Anaanaasup uppernera aliasunnermut ajugaavoq

„Allakkat uku atuarussigit pilattartinnera anigorsimassanngilara najorunnaarsimassavassilu.“

TAAMA aallartipput anaanaasup Carmenimik atillip panimminut pingasuusunut 25-nik, 19-inik 16-inillu ukiulinnut allagai. Pilattaaneq iluatsinngitsoorpoq, alianaraluartumillu Carmen toquvoq.

Pissutsini taama erloqinartigisuni panimminik pingasuusunik qimatsinissaq kimulluunniit alianartupilussuusimassaaq. Anaanaasulli taassuma Jehovamik taassumalu neriorsuutaanik upperinnilluinnarnera aliasunnermut ajugaavoq, upperinnilluinnarninimi pissutigalugu qamuuna eqqissisimavoq, soorlu allagaani killitsinnartuni ersertoq. Maluginiariaruk panimminut qanoq allannersoq:

„Siullerpaatillugu oqarfigerusuppassi uummatikkut iluunngarlunga asallusi. . . . Ilissi paniulluarnerpaavusi anaanaasumit kissaatigineqarsinnaasut, tulluusimaarutigeqaassilu.

Guutip silarsuassaata nutaap neriorsuutigineqartup pilersinneqarnissaata tungaanut najorusukkaluarpassi . . ., taamaassinnaannginnamali Jehova qinnuigaara ikioqqullusi aalajaattuarsinnaaniassagassi. Misilinneqarnerpassuit naammagalugit atornikuuavut, Jehovallu imminiiginnanngisaannarpaatigut. . . . Taamaattumik peqatigiissortani aqqutigalugit siulersuinera tatigiuarsiuk, aamma ilagiit utoqqaanertallu tapersersortuarsigit. Sapinngisassinnik oqaluussikulagitsi, qatanngutillu tamaasa asasigit.

Avissaaqqanerput utaqqiisaannaavoq. . . . Qinnuigaassi kukkuninnik tamanik, ilissinnik paasinninngitsoorninnik tamanik qanorlu asatiginerlusi ilissinnut oqanngitsoorninnik tamanik isumakkeerfigeqqullunga. . . . Nalunngilara tamassi immikkut assigiinngitsunik pisariaqartitaqartusi. Jehovap tamanna ilissinnit nalunnginneruaa. Pisariaqartitassinnik tamanik tuniumaarpaasi pinertusaarnersilu pillugu akissarsisikkumaarlusi.

Eqqaamajuarsiuk anguniagarsi — silarsuassami nutaami inuunissaq — noqqaassutigiuarsiullu. Qanortoq Jehovap pilluaqqulisi nakussatsillusilu naggatissamut aalajaattuarniassagassi. . . . Aliasoqinasi, panikka asasakka. Asavassi!“

Tamatta alianartumik nalaataqaratarsinnaavugut. Kunngi Salomo ima allappoq: „Piffissaq nalaatsornikkullu pisut [inunnik] tamanik attuisarput.“ (Oqaluussisartup oqaasii 9:11, NV) Guutimilli upperinnilluinnartut apustili Paulusitut matuminnga qularutiginninngilluinnarsinnaapput: „Qularinngilluinnarpara toqulluunniit inuunerulluunniit, inngililluunniit pissaaneqaqataasaluunniit, maannakkut ittulluunniit piumaartussalluunniit, pissaanerilluunniit, qutsissulluunniit atsissulluunniit pinngortitalluunniit allat avissaartissinnaanngikkaatigut Guutip asannissusianit Kristusi-Jiisusimi Naalakkatsinni.“ — Romamiut 8:38, 39; Hebræerit 6:10. (wE 8/1 07)