Guutimut palligunniarit
‘Uagutsinnik Guutip asannissusianit avissaartitsisinnaasoqarpa’?
TAMATTA asaneqarnissarput pisariaqartipparput. Aap, ilaquttatsinnit ikinngutitsinnillu asaneqarluta misigigutta ingerlalluassaagut. Ajoraluartumilli inuit attaveqatigiinneri qajannartupilussuusinnaallutillu nalorninartupilussuusinnaapput. Asasatta ilaasa aliasuutissiorsinnaavaatigut, qimassinnaavaatigut, allaat narrugilersinnaavaatigut. Soraanngisaannartumilli asannittoqarpoq, tassa Jehova Guuti. Taassuma pallorfiginnitsiminut asanninnera Romamiut 8:38, 39-mi nuannersumik allaatigineqarpoq.
Apustili Paulusi ima allappoq: “[Qularinngilluinnarpara] . . . [suulluunniit] avissaartissinnaanngikkaatigut Guutip asannissusianit.” Paulusi imminuinnaq eqqartunngilaq, aammali oqarami “avissaartissinnaanngikkaatigut” Guutimik ilumoorfiginnillutik kiffartortut tamaasa eqqartorpai. Paulusip suna pinerlugu erseqqissarniarlugu Jehovap kiffaasa tunniusimasut taassumannga asaneqarnissaannut akornutaasinnaanngitsut arlallit taagorpai.
“Toqulluunniit inuunerulluunniit.” Jehovap kiffani toqugaangata asajunnaarneq ajorpai. Jehovap asanninnerminut uppernarsaatitut taakku eqqaamajuartarpai, silarsuassamilu nutaami naapertuilluassuseqarfiusumi makitikkumaarpai. (Johannesi 5:28, 29; Saqqummersitat 21:3, 4) Tamannali pinngikkallartillugu Guutip kiffani ilumoortut asajuassavai pissutsit aaqqissuussaaneranni matumani inuuneranni qanorluunniit pisoqassagaluarpat.
‘Inngililluunniit naalagaanerilluunniit.’ (1936) Inuit inngilinit pissaaneqangaartunit naalakkersuisunilluunniit pissarsuarnit sunnertiasuusinnaapput, Jehovali taamaanngilaq. Pinngortitat anersaajusut pissarsuit — soorlu inngilip imminut Saataninngortittup — Guuti kiffaminik asannikkunnaarnissaanut akuersisissinnaanngilaat. (Saqqummersitat 12:10) Naalakkersuisulluunniit, kristumiunik ilumoortunik akerlilersuiniaraluartut, Guutip kiffaminut isiginnittaasia allanngortissinnaanngilaat. — 1 Korinthimiut 4:13.
“Maannakkut ittulluunniit piumaartussalluunniit.” Guutip asanninnera piffissap ingerlanerani sanngiillineq ajorpoq. Guutip kiffaanut maanna siunissamiluunniit pisoqarsinnaassanngilaq Guutip taakkuninnga asannikkunnaassutigisinnaasaanik.
“Pissaanerilluunniit.” Paulusip pissaanilissuit qilammiusut nunamiusullu — ‘inngilit’ aamma ‘naalagaanerit’ — eqqartoreerpai, maannali ‘pissaanerit’ eqqartorpai. Grækerit oqaasiat matumani atorneqartoq arlalinnik isumaqarpoq. Oqaaseq qanorpiaq isumaqaraluarpalluunniit manna qularnanngilaq: Qilammi nunarsuarmiluunniit pissaaneqartoqanngilaq Jehovap innuttaminut asaninnissaanut akornusiisinnaasumik.
“Qutsissulluunniit atsissulluunniit.” Jehovap kiffani asavai pissutsit taakkua atugaat qanorluunniit ikkaluarpata — ajunngikkaluarpata ajoraluarpataluunniit.
“Pinngortitalluunniit allat.” Paulusip pinngortitat pinngortitarsuarmiittut tamaasa eqqarsaatigalugit taamatut oqarami Jehovamik pallorfiginnittut ilumoorfiginnittut sumilluunniit taassuma asanninneranit avissaartinneqarsinnaannginnerarpai.
Inuit asanninnerattut allanngorsinnaasutut nilloriartulersinnaasutulluunniit innani Guutip asanninnera upperlutik taassuminnga tatiginnittuartunut allanngorneq ajorpoq; soraanngisaannassaaq. Tamatuminnga ilisimanninneq Jehovamut qanillinissamut sapinngisarpullu tamaat taassumunnga asanninnitsinnik ersersitsinissamut kajumississutigaarput. (wp08 08/01-E)