Meeqqat Guuti pillugu ilinniartinneqassappat?

“Upperisamik sammisartakkavut uumissuinissamut naammaqqatarlutik asanninnissamut naammanngillat.” — JONATHAN SWIFT, ATUAKKIORTOQ TULUK.

OQAATSIT taakku 1700-kkunni oqaatigineqaraluartut ullumikkut inuppassuit aamma taamma isumaqarput. Allaammi isumaqartoqarpoq angajoqqaat qitornaminnik Guuti pillugu ilinniartitsinissaat inerteqqutaasariaqartoq. Oqartarput meeqqat ilaqutariinni upperisarsiortuni peroriartorneq ajoqutigisaraat.

Illit qanoq isumaqarpit? Isummat uku arlaat sorleq eqqortuusoraajuk?

● Angajoqqaat qitornaminnik Guuti pillugu ilinniartitsissanngillat.

● Angajoqqaat qitornatik allippata aatsaat upperisarsiornermut tunngasunik oqaloqatigisassavaat.

● Angajoqqaat qitornatik mikisuutillugit Guuti pillugu upperisaminnik ilinniartissavaat. Meeqqalli alliartorneranni angajoqqaaminnit kajumissaarneqassapput tamakkuninnga eqqarsaatiginneqqullugit.

● Meeqqat angajoqqaamik upperisaat apeqqusernagu kingornutissavaat.

Meeqqat upperisarsiorneq ajoqutigisarpaat?

Angajoqqaat asannittut qitornaminnik ajoquseerusunneq ajorput. Meeqqat Guuti pillugu ilinniartariaqannginnerarlugit oqartut tunngaveqarluarpasippat? Misissueqqissaartartut ukiuni qulikkuutaani misissorsimavaat angajoqqaat upperisaat qitornaannut qanoq sunniuteqartarnersoq. Qanoq paasisaqarpat?

Misissueqqissaartartut paasisimavaat meeqqat upperisarsiorneq ajoqutiginagu ineriartornerminni iluaqutigisaraat. 2008-mi atuagassiami Social Science Research-imia saqqummiunneqarpoq nalunaarusiaq una: “Paasinarsisimavoq upperisaq meeqqat angajoqqaaminnut attaveqarnerannut nakussatsissutaasartoq.” Imalu nanginneqarpoq: “Upperisarsiorneq anersaakkullu ittunik pingaartitsineq meerarpassuit inuuneranni pingaaruteqarunarput ilaqutariinnilu attaveqatigiinnermut aalajangiisuullutik.” Tamanna Jiisusip oqaasiinut ukununnga qanoq assingusoq malugiuk: “Pilluarput anersaakkut pisariaqartitaqarnerminnik miserratiginninngitsut qilammiup naalagaaffia pigigamikku.” — Matthæusi 5:3, NV.

Taavami meeqqat angisuunngorunik aatsaat upperisarsiorneq pillugu ilinnialernissaannik isuma? Taama isumaqartut piviusoq una puiorpaat: Meeqqap isumaa qattatullusooq imaqanngitsutut illuni immersorneqartussaavoq. Angajoqqaat aalajangertariaqarput: Angerlarsimaffimminni ‘qattaq’ ileqqussatigut najoqqutassianik ilumoortuusorisaminnik immissanerlugu, imaluunniit meeqqap isumaa uummataalu angerlarsimaffiup avataani isummanik siallerfigitillugillusooq immertissanerlugu.

Qanoq iliortoqarsinnaava?

Oqaluttuarisaanermi paasinarsisimavoq upperisarsiorneq uumissuinissamut paqumisunnissamullu utoqqatsissutaasarsimasoq. Swiftip oqarneratut pinaveersaartitsiniarlutik angajoqqaat qanoq iliorsinnaappat? Qitornatik allanut asannittuliorsinnaalersillugit qanoq ilinniartissinnaavaat?

Qanoq iliortoqarsinnaanera apeqqutit pingasut uku akissutissarsineratigut paasineqarsinnaavoq: (1) Meeqqat sunik ilinniartinneqassappat? (2) Kikkunnit ilinniartinneqassappat? (3) Ilinniartitseriaatsit sorliit pitsaanerpaappat?

[Quppernerup ataani ilanngussaq]