Aserorterisarneq ajugaaffigineqarsinnaavoq
„INUUSUTTUT aserorterinerat inersimasunut taakkualu najoqqutassiaannut ataqqinninnginnertut akeqqersimaarnertullu isigineqartuarsimavoq,“ atuakkiortut Jane Norman aamma Myron W. Harris taama allassimapput. Inuusuttorpassuit isumaqartut pissutsit allanngortinneqarsinnaanngitsut, „pingasuugaangata ataaseq isumaqarpoq aserorterineq millisinneqarsinnaasoq angajoqqaat meeqqatik soqutiginerugaluarpatigik, inuusuttullu susassaaleqinnginnerugaluarpata,“ atuakkiortut taama paasissutissiipput. Immaqa aserorterineq millisinneqarsinnaavoq inuusuttut sammisassaqartinneqarpata angajoqqaaminnillu nakkutigineqarneruppata. Ajornartorsiummulli pissutiviusut taamaalillutik ajugaaffigineqarsinnaappat?
Inuusuttut amerlasuut kisimiitillutik perulluliorneq ajorput, ilagisaqaleraangamilli immaqa sianiitsuliorlutik ajoqusiillutilluunniit allanut malugitinniartarput. Nelson taamaappoq ikiaroortilluni putumatilluniluunniit aserorterinikkut kamannini naammagittaanninilu ersersikkajukkamigit. Katuullit ilagiissaanni nunaannarmi pissutsinik iluarsaanissaq sulisullu pisinnaatitaaffii pillugit oqalugiaatinit kajumissisinneqarluni José misigivoq akerliussutsimik takutitsilluni suliumajunnaartunut aaqqissuussaasumillu aserorterinernut peqataasariaqarluni. Nelsonilli Joséllu marluullutik perulluliornermit aserorterinermillu pitsaanerusoq nanivaat.
Aserorterinermut pissutaasut itinerusut ilaat
Siullermik misissoriartigu inuusuttut ilaat sooq aserorterisartut. Meeqqat inuusuttullu amerlasuut nalornisarput „silarsuarlu sumiiffittut paatsiverunnartutut eqqumiitsutullu inunnik silaqarluanngitsunik ulikkaartutut isigalugu“. Inuppassuilli isumaannut akerliusumik „inuusuttuaqqat siunissartik soqutigaat. Inersimasut ilimagisaannit silarsuarmi pissutsit isumakuluutigineruaat,“ nalunaarusiami eqqaaneqarpoq. Piaaralutik piaarinatilluunniit inuusuttut isumatsassimanertik, iluarsineqanngitsunik ajornartorsiuteqarnertik matussutissinneqanngitsunillu pisariaqartitaqarnertik aserorterinermikkut ersersissinnaavaat. Misissuineq aallaqqaataani eqqaaneqartoq naapertorlugu „apersorneqartut arlaannaataluunniit aserorterineq illersorniarsimanngilaa, pisuussuteqartulluunniit taamaaliunngillat“.
Inuusuttorpassuit nersorneqarneq kajumissaarneqarnerlu ajorput. Ullumikkut ilinniartitaaneq pingaartinneqarnerujartuinnarmat suliffinnullu amerlasuunut atatillugu immikkut ilisimasaqarneq teknikkikkullu piginnaassutsit pisariaqarmata, inuusuttut ilaat ernumangaarsinnaapput. Aamma angajoqqaat, ilinniartitsisut kammalaatillu annertuumik piumasaqarsinnaapput naammassisinnaasallu pingaartillugit inuttulli qanoq ittuunerat pingaartinnagu. Amerlasuut pikitsitsisarput aserorterisarlutillu imminnut pakatsissutigigamik. Angajoqqaat asanninnerat soqutiginninnerallu isumakuluutinik taamaattunik millisitseqataalluarsinnaanngillat?
Immaqa malugisimavat oqartussaasut ilaasa qarmani allattuisarnerit inuusuttullu allatigut pinerluttuliortarneri iliuuseqarfiginiarunnaarsimagunaraat, inuillu isumaaluttut nalinginnaasumik isumaqartut ilinniartitsisut atuarfinnilu sulisut aserorterisarneq akiorniartussaagaat. Inatsisinik unioqqutitsaalisitsineq pillugu The World Book Encyclopedia-mi allassimavoq: „Aserorterisoq akiliisitaasinnaavoq parnaarussaasinnaalluniluunniit. Nunat ilaanni angajoqqaat meeqqamik aserorterinerannut inatsisitigut akisussaatinneqartarput, aserorterisartulli amerlanersaat pillarneqarneq ajorput. Pissutsini taamaattuni inatsisinik unioqqutitsaalisitsineq ajornakusoorpoq, aserorterisarnernullu atatillugu aningaasartuutit ima annertutiginngillat eqqartuussisunut suliassanngortitsinissaq imminut akilersinnaalluni.“ Nalunaarusiaq naapertorlugu pinerluttuliortut 3 procentiinnaat tigusaasarput.
Illittaaq qularnanngitsumik isumaqatigissavatsigut ajunngitsumik asannittumillu perorsaanikkut inuusuttut pinerluttuliortarnerat pitsaanerpaamik akiorneqarsinnaasoq. Ilaqutariittut inuuneq ajorneruleraangat inuiaqatigiit tamarmik ajoqutigisarpaat. Professori Ana Luisa Vieira de Mattos Brasiliami São Paulop universitetianeersoq oqarpoq inuusuttunut atatillugu ajornartorsiutit ilaatigut ’angajoqqaat sumiginnaanerannik, najoqqutassiinnginnerannik attaveqatigiinnginnerannillu, paarinerluinerannik, soqutigisaqannginnerannik ilaguutiinnarnerannillu pissuteqartut’.
Qularnanngivippoq ullumikkut misigisavut Jesusip oqaasiisa eqquunnerigaat: ’Iluaatsuliornerit amerliumaarmata asanninneq amerlasuuni nillertunngorumaarpoq.’ (Matîuse 24:12) Kialu oqaatsit Timûtiusimut agdlagkat áipait 3:1-4-miittut ilumoornerat miserratigissavaa: ’Imaattorli ilisimassavat: ullussani kingullerni ajornartunik nalliuttoqassammat, inuit inuujumaarmata imminnik asasut, aningaaserituut, usorsitsaapiluttut, anneruniartut, mitallersut, angajoqqaaminnut naalanngitsut, qujasuitsut, soqqusaatsut, asanniuitsut, saammajuitsut, mamarliisut, nunujuitsut, qiningasut, ajunngitsunik uumissuisut, killuussisut, isumaatsut, ilisimatuuniartut, Guuti kajumiginagu nuannaarutinut kajumittut.’ Allaat inuit taamaattut akornanni inuuneq inuusuttut pinerluttuliortunngorsinnaanerannut ilasaataasinnaavoq. Akiuukkunnaartariaqanngilagulli. Inuiaqatigiit aserorterineq nungutissinnaasimanngilaat, inuilli pissutsiminnik allannguisimasut, pissusilukkunnaarsimasut sorraatsuujunnaarsimasullu nassaassaapput. Tamatuma takutippaa aserorterisarneq ajugaaffigineqarsinnaasoq.
Inuusuttunut peqqissinartumik unnersuussineq
Aserorterigajuut allallu qanoq ilillutik inuttut pissusertik allanngortissinnaasimavaat? Naak ilinniartitsisut angajoqqaallu upperiuminaatsissinnaagaluaraat, Biibilimi ullutsinnut naleqqulluartumik unnersuussuteqarpoq. Tamatuma maleruarneratigut aserorterisarsimasuugaluartut ilaat Guutip ersarissumik peqqussutaata naalannissaanut kajumissisinneqarsimapput: „Amerlanerusut iliornerannut ajortumut maleruutiinnassanngilatit.“ (2 Moses 23:2) Inuppassuit ajoqersuutit siornatigut paasisimanngisatik pillugit sallusuissut Guutip oqaasianiittoq kajungerilersimavaat, ilinniakkaminnillu ajunngitsumik sunnerneqarlutik. Assersuutigeriartigu José, inuusuttoq São Paulomeersoq. Taanna ilinniartinneqarsimavoq Guutimik pallorfiginninnermi assilissat atorneqassasut. Josélli ilikkaramiuk Guuti Jehovamik ateqartoq, assilissallu pallorfiginninnermi atorneqarnerat iluarinngikkaa, Guutip iluarisaanik iliorumalluni allannguivoq. — 2 Moses 20:4, 5; Tussiaat 83:19; 1 Juánase 5:21; sarĸúmersitat 4:11.
Inupilunnut nakuusertartunut ilaajunnaarluni suliumajunnaartunilu pakatsinartunik misigisaqartarunnaarluni Nelson siunissamut piviusumik neriuutissaqalerpoq, tamannalu eqqissiallannartippaa. Ima oqarpoq: „Siornatigut ilaquttama ilagiumaneq ajorpaannga ikinngutipiloqarnera ikiaroortarneralu pissutigalugit, maannali ilaquttannit ataqqisaanerpaavunga. Ataatama qinnuigigajuppaanga angajukka siunnersoqqullugit. Jehovap nalunaajaasui ilagalugit Biibili atuaqqissaartalerakkuli pillualerpunga inuunera siunertaqalermat.“ Inuusuttumullu Marcotut ittumut, nakuuserajuttunik avatangiiseqarsimasumut, tuppallernaqaaq paasillugu Guutip naalagaaffiata nunarsuaq paratiisinngortissagaa. — sarĸúmersitat 21:3, 4.
Aamma Valter eqqaaneqarsinnaavoq. Taanna siornatigut inupilunnut ilaasimavoq nakuusertarluni aserorterisarlunilu. Iliarsuttut nuanneeqisumik meeraasimalluni assut killinneqaatigaa paasigamiuk Guuti silarsuarmi matumani ajortumi innuttaqartoq. Inuit taakkua ilumoorlutik Biibilip najoqqutassiai inuunerminni maleruarniarsaraat misiginneqataallutillu allat soqutigaat inussiarnerfigalugillu. Valter oqarpoq: „Jesusip neriorsuutaatut maanna ilaqutariissuarnut ilaavunga, amerlasuunik ’qatannguteqarlunga, anaanaqarlunga ataataqarlungalu’. Siunissarlu eqqarsaatigalugu qilanaarpunga Guutip naalagaaffiata naapertuilluartup ataani pilluarluni ataasiussuseqarlunilu inuunissamut.“ — Mákorse 10:29, 30; Tussiaat 37:10, 11, 29.
Akerliussutsimit pitsaanerusoq
Aserorterisarsimasuugaluit taakkua tullermik asanissaasa isumaginissaasalu saniatigut aamma ilikkarsimavaat ’ajortumik uumiginninneq’. (Tussiaat 97:10; Matîuse 7:12) Illimmi? Aserorterinersuit kingunerinik atugarliortitaasorpassuit ilagiinnaraluaraatsit, Guutip oqaasia atuaqqissaarlugu Jehova ilinnut piviusunngorsinnaavoq, paasissavallu Ataataasoq asannittoq qilammiusoq ilinnik isumassuiumasoq. (1 Pîtruse 5:6, 7) Guutip anersaakkut ineriartornissannut ikiorsinnaavaatit, naak sanngiissuseqaraluartutit piitsuugaluartutilluunniit. Tamannaannarluunniit misigisaavoq nuanningaartoq.
Jehovap erneratalu, Jesus Kristusip, kissaatigaa inuit tamarmik Biibilip tusarliussaanik ilinniarnissaminnut periarfissinneqassasut. Guutip oqaasiata inuit aserorteriunnaarsiinnarnagit sunniuteqarnerusinnaavoq. Aamma inuit Guutip najoqqutassiaanik maleruaanikkut siumukarnissaannut kajumissuseqalersissinnaavai. Taamaaliornermikkut qatanngutigiissuarnut inuiannit tamalaaneersunut minguissutsimikkut pissuserissutsimikkullu tusaamasaasunut, Jehovap Nalunaajaasuisa nunarsuaq tamakkerlugu ilagiissaannut, ilaalersarput. Oqaatsinut Evfisumiut 4:24-miittunut naapertuuttumik kristumiut eqqortuliorusuttut ’inuttaaq Guuti assilillugu pinngortitaq atisimavaat iluartillugu illernartillugulu ilumoornikkut’. Qanittukkut nunarsuaq inunnik taamaattunik ulikkaassaaq, taakkuinnaammi aniguissapput naassaanngitsumillu inuussallutik. — Naleqqiuguk Lúkarse 23:43.
Silarsuaq nutaaq aserorterisoqarfiunngitsoq!
Aserorterisarnerit ajugaaffigineqarsinnaasut upperissallugu piviusorsiornerua? Qanoq ililluni taama annertutigisumik allanngortitsisoqarsinnaava? Guutip naalagaaffiata qanittukkut pissutsit aaqqissuussaanerat ajortoq manna atorunnaarsissavaa. Nunarsuarmiut piaaralutik Guutip naapertuilluartumik inatsisai unioqqutikkunikkik akisussaatinneqassapput. (Naleqqiuguk Jesaja 24:5, 6.) „Ajortuliortut tamarmik piiagaassapput“, naapertuilluassutsimilli nuannarisaqartut aniguisinneqassallutik. „[Jehovap] annaallugillu aniguisissavai, aniguisissavai guutiitsunit, annaatissallugillu namminerminut qimaaniarsimammata.“ — Tussiaat 37:38-40.
Aserorterisarnermut pissutaasut peerneqarluinnassapput, soorluttaaq pinerluttuliorneq, naqisimanninneq ajussuserlu peerneqassasut. Silarsuassami nutaami inuuneq eqqissinermik, naapertuilluassutsimik toqqissisimanermillu ilisarnaateqassaaq. Jesaja 32:18-imi allaatigineqarpoq taamanikkussaq pissutsit qanoq ittuussasut: „Taava inuiaqatikka najugaqalissapput najukkami eqqissinartumi, inigisani isumannaatsuni ineqarfinnilu alianaatsuni isumakuluuteqarfiunngitsuni.“ Nunarsuaq tamakkerlugu kusanartumik paratiiseqassaaq asannittunik isumassuisunillu inulimmik.
Allat millionilikkuutaat ilagalugit aserorterisarsimasut maanna Jehova Guutimut qanittumik attaveqarsinnaanertik nunaarutigaat. Aserorterisarunnaavissimapput. Illittaaq Guutip oqaasianit taassuma silarsuassaani nutaami inuunissamut siulersorneqarumassavit? Taamaappat Jehovap ikiuinera Tussiaat 32:8-mi eqqaaneqartoq ilasseqqullugu kajumissaarumavatisigit: „Ilinniartissavakkit ilitsersorlutillu ingerlavissannik. Siunnersussavakkit, isigiuassavakkillu.“ (wE 15/6 99)
[Qupp. 7-imi assiliartaq]
Angajoqqaat soqutiginninnerat asanninnerallu inuusuttunut illersuutaasinnaapput