Oqaaseq „kristumiu“ isumaarutilersimava?
KRISTUMIUUNEQ qanoq paasisariaqarpa? Illit apeqqut tamanna qanoq akissaviuk? Nunani assigiinngitsuni inuit assigiinngitsut apersorneqaramik ima akipput:
„Jesusimik malinninneq ilaarsinerlu.“
„Inuttut ajunngitsuuneq pigisanillu allanik aveqateqarneq.“
„Kristus Naalakkatut Annaassisutullu akueralugu.“
„Naalagiartarluni, qinunermi ujammit atortarlugit nerliiviliartarlunilu.“
„Isumaqanngilanga kristumiuussagaanni naalagiarneq pisariaqartoq.“
Qinerlerfissiani upperiuminaatsorpassuit nanineqarsinnaapput. Qinerlerfissiami aalajangersimasumi oqaatsip „kristumiu“-p ataani nassuiaanerit assigiinngitsut qulit eqqaaneqarput, assersuutigalugu ’Jesus Kristusip upperisaanik upperisalik imaluunniit upperisaanut ilaasortaq’, imaluunniit ’ileqqorissoq ilakkuminartorluunniit’. Tupinnanngilaq kristumiuuneq sunaasoq inuppassuit nassuiaruminaatsimmassuk.
Killeqannginneq annertusiartuinnarpoq
Ullumikkut kristumiuunerartut — allaat oqaluffimmi ataatsimi ilaasortaaqatigiit — apeqqutit, soorlu Biibilip Guutimit isumassarsiarititaanera, pinngoriartuaarsimaneraaneq, oqaluffiup politikkimut akuliuttariaqarnera, upperisap allanut oqaluussissutigineqartariaqarnera, assiigiinngitsunik isumaqarfigaat. Ileqqussanut tunngasut, soorlu naartuersinneq, anguteqatinoortarneq, katissimanngitsut inooqatigiittarnerat, annertuumik assortuussutigineqartarput. Tamakku pillugit isummat assuarineerukkiartuinnarput.
Assersuutigalugu upperisarsioqatigiit naaggaartut ilaasa oqaluffiup eqqartuussiviata ungasinngitsukkut aalajangiuppaa oqaluffik ’siulersuisoqatigiinnut anguteqatinoortartunik toqqaasalernissaminut’ pisinnaatitaassasoq, aviisi Christian Century allappoq. Allaat upperisarsiornermik ilisimatuut ilaat isumaqarput annassagaanni Jesus upperisariaqanngitsoq. Isumaqarput juutit, musliimit allallu ’[kristumiutulli] qilaliarnissamut periarfissaqartigisut,’ The New York Times-imi nalunaarutigineqarpoq.
Eqqarsaatersuutigisinnaavarput marxisteq kapitalisme illersorlugu oqalugiartoq, demokrateq kisermaasisumik illersuisoq, imaluunniit avatangiisinik illersuisoq orpippassuarnik uppikaatitsinermik tapersersuisoq. „Inuk taamaattoq ilumut marxistiusinnaananilu avatanngiisinik illersuisuusinnaanngilaq,“ oqassagaluarputit ilumoorputillumi. Ullumikkulli kristumiuunerartut isumaasa assigiinngissusiat qimerlooraanni isummat imminnut akerliulluinnartut naammattuugassaapput, kristumiuussutsimik tunngaviliisup, Jesus Kristusip, ajoqersuutaanit allaalluinnartut. Tamatuma kristumiussutsimik taamaattumik qanoq oqaluttuuppaatigut? — 1 Korintumiut 1:10.
Soorlu takussagipput, kristumiut ajoqersuutaat naliminni isummanut qangarsuarli naleqqussaaniartoqartarsimasoq. Allannguinerit taamaattut Guutip Jesus Kristusillu qanoq isumaqarfigaat? Upperisarsioqatigiit Kristusip ajoqersuutiginngisaanik ajoqersuuteqarunik, ilumut kristumiuunerarsinnaappat? Apeqqutit taakku allaaserisami tulliuttumi sammineqassapput.