Naligiinngisitaaneq — Qanoq annikillisinneqassasoq soraarsinneqassasorlu

Naligiissitaaneq inuit kissaatigingaagaat ungasinngitsukkut Pinngortitsisup atulersissavaa. Tamanna pitinnagu naligiinngisitaaneq nammineerluta ilaquttattalu misigisarput annikillisinniarlugu iliuuseqarsinnaavugut. Soorlu Nelson Mandela, Afrika Kujallermi præsidentiusimasoq, oqarsimasoq: „Pigeriikkattaana atorluarnerisa, uagutsinnut tunniunneqartut pinnatik, inuk allanit avissaartittaraa.“

OQALUTTUARISAANERUP oqaasii uppernarsarpai. Anguterpassuit arnarpassuillu inunnguutsiminnit periarfissarissaarsimanngitsut piginnaanermik atorluarnerisigut ilutiminnit periarfissarinnerusunit ingerlalluarnerusimapput. Akerlianilli inunnguutsiminnit nuimanerussuterpassuaqartut ilaasa piginnaanertik maangaannartissimavaat atunngitsoorneratigut.

Pigisatit atorluakkit

Jehovap Nalunaajaasuisa inuit Guutip siunertaanik Biibilimik atuaqqissaarnikkut ilisarsinissaannut ikiorusoqaat. Tamakkiisumilli pissarsiffigissagaanni atuarsinnaallunilu allassinnaasariaqarpoq. Taamaattumik Jehovap Nalunaajaasuisa titusindilikkuutaat atuarnermik allannermillu ilinniartissimavaat, ilaatigut Afrikap kitaanmi nunami ataasiinnarmi 23.000-it (1990-kkut qiteqqunneranni naatsorsorneqarsimasut). Inooqatigiinnermi suliaq tamanna maluginiarnartoq Jehovap Nalunaajaasuisa suliaat pillugu aviisimi San Francisco Examiner-imi allassimavoq: „Innuttaasut maligassaalluartutut isigineqarsinnaapput. Akileraarutinut akiligassatik isumageqqissaartarpaat, napparsimasut paaralugit, atuarsinnaananilu allassinnaannginneq iliuuseqarfigaat.“

Aammattaaq Jehovap Nalunaajaasuisa oqalugiarnermut ilinniartitsinikkut siuariartortukkut hundredetusindilikkuutaat katersuussimasunut oqallorinneruleqqullugit oqalugiarsinnaanissamut sungiusarpaat. Tusindilippassuit taakkua ilaat oqalunnermut ilungersornartumik innarluuteqarsimapput. Assersuutigalugu angut Afrikap kujataaneersoq ima allappoq: „Taama ittoqertigigama nipaarlunngorpunga amerlanertigullu allat sinnerlunga oqalutsittarlugit. . . . Teokratiimik Atuarfimmi atuartunngorama Biibilimillu tusarnaartunut ikittunut atuffassisussaallunga . . . ittoqingaarama pisassaq piffissarititaasup iluani saqqummiunnissaa saperpara. Ataatsimiinnerup kingornagut [ilinniartitsisup] inussiarnerluni atorluarsinnaasunik siunnersorpaanga. Siunnersuutigaa nipituumik atuarlunga sungiusassasunga. Taamaaliorpungalu ullut tamaasa Biibilimit Napasuliaq Alapernaarsuiffik-millu nipituumik atuartalerpunga.“ Angut taanna siumukarluarami maannakkut oqalugiarsinnaalersimavoq tusarnaartunut hundredelippasuarnut, aap, allaat arlainnik tusindilinnut.

Uppeqatigiit akornanni naligiinneq

Ilinniartitaanermut, aningaasaqarnermut inuttullu atugarisatigut inissisimaffeqarneq, nakorsagaasinnaanermullu tunngasutigut Jehovap nalunaajaasuisa akornanni pissutsit assigiinngeqaat. Assigiinngitsut tamakkua pissutsit naammalluinnanngitsut ataanni inuunerannit ersiutaaginnarput. Kisianni uppeqatigiit allat assigiinagit naggueqatigiissutsikkut, inooqatigiissutsikkut aningaasatigullu assigiinngussutsit pissutigalugit paqumisunnerit akunnerminni annikillisingaarsimavaat.

Taamaappoq ilinniakkamik Biibilimeersut maleruarnissaat ilungersuutigimmassuk. Uummatimikkut iluunngarlutik najoqqutassat Biibilimeersut maleruartarpaat, soorlu uku: „Inuit pingaartitaat uanga [Guuti] pingaartitarinngilakka. Inuimmi isiminnut saqqumisuinnaat isigisarpaat, [Jehovalli] inuup uummataa isigisarpaa.“ (1 Samuel 16:7) ’Inuup kinaassusia Guutip pinngilaa, kisianni inuiaqatigiinni tamani kinaluunniit mianerinnitsini iluarnermillu sulisoq nuannaraa.’ (apustilit suliait 10:34, 35) ’Ajortumik iliortoq ajortumik akileqinasiuk. Inuit tamarmik takkuanni ileqqorissaarniaritsi. Ajornanngippat sapinngisassinnik inuit tamaasa eqqissiveqatiginiarsigik.’ — Rûmamiut 12:17, 18; aamma takukkit Timûtiusimut agdlagai sujugdlît 6:17-19; Jâku 2:5, 9.

Jehovap nalunaajaasuisa najoqqutassat Biibilimeersut naligiissitaanartut tamakku maleruaqqissaartarpaat, taamaattumillu akunnerminni naggueqatigiissutsikkut, inooqatigiissutsikkut aningaasatigullu assigiinngissutsit pissutigalugit naligiinngisitaaneq akuerinngilaat. Assersuutigalugu kristumiut ilagiinni kikkut kiffartortunngussasut aalajangerneqassagaangat pissutsit tamakku pingaaruteqanngillat. Ilinniartitsisutut nakkutilliisutullu akisussaaffiit anersaakkut pisinnaasat kisiisa tunngavigalugit tunniunneqartarput. — 1 Timûtius 3:1-13; Títus 1:5-9.

Inunnut silarsuarmi paqumisukkajuttumi matumani naligiinngisitaanermik naalliussimasunut iluaqutaasorujussuuvoq qatanngutitut isigineqarneq Pinngortitsisumullu attaveqarnermi naligiinneq misigalugu. Martinap tamanna uppernarsarsinnaavaa. Ataataata ilaquttaminik qimatsinerata kingorna angerlarsimaffimmi piitsuusumi anaanamik kisimiilluni pilersuisulimmi alliartorpoq. Inuiaqatigiinnit suunngitsutut iliorfigineqarajuppoq, imminut tatiginermik pigisaqarpianngilaq inunnillu peqateqarnissaq sapingajallugu. Suut tamaasa soqutigiunnaarpai. Kisiannili Biibili atuaqqisaartaleramiuk Jehovamullu nalunaajaasunngorluni pissutsit allanngorput. Oqarpoq: „Eqqarsaatit nuanniitsut suli akiortariaqarpakka, kisianni maannakkut ajornartorsiutit iluarsineqarnissaanut piareersimaneruvunga. Imminut ataqqinera alliartorpoq, nakimaannerullungalu oqaluttarpunga. Sallusuissutip akisussaassutsimik pigisaqalersissimavaanga. Maannakkut nalunngilara Jehovap asagaanga inuunerlu nuannersuusoq.“

Jehovap Nalunaajaasui peqatigiiupput kristumiuusut nunani 230-nit amerlanerusuneersut, silarsuarmilu matumani naligiinneq asseqanngitsoq nuannaarutigaat. Uppeqatigiit allat taamaannerarsinnaappat uppernarsarlugulu?

Soorunami Jehovap nalunaajaasui piviusorsiortuupput. Miserratiginngilaat silarsuarmi naammalluinnanngitsumi inuit akornanni naligiinngisitaanerit tamaasa peersinnaanngikkitik — soorluttaaq allat ukiuni hundredelippassuarni taamaaliorniaraluarsimasut. Kisiannili nuannaarutigaat iluminni taama iluatsisimatigimmat. Guutillu neriorsutaanut uppersuseqarluarlutik silarsuaq nutaaq naapertuilluartorlu naassaanngitsussamut naligiinngisitaaneqarfiunngitsoq qilanaaraat.

Inuit Guutimut naalakkusuttut tamarmik ungasinngitsukkut ’ataqqinassutsikkut piginnaatitaaffitsigullu naligiitsitaassapput’, soorlu Pinngortitsisup aallaqqaammut tamanna siunertarigaa. Eqqarsaat nuannersoq! Taamanikkussamut piviusunngorumaarpoq! (wE 1/8 99)

[Qupp. 7-imi assiliartaq]

Jehovap Nalunaajaasuisa atuarsinnaananilu allassinnaannginneq iliuuseqarfigaat titusindilikkuutaat ilinniartillugit

[Qupp. 8-imi assiliartaq]

Tusarliussaq Biibilimiittoq naggueqatigiissutsikkut, inooqatigiissutsikkut aningaasatigullu assigiinngissutsit pissutigalugit paqumisunnerit peersitaanissaannut peqataavoq