluussisartutit: ‘Tillissanngilatit,’ nammineq tillittarpit?” — Romamiut 2:21, NV.

Siunnersuut tamanna naleqquppoq, angajoqqaammi iliuusii oqaasiininngarnit qitornaannut sunniuteqarnerujussuupput. Inersimasut qitornaminnut ilinniartitsissutigisatik namminneq iliuuserisarunikkit meeqqat angajoqqaamik ilinniartitsinerannut tusarnaarnissaat ilimanarnerujussuuvoq.

4. Meeqqat mikisuuneranni aallartigitsi. Timotheusi Paulusip ajoqersuiartortitaaqataa nunagisamini ataqqisaavoq. (Apustilit Suliaat 16:1, 2) Taamaattuuneranut pissutaasut ilagaat ‘meeraanerminiilli Allakkanit Illernartunit’ ilinniartinneqarsimanera. Taassuma arnaata aanaavatalu Allakkanit atuffatiinnarnagu, aamma sallusuissutit tassaniittut pillugit eqqarsalersinniarlugu oqaloqatigisarpaat. — 2 Timotheusi 1:5; 3:14, 15.

Suut iluaqutigisinnaagisi

Jehovap Nalunaajaasui qitornat Guuti pillugu ilumoortumik ilinniartinneqarneranni angajoqqaanut immikkut atugassianik saqqummersitsisarput. Taakkua ilaat meeqqanut mikisunut allataapput. Allat angajoqqaat qitornallu inuusuttuaqqat ammasumik attaveqatigiinnissaminnut iluaqutigisinnaavaat.a

Angajoqqaat Guuti pillugu qitornaminnik ilinniartitsisinnaalertinnatik soorunami meeqqat apeqqutigisinnaasaasa akiuminaatsut akissutaasa ilaat nalunngittariaqarpaat. Assersuutigalugu apeqqutit uku qanoq akissavigit: Sooq Guutip naalliunnartoqarnera akueraa? Guutip nunarsuaq sumik siunertaqarfigaa? Toqungasut sumiippat? Apeqqutit taakkua allallu akissutissarsiorneranni Jehovap Nalunaajaasuisa ikiorusuppaatsit, illit ilaquttatillu Guutimut attaveqarluarnerulerniassagassi. — Jaaku 4:8.

[Quppernerup ataani ilanngussaq]